‘বিৰাট’ ৰেকৰ্ডৰ অপেক্ষাত ‘কিং’ কোহলী, প্ৰটিয়াছ আক্ৰমণ নেওচি হ’বনে সফল!

বিৰাট কোহলী

আজি অন্ত পৰিব বহু ক্ৰিকেটপ্ৰেমীৰ আকাংক্ষিত প্ৰতীক্ষাৰ। পুনৰ এবাৰ বেট হাতত লৈ আজি ২২ গজত নামিব ক্ৰিকেট বিশ্বৰ অন্যতম মহাতাৰকা বিৰাট কোহলী। অষ্ট্ৰেলিয়াৰ বিপক্ষে এদিনীয়া শৃংখলাৰ পিছত এইবাৰ দেশৰ মাটিত প্ৰিয় তাৰকাগৰাকীৰ ক্ৰীড়া নৈপুণ্যতা প্ৰত্যক্ষ কৰিবলৈ সাজু হৈছে ক্ৰিকেটপ্ৰেমী। দক্ষিণ আফ্ৰিকাৰ বিৰুদ্ধে টেষ্ট শৃংখলাত শোচনীয় পৰাজয়ৰ ব্যথা দূৰ কৰাৰ বাবেও আজি অলেখ ক্ৰিকেটপ্ৰেমীৰ প্ৰধান ভৰসা হ’ব এইগৰাকী তাৰকা ক্ৰিকেটাৰ।

ৰাঁচীৰ JSCA আন্তঃৰাষ্ট্ৰীয় ষ্টেডিয়ামত আজি অনুষ্ঠিত হ’ব ভাৰত আৰু দক্ষিণ আফ্ৰিকাৰ মাজৰ এদিনীয়া শৃংখলাৰ প্ৰথমখন মেচ। তিনিখনীয়া মেচৰ এই শৃংখলাটোত নিশ্চিতভাৱে ক্ৰিকেটপ্ৰেমীৰ দৃষ্টি নিবদ্ধ হ’ব বিৰাট কোহলীৰ ওপৰত। টি-২০ আৰু টেষ্টৰ পিছত এতিয়া কেৱল এদিনীয়াত অংশ লোৱা কোহলীয়ে এই শৃংখলাৰ সময়তে বহুকেইটা কৃতিত্ব অৰ্জনৰ সুযোগ লাভ কৰিব।

যিকোনো একক ফৰ্মেটত সৰ্বাধিক শতক

এই শৃংখলাত যদি কোহলীয়ে এটা শতকো অৰ্জন কৰে, তেতিয়া এদিনীয়া ক্ৰিকেটত ৫২টা শতক সম্পূৰ্ণ কৰিব। ইয়াৰ লগে লগে তেওঁ যিকোনো এটা ফৰ্মেটত সৰ্বাধিক শতক অৰ্জন কৰা বেটছমেন হিচাপে পৰিগণিত হ’ব। বৰ্তমান এইক্ষেত্ৰত তেওঁ শচীন তেণ্ডুলকাৰৰ সৈতে যুটীয়াভাৱে অভিলেখৰ অধিকাৰী। বিৰাটে এদিনীয়াত ৫১টা শতক অৰ্জন কৰাৰ বিপৰীতে শচীনে টেষ্টত এনে কৃতিত্ব অৰ্জন কৰিছিল।

আন্তঃৰাষ্ট্ৰীয় ক্ৰিকেটত দ্ৰুততম ২৮ হাজাৰ ৰান

নিজ আন্তঃৰাষ্ট্ৰীয় কেৰিয়াৰত ২৮ হাজাৰ ৰান সম্পূৰ্ণ কৰিবলৈ বিৰাট কোহলীক ৩২৭ ৰানৰ প্ৰয়োজন। তেওঁতকৈ পূৰ্বে কেৱল শচীন তেণ্ডুলকাৰ আৰু কুমাৰ ছাংগাকাৰাই এই কৃতিত্ব অৰ্জন কৰিছে। এই শৃংখলাতে কোহলীয়ে শচীনক অতিক্ৰম দ্ৰুততম ২৮ হাজাৰ ৰানৰ অভিলেখ গঢ়াৰ সুযোগ পাব। অৱশ্যে এই অভিলেখৰ ক্ষেত্ৰত তেওঁ ২৩টা ইনিংছৰ সুযোগ লাভ কৰিব।

কুমাৰ ছাংগাকাৰাক অতিক্ৰম কৰাৰ সম্ভাৱনা

বৰ্তমান বিৰাট কোহলীয়ে নিজ আন্তঃৰাষ্ট্ৰীয় কেৰিয়াৰত ২৭,৬৭৩ ৰান সংগ্ৰহ কৰিছে। শচীন তেণ্ডুলকাৰ ৩৪,৩৫৭ ৰানেৰে এই তালিকাত শীৰ্ষত আৰু কুমাৰ ছাংগাকাৰা ২৮,০১৬ ৰানেৰে দ্বিতীয় স্থানত আছে। কোহলীয়ে আৰু ৩৪৪ ৰান সংগ্ৰহ কৰিলেই ছাংগাকাৰাক অতিক্ৰমি তালিকাৰ দ্বিতীয় স্থানলৈ উন্নীত হ’ব।

দক্ষিণ আফ্ৰিকাৰ বিৰুদ্ধে বিশেষ অভিলেখ

এই শৃংখলাত এটা শতক অৰ্জন কৰিলেই বিৰাট কোহলী দক্ষিণ আফ্ৰিকাৰ বিৰুদ্ধে ৬টা এদিনীয়া শতক অৰ্জন কৰা বিশ্বৰ একমাত্ৰ বেটছমেন হিচাপে পৰিগণিত হ’ব। লগতে যদি তেওঁ শৃংখলাত দুটা ৫০ উৰ্ধৰ ইনিংছ খেলে, তেতিয়া দক্ষিণ আফ্ৰিকাৰ বিৰুদ্ধে ভাৰতৰ হৈ সৰ্বাধিক ৫০+ স্ক’ৰ কৰাৰ অভিলেখো তেওঁৰ হাতত থাকিব।

আনহাতে বিজয়ী মেচত যদি তেওঁ আৰু মাত্ৰ ১৪ ৰান সংগ্ৰহ কৰে, দক্ষিণ আফ্ৰিকাৰ বিৰুদ্ধে এইদৰে জয়ী হোৱা এদিনীয়া মেচত ১০০০ ৰান সংগ্ৰহ কৰা প্ৰথমজন ভাৰতীয় হিচাপেও পৰিগণিত হ’ব কোহলী। SENA দেশ (দক্ষিণ আফ্ৰিকা, ইংলেণ্ড, নিউজিলেণ্ড, অষ্ট্ৰেলিয়া)ৰ বিৰুদ্ধে জয়ী হোৱা এদিনীয়া মেচত সৰ্বাধিক ৰান সংগ্ৰহৰ বিশ্ব অভিলেখো গঢ়িবলৈ সক্ষম হ’ব পাৰে কোহলী। এইক্ষেত্ৰত তেওঁক মাত্ৰ ১৬ ৰানৰ প্ৰয়োজন।

দেশৰ মাটিত সৰ্বাধিক ৫০+ স্ক’ৰ

এই শৃংখলাত যদি কোহলীয়ে এটা ৫০+ স্ক’ৰ সংগ্ৰহ কৰে, লগে লগে ভাৰতৰ মাটিত এদিনীয়াত সৰ্বাধিক ৫০+ স্ক’ৰ কৰাৰ অভিলেখ গঢ়িব। ইয়াৰ সমান্তৰালকৈ এটা মাত্ৰ ৫০+ ইনিংছ খেলিলেই ঘৰুৱা ক্ষেত্ৰত তেওঁ ৫০+ স্ক’ৰৰ শতক অৰ্জন কৰিব। এনে বহু ঈৰ্ষণীয় অভিলেখৰ লক্ষ্যৰে প্ৰটিয়াছ বাহিনীৰ বিপক্ষে শৃংখলালৈ সাজু কিং কোহলী।