প্ৰথম টেষ্টত টছত জিকি ভাৰতক বেটিঙৰ আহ্বান ইংলেণ্ডৰ, ভাৰতীয় একাদশত কোন কোন আছে?

ভাৰত বনাম ইংলেণ্ড

আজিৰে পৰা আৰম্ভ হৈছে ভাৰত আৰু ইংলেণ্ডৰ টেষ্ট শৃংখলা। প্ৰথম টেষ্টত ইংলেণ্ডে টছত জয়লাভ কৰি ভাৰতক প্ৰথমে বেটিং কৰিবলৈ আমন্ত্ৰণ জনায়। পাঁচখন খেলৰ টেষ্ট শৃংখলাৰ প্ৰথমখন মেচ লিডছৰ ঐতিহাসিক খেলপথাৰ হেডিংলিত অনুষ্ঠিত হৈছে। এই মেচত ভাৰতীয় দলে এটা আকৰ্ষণীয় প্লেইং এলেভেন খেলপথাৰত নমাইছে। সাই সুদৰ্শনক অভিষেক ঘটোৱাৰ সুযোগ দিয়া হৈছে।

কৰুণ নায়াৰকো মূল একাদশত অন্তৰ্ভুক্ত কৰা হৈছে। এইগৰাকী খেলুৱৈয়ে ২০১৭ চনৰ পিছত প্ৰথমবাৰৰ বাবে টেষ্ট খেলা দেখিবলৈ পোৱা যাব। ডাঙৰ খবৰটো হ’ল নীতিশ ৰেড্ডী, কুলদীপ যাদৱৰ দৰে খেলুৱৈ মূল একাদশৰ পৰা বাহিৰ হৈছে।

অধিনায়ক হোৱাৰ লগে লগে এটা ডাঙৰ সিদ্ধান্ত ল’লে গিলে

ভাৰতীয় বেটিং অৰ্ডাৰ আৰম্ভ হ’ব যশস্বী জয়ছৱাল আৰু কে এল ৰাহুলৰ সৈতে। টেষ্ট ক্ৰিকেটত আগ্ৰাসী আৰু কাৰিকৰীভাৱে শক্তিশালী বেটিঙেৰে নিজৰ স্থান দৃঢ় কৰি তুলিছে জয়ছৱালে। আনহাতে অভিজ্ঞ অ’পেনাৰ হিচাপে কে এল ৰাহুলে স্থিৰতা প্ৰদান কৰিব। ৰোহিত শৰ্মাই অৱসৰ লোৱাৰ পিছত তেওঁ এই দায়িত্ব পাইছে।

তিনি নম্বৰ স্থানত সাই সুদৰ্শনৰ বাছনি এক ৰোমাঞ্চকৰ সিদ্ধান্ত। ঘৰুৱা ক্ৰিকেটত তেওঁৰ ধাৰাবাহিকতা আৰু শেহতীয়া প্ৰদৰ্শনে নিৰ্বাচকসকলৰ দৃষ্টি আকৰ্ষণ কৰিছে। টেষ্ট ক্ৰিকেটত নিজৰ স্থান দখল কৰিবলৈ সাজু এইগৰাকী যুৱ বেটছমেন। চাৰি নম্বৰত বেটিং কৰা শুভমন গিল। এক প্ৰকাৰে তেওঁ শেহতীয়াকৈ টেষ্টৰ পৰা অৱসৰ লোৱা বিৰাট কোহলীৰ ঠাইত স্থান লাভ কৰিছে।

উইকেটকীপাৰ হিচাপে ঋষভ পণ্টে এই মূল একাদশত নিজৰ স্থান দখল কৰিবলৈ সক্ষম হৈছে। ইংলেণ্ডত তেওঁৰ প্ৰদৰ্শন বহুত ভাল। একে সময়তে ৰবীন্দ্ৰ জাদেজাক অল ৰাউণ্ডাৰ হিচাপে নিৰ্বাচিত কৰা হৈছে। শ্বাৰ্দুল ঠাকুৰো মূল একাদশলৈ ঘূৰি আহিছে। তেওঁ দীৰ্ঘদিন ধৰি ভাৰতীয় টেষ্ট দলৰ পৰা আঁতৰি আছিল। ইংলেণ্ডত খেলাৰ তেওঁৰ বহু অভিজ্ঞতা আছে। আনহাতে, ভাৰতৰ দ্ৰুত বলিঙক নেতৃত্ব দিব যশপ্ৰীত বুমৰাহে। আগ্ৰাসী বলিঙৰ বাবে পৰিচিত মহম্মদ ছিৰাজে বুমৰাহক সহযোগ কৰিব। তৃতীয় বেগী বলাৰ হিচাপে নিৰ্বাচিত হৈছে প্ৰসিদ্ধ কৃষ্ণ।

এই ৮ জন খেলুৱৈয়ে নাপালে সুযোগ

এই মেচখনৰ বাবে টিম ইণ্ডিয়াই মুঠ ১৯ গৰাকী খেলুৱৈক দলত অন্তৰ্ভুক্ত কৰিছিল। অভিমন্যু ইশ্বৰন, নীতিশ ৰেড্ডী, ধ্ৰুৱ জুৰেল, ৱাশ্বিংটন সুন্দৰ, আকাশ দীপ, অৰ্শদ্বীপ সিং, কুলদীপ যাদৱ আৰু হৰ্ষিত ৰানাক মূল একাদশত স্থান দিয়া নহ’ল।

ভাৰতৰ মূল একাদশ-

যশস্বী জয়ছৱাল, কে এল ৰাহুল, সাই সুদৰ্শন, শুভমন গিল, ঋষভ পন্ত, কৰুণ নায়াৰ, ৰবীন্দ্ৰ জাদেজা, শ্বাৰ্দুল ঠাকুৰ, যশপ্ৰীত বুমৰাহ, মহম্মদ চিৰাজ আৰু প্ৰসিদ্ধ কৃষ্ণ।