ভাৰতে আয়োজন কৰিব ২০৩০ৰ কমনৱেলথ গেমছ! লণ্ডনত দাখিল আনুষ্ঠানিক প্ৰস্তাৱ
লক্ষণীয়ভাৱে ভাৰতে ইতিমধ্যে ২০৩৬ চনৰ অলিম্পিক আয়োজনৰ বাবেও পৰিকল্পনা কৰিছে। তাৰ পূৰ্বে ২০৩০ চনৰ কমনৱেলথ গেমছ আয়োজন ভাৰতৰ বাবে অলিম্পিক আয়োজনৰ ক্ষেত্ৰত এক প্ৰস্তুতি হিচাপে বিবেচিত হ’ব।
কমনৱেলথ গেমছ ২০৩০ আয়োজনৰ প্ৰস্তাৱ দাখিল ভাৰতৰ
ক্ৰীড়া বিশ্বৰ অন্যতম এক আগশাৰীৰ প্ৰতিযোগিতা কমনৱেলথ গেমছে ২০৩০ চনত সম্পূৰ্ণ কৰিব ১০০ বছৰ। কমনৱেলথ গেমছৰ এই শতবৰ্ষ আয়োজনৰ স্বত্ব বিচাৰি আনুষ্ঠানিকভাৱে প্ৰস্তাৱ দাখিল কৰিছে ভাৰতে। গুজৰাটৰ ক্ৰীড়া মন্ত্ৰী হৰ্ষ সংঘৱীৰ নেতৃত্বত ভাৰতীয় কমনৱেলথ গেমছ এছ’চিয়েশ্যন আৰু গুজৰাট চৰকাৰৰ প্ৰতিনিধিত্বৰে গঠিত এটা প্ৰতিনিধি দলে শুকুৰবাৰে লণ্ডনত কমনৱেলথ স্প’ৰ্টছক আনুষ্ঠানিক প্ৰস্তাৱ দাখিল কৰে। এই প্ৰস্তাৱ অনুসৰি ২০৩০ চনৰ অক্টোবৰ মাহত ১২ দিনৰ কাৰ্যসূচীৰে কমনৱেলথ গেমছ আয়োজনৰ পৰিকল্পনা কৰা হৈছে।
কমনৱেলথ গেমছৰ এই শতবৰ্ষ সংস্কৰণৰ আয়োজক চহৰ হিচাপে নিৰ্বাচিত কৰা হৈছে। কমনৱেলথ স্প’ৰ্টছৰ মুখ্য কাৰ্যালয়ত কালি সংস্থাৰ অন্তৱৰ্তীকালীন সভাপতি ড’নাল্ড ৰুকাৰেই এই প্ৰস্তাৱ গ্ৰহণ কৰে। ইণ্ডিয়ান অলিম্পিক এছ’চিয়েশ্যনৰ কাৰ্যবাহী পৰিষদৰ সদস্য তথা কমনৱেলথ স্প’ৰ্টছৰ ক্ৰীড়া সমিতিৰ সদস্য লেফটেনেণ্ট জেনেৰেল হৰপাল সিং আৰু ইণ্ডিয়ান অলিম্পিক এছ’চিয়েশ্যনৰ মুখ্য কাৰ্যবাহী বিষয়া ৰঘুৰাম আয়াৰো এই সময়ত উপস্থিত থাকে।
এক বিবৃতি যোগে ইণ্ডিয়ান অলিম্পিক এছ’চিয়েশ্যনে ‘এই নিবিদাই বিশ্বব্যাপী ক্ৰীড়া কেন্দ্ৰ হিচাপে ভাৰতৰ ক্ৰমবৰ্ধমান স্থানক শক্তিশালী কৰিছে’ বুলি উল্লেখ কৰে। লক্ষণীয়ভাৱে ভাৰতে ইতিমধ্যে ২০৩৬ চনৰ অলিম্পিক আয়োজনৰ বাবেও পৰিকল্পনা কৰিছে। তাৰ পূৰ্বে ২০৩০ চনৰ কমনৱেলথ গেমছ আয়োজন ভাৰতৰ বাবে অলিম্পিক আয়োজনৰ ক্ষেত্ৰত এক প্ৰস্তুতি হিচাপে বিবেচিত হ’ব।
এই প্ৰস্তাৱ দাখিল কৰাৰ পিছতে লেফটেনেণ্ট জেনেৰেল হৰপাল সিঙে কয়, “আজি ভাৰতৰ বাবে এক গৌৰৱৰ মুহূৰ্ত, আমি আমদাবাদত কমনৱেলথ গেমছ ২০৩০ আয়োজনৰ বাবে আমাৰ প্ৰাৰ্থীত্ব আনুষ্ঠানিকভাৱে উপস্থাপন কৰিলো।” তেওঁ লগতে ভাৰতৰ এই প্ৰস্তাৱ অলিম্পিক গেমছ ২০৩৬ ভাৰতত অনুষ্ঠিত কৰাৰ ক্ষেত্ৰত প্ৰধানমন্ত্ৰী নৰেন্দ্ৰ মোদীৰ পৰিকল্পনাৰ দিশত এক সঠিক পদক্ষেপ বুলিও উল্লেখ কৰে।
উল্লেখ্য যে ভাৰতে বিগত ২০১০ চনত নতুন দিল্লীত কমনৱেলথ গেমছৰ আয়োজন কৰিছিল। এতিয়া ২০৩০ চনত পুনৰ গেমছ আয়োজনৰ প্ৰস্তাৱ দাখিল কৰি গুজৰাটৰ ক্ৰীড়া মন্ত্ৰী হৰ্ষ সংঘৱীয়ে ভাৰতত কমনৱেলথ গেমছ ‘বসুধৈৱ কুটুম্বকম’ নীতিৰ আধাৰত গঢ় লৈ উঠিব বুলি মন্তব্য কৰে। ইফালে ইণ্ডিয়ান অলিম্পিক এছ’চিয়েশ্যনৰ সভাপতি পি টি উষাই এই নিবিদাই সমগ্ৰ জাতিৰ আকাংক্ষাক প্ৰতিনিধিত্ব কৰিছে বুলি মন্তব্য কৰিছে।