শীতকালত শিশুৰ ক্ষেত্ৰত শ্বাস-প্ৰশ্বাসজনিত ৰোগৰ আশংকা কিয় বৃদ্ধি পায় ?

প্ৰতীকী ফটো

শীতকালত শিশুসকলে সন্মুখীন হোৱা এটা প্ৰধান সমস্যা হৈছে কাহ, চৰ্দি, শ্বাস-প্ৰশ্বাসজনিত সমস্যা। এই সময়ছোৱাত শিশুসকলে এই ৰোগত আক্ৰান্ত হোৱাৰ সম্ভাৱনা বৃদ্ধি পায় । বিশেষকৈ পাঁচ বছৰৰ তলৰ শিশুৰ ক্ষেত্ৰত এই সমস্যা দেখা যায়। আনকি এই বতৰত শ্বাস-প্ৰশ্বাসজনিত ৰোগৰ বাবে শিশুসকলক চিকিৎসালয়ত ভৰ্তি কৰিবলগীয়া হয়। এনে পৰিস্থিতিত তেওঁলোকৰ স্বাস্থ্যৰ যত্ন লোৱাটো অতি প্ৰয়োজন ।

শিশুৱে শীতকালত কিয় শ্বাস-প্ৰশ্বাসজনিত ৰোগত আক্ৰান্ত হয় আৰু ইয়াক কেনেকৈ প্ৰতিৰোধ কৰিব পাৰি? এই সন্দৰ্ভত টিভি ৯ ৰ আগত দিল্লীৰ আৰ এম এল হাস্পতালৰ শিশু অস্ত্ৰোপচাৰ বিভাগৰ এইচ অ’ ডি ডাঃ পিনাকি আৰ দেবনাথে কিছু কথা প্ৰকাশ কৰিছে ।

ডাঃ পিনাকিয়ে জানিবলৈ দিছে যে, শীতকালত উষ্ণতা কম হোৱাৰ বাবে বহু প্ৰকাৰৰ ভাইৰাছ আৰু বেক্টেৰিয়া সক্ৰিয় হৈ উঠে। ইয়াৰ ফলত শিশুৰ মাজত ভাইৰাছ আৰু বেক্টেৰিয়া বিয়পি পৰাৰ সম্ভাৱনা বৃদ্ধি পায়। যাৰ বাবে শ্বাস-প্ৰশ্বাসজনিত সমস্যা, চৰ্দি আৰু জ্বৰ আদি ৰোগ বাঢ়িবলৈ আৰম্ভ কৰে। শীতকালত শিশুৰ নিউমোনিয়া আৰু শ্বাস-প্ৰশ্বাসজনিত ৰোগত আক্ৰান্ত হোৱাৰ আশংকাও বৃদ্ধি পায়।

যিসকল শিশুৰ ৰোগ প্ৰতিৰোধ ক্ষমতা দুৰ্বল হয়, তেনে শিশুৰ শ্বাস-প্ৰশ্বাসজনিত ৰোগত আক্ৰান্ত হোৱাৰ আশংকা থাকে। লগতে বৃদ্ধি পোৱা প্ৰদূষণৰ বাবে শ্বাস-প্ৰশ্বাসজনিত ৰোগত আক্ৰান্ত হোৱা ৰোগীৰ সংখ্যা বৃদ্ধি পাইছে ।

শিশুৰ স্বাস্থ্যৰ যত্ন কেনেকৈ ল’ব ?

• যদি আপুনি ল’ৰা-ছোৱালীক বাহিৰলৈ পঠিয়াই দিয়ে তেন্তে তেওঁলোকক সঠিকভাৱে গৰম সাজ-পোছাক পিন্ধাই ৰাখক ।
• শিশুৰ খাদ্যত ভিটামিন চি, সেউজীয়া শাক-পাচলি আৰু ফল-মূল অন্তৰ্ভুক্ত কৰক।
• শিশুৱে যাতে পৰ্যাপ্ত পৰিমাণে টোপনি যায় তাৰ ওপৰত গুৰত্ব দিয়ক অভিভাৱকসকলে ।
• শিশুক কোনো সংক্ৰমিত ব্যক্তিৰ সংস্পৰ্শলৈ আহিবলৈ নিদিব। লগতে পৰিষ্কাৰ-পৰিচ্ছন্নতাৰ ক্ষেত্ৰত যত্ন লওক ।
• লগতে শিশুসকলক মাস্ক পৰিধান কৰিবলৈ পৰামৰ্শ দিব ।
• যদি শিশুটিয়ে কোনো সমস্যাৰ সন্মুখীন হৈছে তেন্তে তেওঁ তৎক্ষণাত চিকিৎসকৰ পৰামৰ্শ গ্ৰহণ কৰক । এই বিষয়ত অসাৱধান নহ’ব।