শীতকালত লিভাৰ সুৰক্ষিত কৰি ৰাখিবলৈ এই খাদ্যবোৰ খোৱাটো অতি প্ৰয়োজন…

শীতকালত যকৃতৰ যত্ন লোৱাটো অতি প্ৰয়োজন। এই সময়ত শৰীৰৰ বিপাকীয় ক্ৰিয়া লেহেমীয়া হয়, যাৰ ফলত যকৃতৰ ওপৰত চাপ বৃদ্ধি পায়। এই সময়ছোৱাত খাদ্যাভ্যাসত গুৰুত্ব নিদিলে চৰ্বি জমা হোৱা, প্ৰদাহ, পাচনতন্ত্ৰৰ সমস্যাৰ সৃষ্টি হ’ব পাৰে। তদুপৰি পানী পৰ্যাপ্ত পৰিমাণে সেৱন নকৰা আৰু আঁহৰ অভাৱত যকৃত দুৰ্বল হ’ব পাৰে। গতিকে এই সময়ত সুষম খাদ্য বজাই ৰখা আৰু স্বাস্থ্যকৰ খাদ্য অন্তৰ্ভুক্ত কৰাটো অতি গুৰুত্বপূৰ্ণ।

ভজা খাদ্য, উচ্চ চেনি আৰু প্ৰচেছড খাদ্যৰ ফলত যকৃতত চৰ্বি জমা হ’ব পাৰে। ইয়াৰ ফলত যকৃতৰ নিজকে পৰিষ্কাৰ কৰাৰ ক্ষমতা কমি যায় আৰু প্ৰদাহ বৃদ্ধি পায়। ৰঙা মাংস আৰু অত্যধিক তেলীয়া খাদ্য খোৱাটোৱে যকৃতৰ ক্ষতি কৰিব পাৰে। ভুল খাদ্যাভ্যাসৰ বাবে তেজৰ চুগাৰৰ পৰিমাণ বৃদ্ধি পায় আৰু যকৃতত চৰ্বি জমা হোৱাৰ সম্ভাৱনা বৃদ্ধি পায়। গতিকে, শীতকালত যকৃতক সুস্থ কৰি ৰাখিবলৈ কি কি খাদ্য খাব লাগে সেই বিষয়ে জানোঁ আহক।

শীতকালত যকৃত সুস্থ কৰি ৰাখিবলৈ কি খাব লাগে?

দিল্লীৰ আৰ এম এল হাস্পতালৰ চিকিৎসা বিভাগৰ সঞ্চালক অধ্যাপক ডাঃ সুভাষ গিৰীয়ে ব্যাখ্যা কৰে যে, শীতকালত যকৃতক সুস্থ কৰি ৰাখিবলৈ খাদ্যত আঁহ, এন্টিঅক্সিডেন্ট আৰু স্বাস্থ্যকৰ চৰ্বি অন্তৰ্ভুক্ত কৰাটো অতি প্ৰয়োজনীয়। পালেং, ব্ৰকলিৰ লগতে সেউজীয়া শাক-পাচলিয়ে যকৃতৰ বিষমুক্ত কৰাত সহায় কৰে আৰু প্ৰদাহ কমায়। আপেল, কমলা, অমিতাৰ দৰে ফল যকৃত পৰিষ্কাৰ কৰাৰ লগতে ৰোগ প্ৰতিৰোধ ক্ষমতা বৃদ্ধিৰ বাবে উপকাৰী।

ওটছ আৰু গোটা শস্য খালে যকৃতত চৰ্বি জমা হোৱাৰ সম্ভাৱনা কম হয় আৰু হজম শক্তি উন্নত হয়। আখৰোট, আলমণ্ড, শণৰ গুটি আদি বাদাম আৰু গুটি সেৱন কৰিলে যকৃতত স্বাস্থ্যসন্মত চৰ্বি পোৱা যায়, প্ৰদাহ কম হয় আৰু যকৃতৰ কাৰ্যক্ষমতা উন্নত হয়। দালি আৰু মাহজাতীয় শস্য প্ৰটিন আৰু আঁহৰ উত্তম উৎস। গ্ৰীণ টি মধ্যমীয়াকৈ সেৱন কৰিলে যকৃতৰ স্বাস্থ্য শক্তিশালী কৰি ৰখাত সহায় কৰে।

এই কথাবোৰ গুৰুত্ব দিয়ক

• দৈনিক প্ৰচুৰ পৰিমাণে পানী খাব লাগে।
• আপোনাৰ ওজন নিয়ন্ত্ৰণত ৰাখক।
• মদ আৰু অত্যধিক ভজা খাদ্য পৰিহাৰ কৰক।
• নিয়মিতভাৱে লঘু ব্যায়াম কৰক।
• যকৃতৰ সঠিক বিপাকীয় ক্ৰিয়া আৰু যকৃতৰ কাৰ্যক্ষমতা বজাই ৰাখিবলৈ পৰ্যাপ্ত পৰিমাণে টোপনি লওক।