চাউলত পোকে ধৰিছে নেকি? চিন্তা নকৰিব, এনে সহজ উপায়েৰে পলকতে হ’ব চিন্তা দূৰ

আমাৰ সমাজত ভাতেই হৈছে প্ৰধান খাদ্য। কিছুসংখ্যক লোকে যদিও ৰুটি বা আন খাদ্য গ্ৰহণ কৰে, তথাপি অধিকাংশ লোকেই দুপৰীয়া বা নিশাৰ আহাৰত ভাত খায়। কৃষি প্ৰধান ৰাজ্য হিচাপে অসমৰ প্ৰায় প্ৰতিটো গ্ৰাম্য অঞ্চলতে ধানৰ খেতি কৰা হয়। গতিকে গাঁও অঞ্চলৰ লোকসকলৰ ঘৰত স্বাভাৱিকতেই যথেষ্ট পৰিমাণৰ চাউল মজুত থাকে। আনহাতে দৈনিক আহাৰৰ বাবে চাউল ক্ৰয় কৰা লোকসকলেও প্ৰতিদিনে বজাৰৰ পৰা চাউল ক্ৰয় কৰাৰ পৰিৱৰ্তে এবাৰতে কিছু বুজন পৰিমাণে চাউল ক্ৰয় কৰি মজুত ৰাখে।

কিন্তু কেতিয়াবা ঘৰত মজুত ৰখা চাউলত পোকে ধৰা দেখিবলৈ পোৱা যায়। চাউল থোৱা বাচনত কেতিয়াবা সৰু সৰু বগা, ক’লা বা বাদামী ৰঙৰ পোক দেখা যায়। এয়া এক সাধাৰণ সমস্যা। চাউলত এইদৰে পোকে ধৰিলে নষ্ট হোৱাৰ আশংকা থাকে। কিন্তু কিছুমান সাধাৰণ ঘৰুৱা উপায় মানি চলিলে চাউল বহুদিনলৈ মজুত কৰি ৰাখিব পাৰি। জানো আহক এই বিষয়ে-

১) চাউল ৰ’দত দিয়াঃ চাউল থোৱা বাচনত যদি পোকে ধৰে, তেতিয়া প্ৰথমে চাউলখিনি ২-৩ ঘণ্টা ৰ’দত ৰাখিব লাগে। ৰ’দত দিলে পোকবোৰ চাউলৰ পৰা আঁতৰি যায় আৰু চাউলখিনি সেমেকি থাকিলে সেই আৰ্দ্ৰতাও দূৰ হয়।

২) নিম পাত ব্যৱহাৰঃ চাউল থোৱা বাচনত কেইখিলামান নিমৰ পাত দিব পাৰে। নিমৰ গোন্ধ আৰু ইয়াৰ ঔষধি গুণে চাউলৰ বাচনলৈ পোক-পৰুৱা অহাত বাধা দিব।

৩) শুকান জলকীয়া আৰু নহৰুঃ চাউলত ২-৩ টা শুকান ৰঙা জলকীয়া বা কেইফুটামান নহৰু থৈ দিব পাৰে। শুকান জলকীয়া আৰু নহৰুৱে পোক-পৰুৱাক প্ৰাকৃতিকভাৱে বাধা দিব পাৰে।

৪) লংঃ চাউলৰ বাচনত কেইটামান লং ৰাখিব লাগে। ইয়াৰ ফলত চাউলৰ এক সুগন্ধ ওলোৱাৰ লগতে পোক-পৰুৱাৰ প্ৰৱেশত বাধা দিব।

৫) বায়ু সোমাব নোৱাৰা পাত্ৰঃ চাউল সদায় ভাল মানৰ বায়ু সোমাব নোৱাৰা প্লাষ্টিক/ষ্টীল/কাঁচৰ পাত্ৰত ৰাখিব লাগে। চাউল থোৱা বাচন সেমেকি থাকিলে পোক-পৰুৱা সোমোৱাৰ সম্ভাৱনা বেছি।

৬) চাউল ক্ৰয়ৰ সময়ত সাৱধান হ’বঃ নতুন চাউল ক্ৰয় কৰাৰ পিছত কিছুসময়ৰ বাবে ৰ’দত  দি তাৰ পিছত পাত্ৰত সোমোৱাব লাগিব। লগতে পুৰণি চাউলৰ লগত নতুন চাউল মিহলাই নিদিব।