গৃহমন্ত্ৰীৰ ভাষাত উচ্ছেদিত অনুপ্ৰৱেশকাৰীসকল ক’লৈ গ’ল? প্ৰশ্ন লুৰীণজ্যোতি গগৈৰ…

কেন্দ্ৰীয় গৃহমন্ত্ৰী অমিত শ্বাহৰ শেহতীয়া অসম ভ্ৰমণক ব্যৰ্থ, নিৰস আৰু হতাশাজনক আখ্যা দিছে অসম জাতীয় পৰিষদে। ডিব্ৰুগড়ত এক সংবাদমেল সম্বোধন কৰি অজাপৰ সভাপতি লুৰীণজ্যোতি গগৈয়ে কয় যে কেন্দ্ৰীয় গৃহমন্ত্ৰীগৰাকীয়ে সংগতিবিহীন, অবাস্তৱ আৰু মিথ্যাচাৰেৰে পৰিপূৰ্ণ, লগতে হাস্যকৰ কথা কৈ অসম এৰি গৈছে।

গগৈয়ে কয় যে, গৃহমন্ত্ৰী অমিত শ্বাহৰ পৰা উত্তৰ বিচাৰি ৰাইজৰ হৈ অজাপই মুঠ ১১টা প্ৰশ্ন উত্থাপন কৰিছিল। এই প্ৰশ্ন কেইটা বিজেপি দলে ২০১৪, ২০১৬, ২০১৯, ২০২১ আৰু ২০২৪ চনৰ নিৰ্বাচনৰ সময়ত অসমবাসী ৰাইজক দিয়া কিছুমান প্ৰতিশ্ৰুতিৰে জড়িত। আশা কৰা হৈছিল যে, তেখেতে নিজৰ অসম ভ্ৰমণ কালত উক্ত প্ৰশ্নসমূহৰ উত্তৰ দিব। কিন্তু দুৰ্ভাগ্যজনক যে, তেখেতে গুৱাহাটীত তিনিখনকৈ ৰাজহুৱা সভাত ভাষণ দিলে, অথচ এটা প্ৰশ্নৰো উত্তৰ অমিত শ্বাহে নিদিয়া অভিযোগ কৰে অজাপৰ নেতাগৰাকীয়ে।

গগৈয়ে কয়, “দেশৰ গৃহমন্ত্ৰীয়ে এটাও প্ৰশ্নৰ উত্তৰ নিদিলে। আমাৰ দেশত এনে এটা ব্যৱস্থা চলি আছে যি ব্যৱস্থাত প্ৰধানমন্ত্ৰী, গৃহমন্ত্ৰী, মুখ্যমন্ত্ৰী আদিয়ে নিজৰ মুখেৰে দিয়া প্ৰতিশ্রুতি সমূহৰ প্ৰতিও দায়বদ্ধ নহয়।”

তেওঁ লগতে কয়, “অমিত শ্বাহে উদাত্তকণ্ঠে ঘোষণা কৰিলে যে, ৰাজ্যৰ দক্ষ মুখ্যমন্ত্ৰীয়ে অসমৰ ১,২৬,০০০ একৰ মাটি অবৈধ অনুপ্ৰৱেশকাৰীৰ পৰা মুক্ত কৰিলে। আমি দেশৰ গৃহমন্ত্ৰীৰ পৰা উদাত্তকণ্ঠে এইটোও অসমৰ ৰাইজক জনোৱাতো বিচাৰো যে, ইমান বৃহৎ পৰিমানৰ মাটি, ১,২৬,০০০ একৰ মানে ৪,১৫,৮০০ বিঘা মাটিত বসবাস কৰি থকা অবৈধ অনুপ্ৰৱেশকাৰীসকলক কি কৰিলে ?”

“দেশৰ সংবিধান মতে আমাৰ দেশত অবৈধ অনুপ্ৰৱেশকাৰী থাকিব নোৱাৰে তেনেস্থলত ৪ লাখ ১৫ হাজাৰ ৮০০ বিঘা মাটিত বসবাস কৰা ইমান বৃহৎ সংখ্যক মানুহ বহিষ্কাৰ কৰা হ’ল নে নাই ? দেশৰ গৃহমন্ত্ৰী হিচাপে দেশৰ সাৰ্বভৌমত্বৰ জড়িত ইমান গুৰুত্বপূৰ্ণ বিষয় এটা তেখেতে জনাতো প্ৰয়োজন।” এইদৰে কয় লুৰীণজ্যোতি গগৈয়ে।

অমিত শ্বাহক কটাক্ষ কৰি গগৈয়ে কয়, “গৃহমন্ত্ৰী অমিত শ্বাহক তেখেতৰ বিশ্বস্ত আৰু দক্ষ মুখ্যমন্ত্ৰীয়ে চাগে উচ্ছেদ সম্পৰ্কে জনালে। কিন্তু এইটো নজনালে যে, গৃহমন্ত্ৰীৰ ভাষাত সেই অবৈধ অনুপ্ৰবেশকাৰীসকলক ৰাজকোষৰ ধনেৰে ভাৰতৰ ভূমিখণ্ডৰ অসমৰ ভৌগলিক চাৰি সীমাৰ ভিতৰতেই পুনৰ সংস্থাপিত কৰিছে।”

“এতিয়া গৃহমন্ত্ৰীয়ে আমাক জনাওক, অবৈধ অনুপ্ৰৱেশকাৰী বুলি জনাৰ পিছতো সেই সকলক বহিস্কাৰ নকৰি ৰাজকোষৰ ধনেৰে অসমৰ মাটিত পুনৰ সংস্থাপন কৰাটো ৰাষ্ট্ৰদ্ৰোহ হয় নে নহয়।” অনুপ্ৰৱেশকাৰীৰ প্ৰসংগত এইদৰে কয় লুৰীণজ্যোতি গগৈয়ে।

গগৈয়ে অভিযোগ কৰে যে, উচ্ছেদিত মাটিৰ অধিক সংখ্যক মাটিৰ পৰা অসমৰ জনজাতীয় ভূমিপুত্ৰ খিলঞ্জীয়া মানুহকো উচ্ছেদ কৰিছে। তেনেস্থলত কেন্দ্ৰীয় গৃহমন্ত্ৰীয়ে অসমৰ জনজাতীয় খিলঞ্জীয়া ভূমিপুত্ৰ সকলকো অবৈধ অনুপ্ৰবেশকাৰী আখ্যা দি অক্ষমনীয় অপৰাধ কৰিছে বুলি কয় অজাপৰ নেতাগৰাকীয়ে।

ইফালে, এই অভিযোগৰ উত্থাপন কৰাৰ লগতে অমিত শ্বাহ আৰু হিমন্ত বিশ্ব শৰ্মাই শিলসাঁকো, লখিমপুৰৰ পবা, ফুকনহাট, নগাঁৱৰ মিকিৰ বামুনি, কাজিৰঙাৰ সমীপৰ ইংলে পথাৰ আৰু হাতীখুলি, গুৱাহাটীৰ ওচৰৰ আমচাং সহ ৰাজ্যৰ উচ্ছেদিত খিলঞ্জীয়াৰ ৰাইজৰ ওচৰত ক্ষমা বিচাৰিব লাগে বুলি দাবী কৰে লুৰীণজ্যোতি গগৈয়ে।