Diabetes: ডায়েবেটিছ ৰোগীয়ে ৰাতিপুৱা খালী পেটত নাখাব এইবোৰ খাদ্য, কি কি খাব লাগে জানক…

ডায়েবেটিছ

শেহতীয়া সময়ত ডায়েবেটিছ ৰোগত আক্ৰান্ত লোকৰ সংখ্যা ক্ৰমান্বয়ে বৃদ্ধি পাইছে। জীৱনশৈলী, খাদ্যাভ্যাস, অনিয়মিত ৰুটিন আদিয়ে সৃষ্টি কৰিছে এই ৰোগ। বিশেষকৈ শীতকালত ডায়েবেটিছ ৰোগীয়ে খোৱা খাদ্যৰ প্ৰতি অধিক সাৱধান হোৱা প্ৰয়োজন। এই সময়ছোৱাত শৰীৰৰ প্ৰয়োজনীয়তা সলনি হয়। ইয়াৰ ফলত তেজৰ চুগাৰৰ মাত্ৰাত প্ৰত্যক্ষ প্ৰভাৱ পৰে।

ডায়েবেটিছ ৰোগীয়ে ৰাতিপুৱা খোৱা খাদ্যৰ প্ৰতি অতি সাৱধান হ’ব লাগে। কাৰণ খালী পেটত খোৱা খাদ্যই গোটেই দিনটো আপোনাৰ চুগাৰৰ মাত্ৰাত প্ৰভাৱ পেলায়। গতিকে ডায়েবেটিছ ৰোগীয়ে ৰাতিপুৱা খালী পেটত কি খাব লাগে কি কি খাদ্য খাব নালাগে? জানক…

ৰাতিপুৱা খালী পেটত কি খাব?

ডায়েবেটিছ ৰোগীয়ে ৰাতিপুৱা খালী পেটত পুষ্টিকৰ খাদ্য খাব লাগে। চিকিৎসা বিশেষজ্ঞৰ মতে আঁহযুক্ত খাদ্য খোৱাটো ভাল। ৰাতিপুৱা খালী পেটত গৰম পানী খালে দিনটোৰ আৰম্ভণি ভাল হয় বুলি কোৱা হয়। তিয়াই থোৱা আলমণ্ড বা আখৰোট সীমিত পৰিমাণত খাব পৰা যায় বুলি পৰামৰ্শ দিয়া হৈছে।

অংকুৰিত দাইল, অটচ আদি খালে তেজত চুগাৰৰ মাত্ৰা সুস্থিৰ কৰি ৰখাত সহায়ক হয়। পুৱা আমলখি বা ইয়াৰ ৰস খোৱাৰ পৰামৰ্শ দিয়া হয়। পাতল সেউজীয়া শাক-পাচলিৰ ৰস বা চালাডে হজম শক্তি বৃদ্ধি কৰে। এইবোৰে অত্যাৱশ্যকীয় পুষ্টিকৰ উপাদান যোগান ধৰে। এই খাদ্যবোৰ খালে গোটেই দিনটো শক্তিৰ যোগান ধৰে। তেজৰ চুগাৰৰ মাত্ৰা নিয়ন্ত্ৰিত হয়।

খালী পেটত কি খাব নালাগে?

ডায়েবেটিছ ৰোগীয়ে ৰাতিপুৱা খালী পেটত কিছুমান খাদ্য খাব নালাগে। খালী পেটত চেনিযুক্ত চাহ, চেনি বা গুড়ৰ সৈতে গাখীৰ, পেকেটত থোৱা ৰস খালে ক্ষতিকাৰক হ’ব পাৰে। লগতে বগা ৰুটি, বিস্কুট, কেক বা ভজা খাদ্যৰ ফলত চুগাৰৰ মাত্ৰা বৃদ্ধি হ’ব পাৰে। খালী পেটত কলৰ দৰে চুগাৰৰ মাত্ৰা বৃদ্ধি কৰা ফল নাখাব। এই খাদ্যবোৰে ইনচুলিনৰ মাত্ৰাত প্ৰভাৱ পেলায়। ইয়াৰ ফলত চুগাৰৰ মাত্ৰা নিয়ন্ত্ৰণ কৰাত অসুবিধাৰ সৃষ্টি হয়।

ডায়েবেটিছ কেনেকৈ নিয়ন্ত্ৰণ কৰিব পাৰি?

প্ৰতিদিনে নিয়মিত সময়ত খাদ্য গ্ৰহণ কৰক আপোনাৰ দৈনন্দিন জীৱনত লঘু ব্যায়াম বা খোজ কঢ়াটো অন্তৰ্ভুক্ত কৰক। লগতে আপোনাৰ ঔষধ সময়মতে গ্ৰহণ কৰক আপোনাৰ তেজৰ চুগাৰৰ পৰিমাণ নিয়মিতভাৱে পৰীক্ষা কৰক। ইয়াৰ উপৰিও পৰ্যাপ্ত পৰিমাণে টোপনি যাওক আৰু মানসিক চাপৰ পৰা আঁতৰি থাকিব