পথ দুৰ্ঘটনাৰ ভুক্তভোগীয়ে লাভ কৰিব ১.৫ লাখ পৰ্যন্ত চৰকাৰী চিকিৎসা ব্যয়; মাত্ৰ মানিব লাগিব এই বিশেষ নিয়ম

কেন্দ্ৰীয় মন্ত্ৰী নীতিন গাডকাৰী

পথ দুৰ্ঘটনাত পতিত ভুক্তভোগীৰ বাবে কেন্দ্ৰীয় চৰকাৰে আৰম্ভ কৰিলে এখন নতুন আঁচনি । এতিয়াৰে পৰা পথ দুৰ্ঘটনাত পতিত লোকে চিকিৎসাৰ ক্ষেত্ৰত চৰকাৰৰ পৰা কিছু আৰ্থিক সকাহ লাভ কৰিব । কেন্দ্ৰীয় পথ পৰিবহণ মন্ত্ৰী নীতিন গাডকাৰীয়ে পথ দুৰ্ঘটনাত পতিত হোৱা লোকক আৰ্থিক সাহায্য প্ৰদানৰ বাবে “নগদবিহীন চিকিৎসা” (Cashless Treatment) আঁচনি আৰম্ভ কৰাৰ কথা ঘোষণা কৰিছে ।

এই আঁচনিৰ অধীনত চৰকাৰে ২৪ ঘণ্টাৰ ভিতৰত দুৰ্ঘটনাৰ বিষয়ে আৰক্ষীক অৱগত কৰিলে সেই ভুক্তভোগীৰ ৭ দিনৰ বাবে ১.৫ লাখ টকা পৰ্যন্ত চিকিৎসাৰ খৰচ বহন কৰিব ।

দিল্লীৰ ভাৰত মণ্ডপমত ৰাজ্য আৰু কেন্দ্ৰীয় শাসিত অঞ্চলৰ পৰিবহণ মন্ত্ৰীসকলৰ সৈতে হোৱা বৈঠকত ভাষণ দি গাডকাৰীয়ে হিট এণ্ড ৰান গোচৰত প্ৰাণ হেৰুওৱা ভুক্তভোগীৰ পৰিয়ালৰ বাবে ২ লাখ টকাৰ এককালীন সাহায্য প্ৰদানৰ কথাও প্ৰকাশ কৰে ।

“আমি কেছলেছ ট্ৰীটমেণ্ট নামৰ নতুন আঁচনি এখন আৰম্ভ কৰিছো । ২৪ ঘণ্টাৰ ভিতৰত আৰক্ষীক দুৰ্ঘটনাটোৰ বিষয়ে অৱগত কৰিলে চৰকাৰে ভুক্তভোগীৰ বাবে সাত দিন পৰ্যন্ত বা সৰ্বাধিক ১.৫ লাখ টকাৰ চিকিৎসাৰ খৰচ বহন কৰিব । ইয়াৰ উপৰিও হিট এণ্ড ৰাণ গোচৰত মৃতকৰ পৰিয়ালক ২ লাখ টকা দিয়া হ’ব ।”-গাডকাৰীয়ে কয় ।

২০২৪ চনৰ পথ দুৰ্ঘটনাৰ উদ্বেগজনক পৰিসংখ্যাৰ উদ্ধৃতি দি মন্ত্ৰীগৰাকীয়ে পথ সুৰক্ষা চৰকাৰৰ সৰ্বোচ্চ অগ্ৰাধিকাৰ হৈয়েই আছে বুলি গুৰুত্ব আৰোপ কৰে । গাডকাৰীৰ মতে যোৱা বছৰ পথ দুৰ্ঘটনাৰ বাবে ১.৮ লাখ লোকৰ মৃত্যু হৈছিল, হেলমেট পৰিধান নকৰাৰ বাবে ৩০ হাজাৰ লোকৰ মৃত্যু হোৱা বুলি কোৱা হৈছে । তেওঁ আলোকপাত কৰে যে এই দুৰ্ঘটনাসমূহত পতিত হোৱা ৬৬ শতাংশই ১৮ৰ ​​পৰা ৩৪ বছৰৰ ভিতৰৰ ব্যক্তি ।

বিদ্যালয়-মহাবিদ্যালয়ৰ সমীপত সংঘটিত হোৱা দুৰ্ঘটনাত ১০ হাজাৰ শিশুৰ মৃত্যু হোৱাৰ কথাও গডকাৰীয়ে আলোকপাত কৰে । “শিক্ষানুষ্ঠানৰ প্ৰৱেশ আৰু প্ৰস্থান দ্বাৰত অপৰ্যাপ্ত ব্যৱস্থাৰ বাবেই এই মৃত্যুৰ ঘটনা সংঘটিত হৈছে । এই সমস্যা সমাধানৰ বাবে আমি এতিয়া স্কুলীয়া ছাত্ৰ-ছাত্ৰীক পৰিবহণ কৰা অটোৰিক্সা আৰু মিনিবাছৰ বাবে নিয়ম প্ৰৱৰ্তন কৰিছো ।” কেন্দ্ৰীয় মন্ত্ৰীগৰাকীয়ে লগতে কয় ।

এই বৈঠকে সমগ্ৰ দেশৰ পথ সুৰক্ষা উন্নত কৰাৰ বাবে পৰিবহণ নীতি আৰু কৌশল সন্দৰ্ভত কেন্দ্ৰ আৰু ৰাজ্য চৰকাৰৰ মাজত সহযোগিতামূলক আলোচনাৰ মঞ্চ হিচাপে কাম কৰিছে । গাডকাৰীয়ে দুৰ্ঘটনাজনিত “কাল অধ্যায়” চিনাক্ত আৰু সমাধানৰ বাবে সামূহিক প্ৰচেষ্টাৰ আহ্বান জনায় যাতে মৃত্যুৰ হাৰ কম হয় ।