Cyclone Senyar: ঘূৰ্ণীবতাহ সেন্যাৰ বিধ্বংসী ৰূপ! কেইবাখনো ৰাজ্যত প্ৰচণ্ড বৰষুণৰ সতৰ্কবাণী…

ঘূৰ্ণীবতাহ সেন্যাৰ বিধ্বংসী ৰূপ!

ভাৰত মহাসাগৰৰ ওপৰত গঠন হোৱা নিম্ন চাপে ক্ৰমান্বয়ে শক্তিশালী হৈ ঘূৰ্ণীবতাহলৈ পৰিণত হৈছে। বতৰ বিজ্ঞান বিভাগে কয় যে, ইয়াৰ প্ৰভাৱ মালাকা জলদ্বীপ, বংগ উপসাগৰ, দক্ষিণ ভাৰত আদি অঞ্চলত পৰিছে। হাই এলাৰ্টত আছে ঘূৰ্ণীবতাহৰ গতি নিৰীক্ষণ কৰা  বিষয়াসকল। ধুমুহা তীব্ৰতৰ হোৱাৰ লগে লগে উপকূলীয় জনগোষ্ঠী আৰু মাছমৰীয়াসকলৰ বাবে সতৰ্কতা জাৰি কৰা হৈছে। চেনিয়াৰ ঘূৰ্ণীবতাহৰ প্ৰতি সঁহাৰি জনাই দক্ষিণ ভাৰতৰ ৰাজ্য তামিলনাডু, অন্ধ্ৰপ্ৰদেশ, আৰু কেৰালাৰ লগতে পূব ভাৰতৰ ৰাজ্য ওড়িশা আৰু পশ্চিম বংগৰ বাবে এক সতৰ্কবাণী জাৰি কৰা হৈছে।

বতৰ বিজ্ঞান বিভাগে কয় যে, এই চাপ তীব্ৰতৰ হৈ ঘূৰ্ণীবতাহলৈ পৰিণত হৈছে। যিয়ে আন্দামান আৰু নিকোবৰ দ্বীপপুঞ্জত প্ৰচণ্ড বৰষুণ অব্যাহত থকাৰ বিপৰীতে তামিলনাডু, কেৰালা, অন্ধ্ৰপ্ৰদেশ, পুডুচেৰী, আৰু লক্ষদ্বীপৰ উপকূলীয় আৰু দ্বীপ অঞ্চলত প্ৰচণ্ড বতাহৰ লগতে অবিৰত বৰষুণৰ সৃষ্টি কৰিছে। আন্দামান সাগৰ, মালাকা জলদ্বীপ আৰু বংগ উপসাগৰত সাগৰৰ পৰিস্থিতি ৰুক্ষ হৈয়েই আছে, যাৰ বাবে কৰ্তৃপক্ষই মাছমৰীয়া আৰু উপকূলীয় জনগোষ্ঠীৰ বাবে কঠোৰ সতৰ্কবাণী জাৰি কৰিছে।

দক্ষিণ ৰাজ্যত প্ৰচণ্ড বৰষুণৰ সতৰ্কবাণী

বতৰ বিজ্ঞান বিভাগে আন্দামান আৰু নিকোবৰ দ্বীপপুঞ্জত অহা চাৰিদিন অৰ্থাৎ ২৯ নৱেম্বৰলৈকে প্ৰচণ্ড বৰষুণৰ সতৰ্কবাণী জাৰি কৰিছে। আন্দামান আৰু নিকোবৰ দ্বীপপুঞ্জৰ লগতে তামিলনাডু, ওড়িশা, অন্ধ্ৰপ্ৰদেশতো প্ৰচণ্ড বৰষুণৰ সতৰ্কবাণী দিয়া হৈছে। এই ঘূৰ্ণীবতাহৰ ফলত অহা ৭২ ঘণ্টাত দক্ষিণৰ ৰাজ্যসমূহত প্ৰভাৱ পৰিব পাৰে। এই সময়ছোৱাত প্ৰতি ঘণ্টাত ৬৫ৰ পৰা ১০০ কিলোমিটাৰ বেগত বতাহ বলিব পৰাৰ সম্ভাৱনা আছে, যাৰ বাবে হাই এলাৰ্ট জাৰি কৰা হৈছে।

২৬ নৱেম্বৰৰ পৰা ৩০ নৱেম্বৰৰ ভিতৰত তামিলনাডুত প্ৰচণ্ড বৰষুণৰ সম্ভাৱনা। কেৰালাৰ বাবেও প্ৰচণ্ড বৰষুণৰ সতৰ্কবাণী জাৰি কৰা হৈছে। ২৯ নৱেম্বৰৰ পৰা ১ ডিচেম্বৰলৈ উপকূলীয় অন্ধ্ৰপ্ৰদেশ, য়ানাম, আৰু ৰায়ালাসীমাত বৰষুণৰ পূৰ্বাভাস দিয়াৰ বিপৰীতে আন্দামান আৰু নিকোবৰ দ্বীপপুঞ্জত ২৬ নৱেম্বৰৰ পৰা ২৯ নৱেম্বৰলৈ প্ৰচণ্ড বৰষুণৰ সম্ভাৱনা আছে।

তামিলনাডুৰ ৬ খন জিলাৰ বাবে ৰেড এলাৰ্ট

২০২৫ চনৰ ২৯ নৱেম্বৰ শনিবাৰে তিৰুভাৰুৰ, নাগাপট্টিনাম, মায়লাদুথুৰাই, কুড্ডালোৰ, ভিল্লুপুৰম, চেংগালপট্টু, পুডুচেৰী, আৰু কাৰাইকাল জিলাত দুই এটা স্থানত প্ৰচণ্ডৰ পৰা অতি প্ৰচণ্ড বৰষুণ আৰু এটা বা দুটা ঠাইত অত্যন্ত প্ৰবল বৰষুণৰ বাবে ৰেড এলাৰ্ট জাৰি কৰা হৈছে। এই অঞ্চলসমূহত বিশেষভাৱে ৭ৰ পৰা ১৫ চে.মি. পৰ্যন্ত প্ৰচণ্ড বৰষুণ হোৱাৰ সম্ভাৱনা আছে।

কল্লাকুৰিচি, আৰিয়ালুৰ, পেৰামবলুৰ, আৰু থাঞ্জাভুৰ জিলাৰ বিচ্ছিন্ন স্থানত প্ৰচণ্ডৰ পৰা অতি প্ৰচণ্ড বৰষুণ হোৱাৰ সম্ভাৱনা থাকে আৰু পুডুক্কোট্টাই, তিৰুচিৰাপল্লী, তিৰুপত্তুৰ, ভেল্লোৰ, ধৰ্মপুৰী, আৰু চেলেম জিলাৰ বিচ্ছিন্ন স্থানত প্ৰচণ্ড বৰষুণৰ সম্ভাৱনা থাকে। বতৰ বিজ্ঞান বিভাগে উল্লেখ কৰিছে যে, ইয়াত ১২ৰ পৰা ২০ চে.মি. পৰ্যন্ত বৰষুণৰ সম্ভাৱনা আছে।

উপকূলীয় তামিলনাডু, পুডুচেৰী, আৰু কৰিকালৰ বিচ্ছিন্ন স্থানত ঘণ্টাত ৩০ৰ পৰা ৪০ কিলোমিটাৰ বেগত প্ৰচণ্ড বতাহৰ সম্ভাৱনা আছে। ইয়াৰ উপৰিও ৰামনাথপুৰম, পুডুক্কোট্টাই, থাঞ্জাভুৰ, তিৰুভাৰুৰ, আৰু নগাপট্টিনাম জিলাৰ বিচ্ছিন্ন স্থানত প্ৰবল বৰষুণ হোৱাৰ সম্ভাৱনা আছে বুলিও উল্লেখ কৰা হৈছে।