পুনৰ গঢ়ি উঠিব ভাৰত-আমেৰিকাৰ বন্ধুত্ব! শীঘ্ৰে ট্ৰাম্পক সাক্ষাৎ কৰিব প্ৰধানমন্ত্ৰী মোদীয়ে…

ড’নাল্ড ট্ৰাম্প, প্ৰধানমন্ত্ৰী নৰেন্দ্ৰ মোদী

ভাৰতৰ ওপৰত ৫০ শতাংশ পৰ্যন্ত শুল্ক আৰোপ কৰাৰ কথা ঘোষণা কৰিছে ৰাষ্ট্ৰপতি ড’নাল্ড ট্ৰাম্পে। ট্ৰাম্পৰ এই সিদ্ধান্তৰ পিছৰে পৰা ভাৰত আৰু আমেৰিকাৰ মাজত উত্তেজনা সৃষ্টি হৈছে। আমেৰিকাৰ এই সিদ্ধান্তই ভাৰতৰ ব্যৱসায়ীসকলক প্ৰভাৱিত কৰিব। এই শুল্কৰ উত্তেজনাৰ মাজতে অহা মাহত ৰাষ্ট্ৰপতি ড’নাল্ড ট্ৰাম্প আৰু প্ৰধানমন্ত্ৰী নৰেন্দ্ৰ মোদীৰ বৈঠক অনুষ্ঠিত হ’ব পাৰে।

ৰাষ্ট্ৰসংঘৰ সাধাৰণ পৰিষদত ভাষণ দিবলৈ আমেৰিকালৈ যাব পাৰে প্ৰধানমন্ত্ৰী মোদীয়ে। ইউএনজিএৰ অধ্যক্ষ তালিকাত ভাৰতৰ প্ৰধানমন্ত্ৰীয়ে ভাষণ দিয়াৰ সময় ২৬ ছেপ্টেম্বৰত নিৰ্ধাৰণ কৰা হৈছে। অৱশ্যে এয়া সম্প্ৰতি সম্ভাৱ্য সিদ্ধান্ত, চূড়ান্ত সিদ্ধান্ত এতিয়াও লোৱা হোৱা নাই।

৯ ছেপ্টেম্বৰৰ পৰা আৰম্ভ হ’ব ইউএনজিএৰ ৮০ সংখ্যক অধিৱেশন।এই সাধাৰণ পৰিষদৰ অংশ হ’বলৈ  আমেৰিকালৈ যাব পাৰে প্ৰধানমন্ত্ৰী নৰেন্দ্ৰ মোদী। উচ্চ পৰ্যায়ৰ সাধাৰণ বিতৰ্ক ২৩ৰ পৰা ২৯ ছেপ্টেম্বৰলৈ চলিব, য’ত পৰম্পৰাগতভাৱে ব্ৰাজিলে অধিৱেশনৰ প্ৰথম বক্তা হিচাপে পৰিগণিত হ’ব, তাৰ পিছত থাকিব আমেৰিকা। ২৩ ছেপ্টেম্বৰত সাধাৰণ পৰিষদত ভাষণ দিব ৰাষ্ট্ৰপতি ড’নাল্ড ট্ৰাম্পে। ভাৰতৰ লগতে ইজৰাইল, চীন, পাকিস্তান আৰু বাংলাদেশৰ চৰকাৰৰ মুৰব্বীসকলেও ২৬ ছেপ্টেম্বৰত ৰাষ্ট্ৰসংঘৰ সাধাৰণ পৰিষদৰ সাধাৰণ বিতৰ্কত ভাষণ দিব।

প্ৰধানমন্ত্ৰী আৰু ট্ৰাম্পৰ বৈঠক

ইয়াৰ পূৰ্বে আমেৰিকাই ভাৰতৰ ওপৰত ২৫ শতাংশ শুল্ক আৰোপ কৰিছিল। ইয়াৰ পিছতে ৰাছিয়াৰ সৈতে ভাৰতৰ তেল বাণিজ্যৰ বাবে দেশখনে অতিৰিক্ত ২৫ শতাংশ শুল্ক বৃদ্ধি কৰাৰ কথা ঘোষণা কৰে। যাৰ বাবে এতিয়া দেশৰ ওপৰত ৫০ শতাংশ শুল্ক আৰোপ কৰা হৈছে। এই শুল্কই দুয়োখন দেশৰ সম্পৰ্কত উত্তেজনাৰ সৃষ্টি কৰিছে। ইফালে আমেৰিকাৰ সৈতে হোৱা উত্তেজনাৰ পৰিপ্ৰেক্ষিতত বিশ্বাস কৰা হৈছে যে প্ৰধানমন্ত্ৰীৰ এই ভ্ৰমণ ৰাষ্ট্ৰপতি ট্ৰাম্পৰ সৈতে বৈঠকৰ ভিত্তি হ’ব পাৰে। বহু কূটনৈতিক বিশেষজ্ঞৰ মতে মোদী আৰু ট্ৰাম্পৰ মুখামুখি বৈঠকে সম্পৰ্কক পুনৰ শুদ্ধ পথলৈ আনিব পাৰে।

ইয়াৰ পূৰ্বে ফেব্ৰুৱাৰী মাহত প্ৰধানমন্ত্ৰী মোদীয়ে আমেৰিকা ভ্ৰমণ কৰিছিল। য’ত তেওঁ ৰাষ্ট্ৰপতি ট্ৰাম্পৰ সৈতে দ্বিপাক্ষিক আলোচনাত মিলিত হৈছিল মোদী। বৈঠকৰ অন্তত জাৰি কৰা এক যৌথ বিবৃতিত মোডী আৰু ট্ৰাম্পে ২০২৫ চনৰ ভিতৰত পাৰস্পৰিকভাৱে লাভজনক, বহুখণ্ডীয় দ্বিপাক্ষিক বাণিজ্য চুক্তিৰ প্ৰথম পৰ্যায়ৰ আলোচনাৰ পৰিকল্পনা ঘোষণা কৰে।

শুল্ক সন্দৰ্ভত কি ক’লে ভাৰতে?

আমেৰিকাই আৰোপ কৰা এই শুল্কসমূহৰ প্ৰতিক্ৰিয়া প্ৰকাশ কৰি ভাৰতৰ বৈদেশিক মন্ত্ৰালয়ে ভাৰতক লক্ষ্য কৰি লোৱাটো অন্যায় হিচাপে অভিহিত  কৰিছে। যিকোনো বৃহৎ অৰ্থনীতিৰ দৰে ভাৰতেও নিজৰ জাতীয় স্বাৰ্থ আৰু অৰ্থনৈতিক নিৰাপত্তা ৰক্ষাৰ বাবে প্ৰয়োজনীয় সকলো ব্যৱস্থা গ্ৰহণ কৰিব।