৩২ খন বিস্ফোৰক ভৰ্তি বাহনেৰে কূটাঘাতৰ ভয়ংকৰ পৰিকল্পনা! কিদৰে ৰচা হৈছিল বিস্ফোৰণৰ মাষ্টাৰপ্লেন?

দিল্লী বিস্ফোৰণৰ ছবি

দিল্লীৰ লালকিল্লাৰ ওচৰত ১০ জন লোকৰ প্ৰাণ লোৱা গাড়ী বিস্ফোৰণৰ সৈতে সন্ত্ৰাসবাদীৰ ষড়যন্ত্ৰ জড়িত বুলি চোৰাংচোৱা সংস্থাসমূহে প্ৰকাশ কৰিছে। একাধিক চহৰত সমন্বিত আক্ৰমণৰ বাবে ৩২খন বাহনত বিস্ফোৰক সামগ্ৰী স্থাপন কৰাৰ পৰিকল্পনা প্ৰকাশ পাইছে। সংবাদ সংস্থা এ এন আয়ে প্ৰকাশ কৰিছে এই তথ্য।

চোৰাংচোৱা সূত্ৰৰ মতে, অভিযুক্তই ইতিমধ্যে দুখন বাহন— এখন হুণ্ডাই আই২০ আৰু এখন ফ’ৰ্ড ইকোস্প’ৰ্ট — আক্ৰমণত সম্ভাৱ্য ব্যৱহাৰৰ বাবে সংশোধন কৰিবলৈ আৰম্ভ কৰা বুলি ধৰা পৰাৰ পিছতে চলি থকা তদন্তই অধিক গতি লাভ কৰিছে। এতিয়া বিষয়াসকলে তদন্ত কৰি আছে যে ধাৰাবাহিক বিস্ফোৰণ সংঘটিত কৰাৰ বহল পৰিকল্পনাৰ অংশ হিচাপে আন গাড়ী প্ৰস্তুত কৰা হৈছিল নেকি।

চোৰাংচোৱাৰ সূত্ৰই এএনআইক জনোৱা মতে, “আই২০ আৰু ইকোস্প’ৰ্টৰ পিছত পোহৰলৈ আহিল যে আৰু ৩২খন পুৰণি বাহন সাজু কৰাৰ প্ৰস্তুতি চলি আছে যিবোৰত বিস্ফোৰক সংযুক্ত হ’ব পাৰে।”

তদন্তকাৰীয়ে জনোৱা মতে, প্ৰায় আঠজন সন্দেহযুক্ত লোকে চাৰিটা স্থানত সমন্বিত বিস্ফোৰণ সংঘটিত কৰিবলৈ সাজু হৈছিল বুলি অভিযোগ উঠিছে, দুজনকৈ লোকে একোখনকৈ নিৰ্দিষ্ট চহৰত নিযুক্ত কৰি কাম কৰিছিল। প্ৰাথমিক তথ্য অনুসৰি প্ৰতিটো গোটে একেলগে আক্ৰমণৰ বাবে একাধিক ইম্প্ৰভাইজড বিস্ফোৰক যন্ত্ৰ (আই ই ডি) লৈ যোৱাৰ কথা আছিল।

তদন্তৰ অধীনত থকাসকলৰ ভিতৰত ইতিমধ্যে পূৰ্বৰ সন্ত্ৰাসবাদী গোচৰৰ সৈতে জড়িত ব্যক্তিও আছে, য’ত আছে লালকিল্লা বিস্ফোৰণৰ অভিযুক্ত ডাঃ মুজাম্মিল, ডাঃ আদিল, ডাঃ উমৰ আৰু ডাঃ শ্বাহীন।

সূত্ৰসমূহে জনোৱা মতে, অভিযুক্তসকলে সামূহিকভাৱে প্ৰায় ২০ লাখ টকা সংগ্ৰহ কৰিছিল, যিটো ওমৰক কাৰ্যকৰী খৰচৰ বাবে গতাই দিয়া হৈছিল। এই ধনেৰে গুৰুগ্ৰাম, নুহ আৰু ওচৰৰ অঞ্চলৰ পৰা ২০ কুইণ্টলতকৈ অধিক এন পি কে সাৰ — নাইট্ৰজেন, ফছফৰাছ আৰু পটাছিয়ামৰ মিশ্ৰণ — ক্ৰয় কৰা বুলি অভিযোগ উঠিছে, যাৰ মূল্য প্ৰায় ৩ লাখ টকা।

তদন্তকাৰীয়ে এইটোও জানিব পাৰিছে যে ওমৰে ​​নিৰাপদে কাৰ্যকলাপৰ সমন্বয় সাধন কৰিবলৈ দুজনৰ পৰা চাৰিজন সদস্যৰে গঠিত এটা ব্যক্তিগত চিগনেল গ্ৰুপ গঠন কৰিছিল।

তদন্তকাৰী সংস্থাসমূহৰ মতে, সন্ত্ৰাসবাদী সহযোগীসকলৰ সৈতে যোগাযোগ বজাই ৰখাৰ পিছত ২০২১ চনৰ পৰা ২০২২ চনৰ ভিতৰত আইছিছৰ এটা শাখা আনছাৰ গাজৱাত-উল-হিন্দৰ প্ৰতি ডাঃ মুজাম্মিল প্ৰৱল আসক্ত হৈ পৰিছিল। তেওঁক নেটৱৰ্কৰ সৈতে পৰিচয় কৰাই দিছিল ইৰফান ওৰফে মৌলৱীয়ে। ২০২৩ আৰু ২০২৪ চনত উদ্ধাৰ হোৱা অস্ত্ৰ-শস্ত্ৰসমূহ এই মডিউলে এটা স্বতন্ত্ৰ সন্ত্ৰাসবাদী সংগঠন গঠনৰ প্ৰচেষ্টাৰ অংশ হিচাপে ক্ৰয় কৰা বুলি অনুমান কৰা হৈছে।

কৰ্তৃপক্ষই জনোৱা মতে, গোটটোৱে অদূৰ ভৱিষ্যতে আক্ৰমণ সংঘটিত কৰাৰ বাবে প্ৰস্তুতি চলাইছিল আৰু এতিয়া ইয়াৰ লগত জড়িত বহল নেটৱৰ্ক চিনাক্তকৰণৰ ওপৰত তদন্ত কেন্দ্ৰীভূত হৈছে।

বুধবাৰে ফৰিদাবাদ আৰক্ষীয়ে দিল্লী বিস্ফোৰণ গোচৰৰ প্ৰধান অভিযুক্ত ডাঃ ওমৰ উন নবীৰ সৈতে সম্পৰ্ক থকা সন্দেহযুক্ত ৰঙা ৰঙৰ ইকোস্প’ৰ্ট (পঞ্জীয়ন নম্বৰ ডি এল ১০ চি কে ০৪৫৮) জব্দ কৰে। খান্দাৱলী গাঁৱৰ সমীপতে গাড়ীখন ৰখাই থোৱা অৱস্থাত উদ্ধাৰ হয়।

দিল্লী আৰক্ষীয়ে বৃহস্পতিবাৰে নিশ্চিত কৰে যে বিস্ফোৰণ সংঘটিত কৰা ব্যক্তিজন ডাঃ ওমৰ। ফৰেনছিক ডি এন এ পৰীক্ষাত তেওঁৰ জৈৱিক নমুনাৰ সৈতে তেওঁৰ মাতৃৰ নমুনাৰ মিল থকাৰ পিছতে এই বিস্ফোৰণ সংঘটিত কৰা ব্যক্তিজন ডাঃ ওমৰ বুলি নিশ্চিত হয় সংস্থাসমূহ।

এএনআইৰ সৈতে হোৱা কথা-বতৰাত আৰক্ষীৰ জ্যেষ্ঠ বিষয়াসকলে কয় যে কেইবাদিনো বিশদ ফৰেনছিক বিশ্লেষণৰ পিছত এই নিশ্চিতকৰণ কৰা হৈছে। এজন জ্যেষ্ঠ আৰক্ষী বিষয়াই কয়, “বিস্ফোৰণৰ পিছত ওমৰৰ ভৰিখন গাড়ীৰ ষ্টিয়াৰিং আৰু এক্সিলেটৰৰ মাজত আবদ্ধ হৈ থকা দেখা গৈছিল, যাৰ পৰা অনুমান কৰিব পাৰি যে গাড়ীখন বিস্ফোৰণ ঘটোতে তেওঁ ষ্টিয়াৰিঙত আছিল।”

বিষয়াগৰাকীয়ে লগতে কয়, “ডি এন এ প্ৰফাইলিঙে মৃত ব্যক্তিজনক ডাঃ ওমৰ উন নবী বুলি নিৰ্ণায়কভাৱে চিনাক্ত কৰিছে। তেওঁৰ নমুনাটো মাকৰ ডি এন এৰ সৈতে মিলাই সম্পৰ্ক স্থাপন কৰা হৈছিল।” বুধবাৰে ডাঃ ওমৰৰ মাতৃ আৰু ভাতৃৰ ডি এন এ নমুনা সংগ্ৰহ কৰি এইমছৰ ফৰেনছিক লেবৰেটৰীলৈ প্ৰেৰণ কৰা হয়, য’ত দিল্লীৰ লোক নায়ক চিকিৎসালয়ত ৰখা মৃতদেহৰ অৱশিষ্টৰ সৈতে মিলাই চোৱা হয়।