Hindi Diwas 2025: আজি হিন্দী দিৱস, হিন্দী ভাষাৰ জন্ম কেনেকৈ হৈছিল?

আজি হিন্দী দিৱস

Hindi Diwas 2025: প্ৰতি বছৰৰ ছেপ্টেম্বৰ মাহৰ ১৪ তাৰিখে ভাৰতত পালন কৰা হয়। সাধাৰণতে এই দিৱস কেন্দ্ৰীয় চৰকাৰৰ কাৰ্যালয়, ফাৰ্ম, বিদ্যালয় আৰু অন্যান্য প্ৰতিষ্ঠানত এই দিৱস পালন কৰা হয়। হিন্দী ভাষাৰ চৰ্চাৰে ইয়াৰ উৎকৰ্ষ সাধন কৰা এই দিৱসৰ মূল উদ্দেশ্য। বিভিন্ন অনুষ্ঠান তথা প্ৰতিযোগিতাৰে এই দিৱস পালন কৰা হয়।

হিন্দী কেৱল এটা ভাষা নহয়, ই ভাৰতৰ আত্মা আৰু সাংস্কৃতিক স্পন্দন। ইয়াৰ উৎপত্তি, বিকাশ আৰু বৰ্তমানৰ ৰূপ এক দীঘলীয়া ঐতিহাসিক যাত্ৰাৰ ফল। হিন্দী দিৱসে (১৪ ছেপ্টেম্বৰ) হিন্দী ভাষাৰ গুৰুত্বৰ কথা সোঁৱৰাই দিয়াই নহয়, এই কথাও সোঁৱৰাই দিয়ে যে ই বিশ্বৰ আটাইতকৈ পুৰণি আৰু চহকী ভাষাৰ ধাৰাটোৰ আধুনিক ৰূপ। যিয়ে কোটি কোটি মানুহক সংযোগ স্থাপনৰ কাম কৰি আহিছে। হিন্দী কিমান পুৰণি, কেনেকৈ এই ভাষাৰ জন্ম হৈছিল, হিন্দী কেনেকৈ বিশ্বব্যাপী বিয়পি পৰিল আৰু কোন কবি-সাহিত্যিকে ইয়াক সমৃদ্ধ কৰিলে, জানি লওক।

হিন্দীৰ উৎপত্তি দিল্লীৰ খৰিবুলি ভাষাৰ সৈতে আৰবী, পাৰ্চী আৰু তুৰ্কীৰ সংমিশ্ৰণত হৈছিল। মুছলমান শাসন উত্তৰ ভাৰতলৈ বিয়পিবলৈ আৰম্ভ কৰাৰ লগে লগে পাৰ্চী শব্দবোৰ স্থানীয় ভাষাত প্ৰৱেশ কৰিবলৈ আৰম্ভ কৰে। হিন্দী ভাষাও সেই সময়ত খৰিবুলিৰ পৰা উদ্ভৱ হৈছিল।

সময়ৰ পৰিপ্ৰেক্ষিতত, উৰ্দুক আজি এক সুকীয়া ভাষা হিচাপে ঘোষণা কৰা হৈছে, কিন্তু প্ৰধান উৰ্দু লেখকসকলে উনবিংশ শতিকাৰ আৰম্ভণিলৈকে তেওঁলোকৰ ভাষাক হিন্দী বা হিন্দৱী বুলি উল্লেখ কৰি আহিছে।

হিন্দী ভাষা ভাৰতবৰ্ষৰ এটা চৰকাৰী ভাষা। ভাৰতৰ উপৰি নেপাল, মৰিছাছ আৰু ফিজিত এই ভাষা প্ৰচলিত। আমেৰিকা যুক্তৰাষ্ট্ৰ, চৌদি আৰৱ, মালয়েছিয়া, চিংগাপুৰ, সংযুক্ত আৰব আমিৰাত, অষ্ট্ৰেলিয়া, ম্যানমাৰ, পাকিস্তান, আফগানিস্তান, দক্ষিণ আফ্ৰিকা, উগাণ্ডা, নিউজিলেণ্ড, কানাডাত ভাষিক গোষ্ঠীৰ মাজত এই ভাষাৰ প্ৰচলন আছে।

প্ৰাচীন হিন্দী

প্ৰাচীন হিন্দী হৈছে বৰ্তমানৰ হিন্দী ভাষাৰ খৰিবুলি উপভাষাৰ প্ৰাৰম্ভিক ৰূপ। ইয়াক আধুনিক মান্য হিন্দী ভাষাৰ পূৰ্বসূৰী বুলি গণ্য কৰা হয়। এই ভাষা বৰ্তমানৰ হিন্দী বেল্টৰ, বিশেষকৈ দিল্লী আৰু ইয়াৰ কাষৰিয়া অঞ্চলৰ লোকলকলৰ মাজত প্ৰায় ১৩-১৪ শতিকাৰ সময়ত প্ৰচলিত আছিল। কবি আমিৰ খশ্ৰুৰ লেখনি, কবি তথা সন্ত নামদেৱৰ লেখনি, তথা শিখ ভাষাৰ ধৰ্মপুথি আদি গ্ৰন্থত চুফি সন্ত বাবা ফাৰিদৰ লিখা কিছু স্তৱকত এই ভাষাৰ ব্যৱহাৰ দেখা যায়। কবীৰৰ লেখনিতো খৰিবুলিৰ সদৃশ ভাষা ব্যৱহাৰ দেখা যায়। এই প্ৰাচীন হিন্দী ভাষাৰ পৰাই বৰ্তমানৰ হিন্দুস্থানী ভাষাৰ উদ্ভব হয়।

ইতিহাস

হিন্দী বিশ্বৰ প্ৰায় ২৫.৮ কোটি মানুহৰ মাতৃভাষা তথা বিশ্বৰ সকলোতকৈ বেছি ব্যৱহাৰ হোৱা ভাষা সমূহৰ ভিতৰত চতুৰ্থ। ১৯৪৯ চনৰ ১৪ ছেপ্টেম্বৰ তাৰিখে ভাৰতৰ সংবিধান প্ৰস্তাৱনা সমিতিয়ে দেৱনাগৰী লিপিৰে লিখা হিন্দীক ভাৰত চৰকাৰৰ চৰকাৰী ভাষা ৰূপে স্বীকৃতি দিয়ে। ১৯৫০ চনৰ ২৬ জানুৱাৰী তাৰিখে সংবিধান গ্ৰহণ কৰাৰ লগে লগে হিন্দী ভাৰত চৰকাৰৰ অন্যতম চৰকাৰী ভাষা ৰূপে স্বীকৃতি লাভ কৰিলে। সংবিধানৰ ৩৪৩ নং দফাত দেৱনাগেৰী লিপিৰে লিখা হিন্দী ভাৰত চৰকাৰৰ চৰকাৰী ভাষা ৰূপে উল্লেখ আছে। সেয়ে ১৪ ছেপ্টেম্বৰ দিনটো গোটেই ভাৰতত হিন্দী দিৱস ৰূপে পালন কৰা হয়। উল্লেখযোগ্য যে বৰ্তমান ভাৰতত ২২টা সংবিধান স্বীকৃত ভাষা আছে। তাৰে ভিতৰত হিন্দী আৰু ইংৰাজী ভাৰত চৰকাৰৰ চৰকাৰী ভাষা। বাকী ভাষা সমূহ আঞ্চলিক চৰকাৰী ভাষা ৰূপে ব্যৱহাৰ হয়।