ডিজিটেল ইণ্ডিয়াৰ নতুন পৰিচয় ই-পাছপ’ৰ্ট, জানি লওক সবিশেষ

ভাৰতত ভ্ৰমণৰ নথি-পত্ৰ আধুনিকীকৰণ আৰু সুৰক্ষিত কৰাৰ দিশত এক বৃহৎ পদক্ষেপ হিচাপে বৈদেশিক পৰিক্ৰমা মন্ত্ৰালয়ে ই-পাছপ’ৰ্ট সেৱা আৰম্ভ কৰিছে। ২০২৪ চনৰ এপ্ৰিল মাহত পাইলট প্ৰজেক্ট হিচাপে আৰম্ভ হোৱা এই আঁচনিখন এতিয়া ক্ৰমান্বয়ে সমগ্ৰ দেশৰ পাছপ’ৰ্ট সেৱা কেন্দ্ৰলৈ সম্প্ৰসাৰিত হৈছে। ২০২৫ চনৰ জুন মাহৰ পৰা দেশজুৰি আনুষ্ঠানিকভাৱে ইয়াক কাৰ্যকৰী কৰা হৈছে।

ই-পাছপ’ৰ্ট কি?

ই-পাছপ’ৰ্টটো দেখাত হুবহু ভাৰতীয় পৰম্পৰাগত পাছপ’ৰ্টৰ দৰেই যদিও ইয়াত আধুনিক প্ৰযুক্তিৰ সন্নিবিষ্ট কৰা হৈছে। ইয়াৰ কভাৰত এটা আৰ এফ আই ডি চিপ আৰু এন্টেনা থাকে, য’ত ধাৰণকাৰীৰ বায়’মেট্ৰিক তথ্য, যেনে আঙুলিৰ ছাপ আৰু ডিজিটেল ফটো সংৰক্ষণ কৰা হয়। ইয়াৰ ফলত পাছপ’ৰ্ট জাল কৰাটো কাৰ্যতঃ অসম্ভৱ হৈ পৰিছে।

ইয়াৰ কভাৰত “পাছপ’ৰ্ট” শব্দটোৰ তলত সোণালী চিন আছে, যাৰ ফলত ইয়াক সহজে চিনাক্ত কৰিব পৰা যায়। আটাইতকৈ গুৰুত্বপূৰ্ণ কথাটো হ’ল এই পাছপ’ৰ্টখন আন্তঃৰাষ্ট্ৰীয় আইচিএঅ’ৰ মানদণ্ড মানি চলে, যাৰ ফলত ইয়াক বিশ্বজুৰি স্বীকৃতি দিয়া হৈছে।

ক’ৰ পৰা পাম?

প্ৰথম অৱস্থাত এই সুবিধা কেৱল চেন্নাই, হায়দৰাবাদ, ভুৱনেশ্বৰ, চুৰাট, নাগপুৰ, গোৱা, জম্মু, শিমলা, ৰায়পুৰ, অমৃতসৰ, জয়পুৰ, ৰাঁচী আৰু দিল্লীৰ পাছপ’ৰ্ট সেৱা কেন্দ্ৰতহে উপলব্ধ আছিল। অৱশ্যে পাছপ’ৰ্ট সেৱা প্ৰগ্ৰেম ২.০ৰ অধীনত এতিয়া ইয়াক দেশজুৰি কাৰ্যকৰী কৰা হৈছে। যদিও এই সুবিধা একেলগে সকলো কেন্দ্ৰতে উপলব্ধ নহ’ব, নাগৰিকে আবেদন কৰিব পাৰিব। বৰ্তমান বৈধ নিয়মীয়া পাছপ’ৰ্ট থকাসকলে তৎকালীনভাৱে সলনি কৰাৰ প্ৰয়োজন নাই।

কোনে আবেদন কৰিব পাৰে?

ই-পাছপ’ৰ্টৰ বাবে যোগ্যতা নিয়মীয়া পাছপ’ৰ্টৰ সৈতে একে। যিকোনো ভাৰতীয় নাগৰিকে আবেদন কৰিব পাৰিব। প্ৰয়োজনীয় নথি-পত্ৰ একেই: পৰিচয় পত্ৰ, ঠিকনাৰ প্ৰমাণ, আৰু জন্ম তাৰিখৰ প্ৰমাণ। ইয়াৰ উপৰিও পাছপ’ৰ্ট সেৱা কেন্দ্ৰত বায়’মেট্ৰিক পৰীক্ষণ বাধ্যতামূলক হ’ব।

আবেদন প্ৰক্ৰিয়া

• পাছপ’ৰ্ট সেৱা পৰ্টেল চাওক আৰু পঞ্জীয়ন/লগইন কৰক।
• অনলাইন আবেদন পত্ৰ পূৰণ কৰি ওচৰৰ পাছপ’ৰ্ট সেৱা কেন্দ্ৰ নিৰ্বাচন কৰক।
• নিৰ্ধাৰিত মাচুল অনলাইনত পৰিশোধ কৰক আৰু এপইণ্টমেণ্ট বুকিং কৰক।
• প্ৰয়োজনীয় নথি-পত্ৰ লৈ নিৰ্ধাৰিত তাৰিখত কেন্দ্ৰত উপস্থিত হব।
• ভেৰিফিকেচন আৰু বায়’মেট্ৰিক কেপচাৰৰ পিছত ই-পাছপ’ৰ্ট জাৰি কৰা হ’ব।

ইয়াৰ লাভ কি হ’ব?

• চৰকাৰৰ তথ্য অনুসৰি ই-পাছপ’ৰ্টে যাত্ৰীসকলক কেইবাটাও সুবিধা প্ৰদান কৰিব।
• সুৰক্ষা: চিপত সংৰক্ষিত তথ্য সলনি বা জাল কৰাটো অত্যন্ত কঠিন হ’ব।
• দ্ৰুত পৰীক্ষা: বিমানবন্দৰত অনুপ্ৰৱেশ প্ৰক্ৰিয়া দ্ৰুত হ’ব, বিশেষকৈ স্বয়ংক্ৰিয় ই-গেট থকা দেশসমূহত।
• আন্তঃৰাষ্ট্ৰীয় স্বীকৃতি: ভাৰতৰ পাছপ’ৰ্ট বিশ্বৰ মানদণ্ড অনুসৰি হ’ব।
• পৰিচয় সুৰক্ষা: ইলেক্ট্ৰনিক আৰু বায়’মেট্ৰিক বৈশিষ্ট্যসমূহ একত্ৰিত হৈ নাগৰিকসকলক পৰিচয় চুৰিৰ পৰা ৰক্ষা কৰিব।