অসমত সন্ত্ৰাসবাদৰ মডিউল স্থাপনৰ অপৰাধত যাৱজ্জীৱন কাৰাদণ্ড কামৰুজ জামানক

প্ৰতীকী ছবি

গুৱাহাটীৰ ৰাষ্ট্ৰীয় অনুসন্ধান সংস্থাৰ বিশেষ আদালতে সন্ত্ৰাসবাদী কাৰ্যকলাপ চলোৱাৰ উদ্দেশ্যেৰে অসমত পাকিস্তান ভিত্তিক সন্ত্ৰাসবাদী সংগঠনৰ মডিউল স্থাপন কৰাৰ অপৰাধত এজন লোকক যাৱজ্জীৱন কাৰাদণ্ডৰ শাস্তি প্ৰদান কৰিছে বুলি ৩১ ডিচেম্বৰত বিষয়াসকলে প্ৰকাশ কৰিছে।

এন আই এৰ মতে, ২০১৭–১৮ চনৰ ভিতৰত ৰাজ্যখনত নিষিদ্ধ হিজবুল মুজাহিদীনৰ (এইচ এম) মডিউল স্থাপন কৰাৰ বাবে সন্ত্ৰাসবাদ বিৰোধী আইনৰ বিভিন্ন বিধানৰ অধীনত দোষী সাব্যস্ত কৰা হৈছিল কামৰুজ জামানক, যাক কামৰুদ্দিন বুলিও জনা যায়। আদালতে তেওঁক তিনিটা পৃথক শাস্তি প্ৰদান কৰে, য’ত আছে সৰ্বোচ্চ আজীৱন কাৰাদণ্ড, যিটো একেলগে চলিব।

কাৰাদণ্ডৰ উপৰিও আদালতে জামানক ৫,০০০ টকা জৰিমনা বিহে, লগতে তিনিটা গোচৰৰ প্ৰতিটো ক্ষেত্ৰতে ধন পৰিশোধ নকৰাৰ বাবদ তিনি মাহৰ অতিৰিক্ত কাৰাদণ্ড বিহা হয়।

জনসাধাৰণৰ মাজত সন্ত্ৰাস বিয়পাই অঞ্চলটোৰ শান্তি আৰু নিৰাপত্তা অস্থিৰ কৰি তোলাৰ লক্ষ্যৰে এই ষড়যন্ত্ৰ ৰচনা কৰা বুলি উল্লেখ কৰে এন আই এয়ে। তদন্তৰ সময়ত সংস্থাটোৱে জানিব পাৰিছে যে জামানে সন্ত্ৰাসবাদী সংগঠনটোৰ কাৰ্যকলাপ আগুৱাই নিবলৈ শ্বাহনেৱাজ আলম, ছাইদুল আলম, ওমৰ ফাৰুক, আৰু আন কেইজনমানক নিযুক্তি দিছিল।

সন্ত্ৰাসবাদ বিৰোধী সংস্থাটোৱে ২০১৯ চনৰ মাৰ্চ মাহত জামানকে ধৰি পাঁচজন অভিযুক্তৰ বিৰুদ্ধে অভিযোগনামা দাখিল কৰিছিল। বিচাৰৰ সময়ত অভিযুক্তৰ তিনিজন — শ্বাহনেৱাজ আলম, ছাইদুল আলম, আৰু ওমৰ ফাৰুকক দোষ স্বীকাৰ কৰাৰ পিছত দোষী সাব্যস্ত কৰা হয়। বিচাৰ চলি থকাৰ সময়ত অসুস্থতাৰ বাবে পঞ্চম অভিযুক্ত জয়নাল উদ্দিনৰ মৃত্যু হোৱা বুলি এন আই এয়ে জানিবলৈ দিয়ে।

এন আই এয়ে কয় যে দোষী সাব্যস্ত হোৱা আৰু শাস্তিৰ দ্বাৰা দেশত সন্ত্ৰাসবাদী নেটৱৰ্ক ভাঙি পেলোৱা আৰু উগ্ৰপন্থী কাৰ্যকলাপ ৰোধ কৰাৰ বাবে তেওঁলোকৰ অবিৰত প্ৰচেষ্টাক আলোকপাত কৰা হৈছে।