চাকৰি নিয়মীয়াকৰণৰ দাবীত প্ৰতিবাদ! ১০৮ সেৱাৰ পৰা অব্যাহতি প্ৰায় ৫০০ কৰ্মচাৰীক…

১০৮

প্ৰতিবাদৰ মাজতেই ১০৮ মৃত্যুঞ্জয় সেৱাৰ শ শ কৰ্মচাৰীক চাকৰিৰ পৰা অব্যাহতি। GVKৰ নিৰ্দেশনাৰ পাছতেই এতিয়া ১০৮ ৰ কৰ্মচাৰীসকলৰ মাজত হাহাকাৰ লাগিছে। জানিব পৰা মতে, প্ৰায় ৫০০ ৰো অধিক কৰ্মচাৰীক চাকৰিৰ পৰা অব্যাহতি দিয়া হৈছে। এইসকলৰ ভিতৰত প্ৰতিবাদ কৰা কৰ্মচাৰীও আছে। শীঘ্ৰেই এই পদৰ বাবে নতুন নিযুক্তি দিয়া হ’ব বুলি জানিব পৰা গৈছে।

যোৱা ১ ডিচেম্বৰৰ পৰা ৰাজ্যত প্ৰায় অচল হৈ আছে ১০৮ মৃত্যুঞ্জয় সেৱা। বিভিন্ন দাবীত শ শ কৰ্মচাৰীয়ে গুৱাহাটীৰ চচলৰ ধৰ্ণাস্থলীত প্ৰতিবাদ অব্যাহত ৰাখিছিল। কিন্তু তাৰ মাজতে ইয়াৰে শ শ কৰ্মচাৰীক এতিয়া চাকৰিৰ পৰা বৰ্খাস্ত কৰা হৈছে। বছৰ বছৰ চাকৰি কৰি এতিয়া নিবনুৱা হৈ এই কৰ্মচাৰীসকলৰ মূৰত সৰগ ভাগি পৰিছে।

জানিব পৰা মতে, প্ৰতিবাদকাৰীসকলে প্ৰায় ৩০০০ কৰ্মচাৰীৰ চাকৰি নিয়মীয়াকৰণ, সম-কাম সম-মৰ্যদা, অভাৰ টাইমৰ ভাট্টা, উপযুক্ত মজুৰিকে ধৰি বিভিন্ন দাবী উত্থাপন কৰিছিল। প্ৰতিবাদকাৰীসকলে কৈছিল যে, ১৭ বছৰ ধৰি চাকৰি কৰাৰ পাছতো তেওঁলোকৰ কোনো নিৰাপত্তা নাই। ১০৮ সেৱাক জৰুৰীকালীন সেৱাত অন্তৰ্ভুক্ত কৰিছিল। কিন্তু আন জৰুৰীকালীন সেৱাৰ দৰে ১০৮ ৰ কৰ্মচাৰীসকলে কোনো সুবিধা লাভ নকৰে।

প্ৰতিবাদকাৰীসকলে চৰকাৰৰ সৈতে আলোচনা বিচাৰিছিল। ইমানেই নহয়, তেওঁলোকৰ দাবী পূৰণ নহলে দিছপুৰ ঘেৰাওৰ দৰে কাৰ্যসূচী ৰূপায়ন কৰিব বুলিও হুংকাৰ দিছিল। চচলত চলি থকা এই প্ৰতিবাদৰ মাজতে  এতিয়া শ শ কৰ্মচাৰীক চাকৰিৰ পৰা বৰ্খাস্ত কৰা হৈছে। এই ঘটনাই এতিয়া ১০৮ মৃত্যুঞ্জয় সেৱাৰ কৰ্মচাৰীসকলৰ মাজত হাহাকাৰময় পৰিস্থিতিৰ সৃষ্টি কৰিছে।

অন্য খবৰ পঢ়কঃ ৰাজ্যত নতুন চাকৰিৰ পৰা ৰেহাই মূল্যত ৰন্ধন গেছলৈ, দিনটোৰ খবৰ…