অসমে লাভ কৰিব নতুন IIM, লোকসভাত উত্থাপন হ’ল বিধেয়ক…
কেন্দ্ৰই সোমবাৰে লোকসভাত দ্য ইণ্ডিয়ান ইনষ্টিটিউটছ অৱ মেনেজমেণ্ট (সংশোধনী) বিধেয়ক ২০২৫ উত্থাপন কৰে। এই বিধেয়কখন উত্থাপন কৰে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে। IIM গুৱাহাটী হ’ব দেশৰ ২২ সংখ্যক এনে প্ৰতিষ্ঠান।
ৰাজ্যবাসীৰ বাবে ভাল খবৰ। অসমে লাভ কৰিব নতুন IIM । IIM গুৱাহাটীক ভাৰতীয় ইনষ্টিটিউট অৱ মেনেজমেণ্ট এক্টৰ সূচীত অন্তৰ্ভুক্ত কৰি ৰাষ্ট্ৰীয় গুৰুত্বপূৰ্ণ প্ৰতিষ্ঠান হিচাপে গঢ়ি তোলাৰ বিধেয়ক সোমবাৰে লোকসভাত উত্থাপন কৰা হয়। সোমবাৰে লোকসভাত দ্য ইণ্ডিয়ান ইনষ্টিটিউটছ অৱ মেনেজমেণ্ট (সংশোধনী) বিধেয়ক ২০২৫ উত্থাপন কৰে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে। IIM গুৱাহাটী হ’ব দেশৰ ২২ সংখ্যক এনে প্ৰতিষ্ঠান।
আইনখনৰ খচৰা অনুসৰি, কেন্দ্ৰ, ৰাজ্য চৰকাৰ আৰু সংযুক্ত মুক্তি বাহিনী অসমৰ প্ৰতিনিধিয়ে “অসমৰ সৰ্বাংগীন উন্নয়ন”ৰ বাবে এখন বুজাবুজি চুক্তিত স্বাক্ষৰ কৰিছে। সেই চুক্তিৰ মতে, কেন্দ্ৰীয় চৰকাৰে বিশেষ উন্নয়ন পেকেজৰ(SDP) অধীনত কেইবাটাও উন্নয়নমূলক প্ৰকল্প ৰূপায়ণ কৰিব।
ৰাষ্ট্ৰীয় গুৰুত্বপূৰ্ণ প্ৰতিষ্ঠান হিচাপে গুৱাহাটীত IIM স্থাপন কৰাটো SDP ৰ অধীনত অন্যতম প্ৰকল্প। বৰ্তমান দেশত ২১খন IIM আছে আৰু আটাইকেইখনক ৰাষ্ট্ৰীয় গুৰুত্বপূৰ্ণ প্ৰতিষ্ঠান হিচাপে ঘোষণা কৰা হৈছে। লগতে এই আটাইকেইখন প্ৰতিষ্ঠানক IIM আইনৰ সূচীত অন্তৰ্ভুক্ত।
“IIM গুৱাহাটীয়ে পাঁচ বছৰৰ বাবে (২০২৫-২৬ৰ পৰা ২০২৯-৩০) ৫৫৫ কোটি টকাৰ কৰ্পাছ ফাণ্ড লাভ কৰিব। পাঁচ বছৰৰ পাছত প্ৰতিষ্ঠানটোলৈ কোনো অতিৰিক্ত সহায় আগবঢ়োৱা নহ’ব কিয়নো এনে সময়সীমাৰ শেষলৈকে IIM গুৱাহাটীয়ে নিজা আভ্যন্তৰীণ এক্ৰুৱেলৰ জৰিয়তে পৰ্যাপ্ত ৰাজহ আহৰণ কৰিব লাগিব,” বিধেয়কখনত কোৱা হৈছে।
ৰাজ্যখনৰ ভৌগোলিক অৱস্থান আৰু ইয়াৰ সৰ্বাংগীন উন্নয়নৰ প্ৰতি লক্ষ্য ৰাখি অসম চৰকাৰে ৰাজ্যত IIM স্থাপনৰ বাবে অনুৰোধ জনাইছিল। “তিনি কোটিতকৈ অধিক জনসংখ্যাৰ IIM নথকা কেইখনমান ৰাজ্যৰ ভিতৰত অসম অন্যতম। সৰ্বভাৰতীয় উচ্চ শিক্ষা সমীক্ষাৰ শেহতীয়া প্ৰকাশিত ফলাফল অনুসৰি, অসমত পাঁচ লাখতকৈ অধিক ছাত্ৰ-ছাত্ৰীয়ে উচ্চ শিক্ষানুষ্ঠানত নামভৰ্তি কৰিছে।”-বিধেয়কখনত উল্লেখ কৰা হৈছে।
এই কথাও উল্লেখ কৰা হৈছে যে,”অসমত IIM স্থাপন কৰিলে অঞ্চলটোৰ সামগ্ৰিক শিক্ষা আৰু উন্নয়নৰ প্ৰসাৰ ঘটিব আৰু ভাৰতৰ উত্তৰ-পূব অঞ্চলৰ ছাত্ৰ-ছাত্ৰীসকলৰ বাবে দক্ষতা বিকাশৰ বাবে উল্লেখযোগ্য সুযোগ সৃষ্টি হ’ব।””
বিধেয়কখনত উল্লেখ আছে যে, এই আইনৰ অধীনত IIM গুৱাহাটীৰ প্ৰথমখন ব’ৰ্ড গঠন নোহোৱালৈকে এই ব’ৰ্ডৰ দ্বাৰা বা তাৰ হৈ যিবোৰ ক্ষমতা আৰু কাৰ্য্য সম্পাদন কৰিব পৰা যায়, সেইবোৰ ব্যক্তি বা ব্যক্তিসকলে কেন্দ্ৰীয় চৰকাৰৰ নিৰ্দেশ অনুসৰি প্ৰয়োগ আৰু সম্পাদন কৰিব লাগিব।
