আজিৰে পৰা অম্বুবাচী মহাযোগ ২০২৫, ভিৰ কৰিছে ভক্ত-দৰ্শনাৰ্থীয়ে…
আজিৰ পৰা শক্তিপীঠ কামাখ্যা মন্দিৰত অম্বুবাচীৰ মহাযোগ। ইতিমধ্যে কামাখ্যা দেৱালয়ত ভিৰ কৰিছে দিশে-বিদেশৰ দৰ্শনাৰ্থীয়ে ।
কামাখ্যা মন্দিৰ
আজিৰ পৰা শক্তিপীঠ কামাখ্যা মন্দিৰত অম্বুবাচী মহাযোগ । এই উপলক্ষে দৰ্শনাৰ্থীক আদৰিবলৈ সাজু কামাখ্যা দেৱালয় পৰিচালনা সমিতিৰ লগতে কামৰূপ মহানগৰ জিলা প্ৰশাসন। ইতিমধ্যে কামাখ্যা দেৱালয়ত ভিৰ কৰিছে দিশ-বিদেশৰ দৰ্শনাৰ্থীয়ে। আজিৰ পৰা আৰম্ভ হোৱা অম্বুবাচী মহাযোগ ২০২৫ অহা ২৬ জুনলৈকে অনুষ্ঠিত হ’ব ।
জানিব পৰা মতে, দেওবাৰে দিনৰ ২ বাজি ৫৬ মিনিটত অম্বুবাচীৰ প্ৰবৃত্তি হ’ব আৰু অম্বুবাচীৰ নিবৃত্তি হ’ব ২৫ জুনৰ নিশা ৩ বাজি ২৩ মিনিটত । প্ৰবৃত্তিৰ লগে লগে ভক্ত-দৰ্শনাৰ্থীৰ বাবে বন্ধ হ’ব কামাখ্যা মন্দিৰৰ মূল দুৱাৰ । ইফালে, ২৬ জুনৰ পুৱাই দেৱী কামাখ্যা স্নানৰ আৰু পূজা আগবঢ়োৱাৰ পাছত ভক্ত-দৰ্শনাৰ্থীৰ বাবে মন্দিৰৰ দুৱাৰ পুনৰ খুলি দিয়া হ’ব ।
কামাখ্যা মন্দিৰত সাধুসকল
প্ৰতিবছৰে অনুষ্ঠিত হোৱা অম্বুবাচীত লাখ লাখ দৰ্শনাৰ্থীয়ে কামাখ্য়া দেৱালয়ত ভিৰ কৰে । এনে পৰিস্থিতিত এইবাৰো ভক্ত-দৰ্শনাৰ্থীৰ ভিৰ বৃদ্ধি পাব বুলি আশা কৰা হৈছে । সেই অনুসৰি কঠোৰ নিৰাপত্তা ব্যৱস্থাও কৰা হৈছে কামাখ্যা দেৱালয়ত ।
সূত্ৰৰ খবৰ অনুসৰি, কামাখ্যা মন্দিৰ কৰ্তৃপক্ষৰ ফালৰ পৰা অতিৰিক্তভাৱে ৪০০ ৰো অধিক চি চি টিভি কেমেৰা স্থাপন কৰা হৈছে । একেদৰে অসম আৰক্ষী বাহিনীৰ লগতে অতিৰিক্তভাৱে ৭০০ ৰো অধিক অতিৰিক্তভাৱে নিৰাপত্তাৰক্ষী নিয়োগ কৰা হৈছে ।
উল্লেখ্য যে, এইবাৰ অম্বুবাচীত কোনো ধৰণৰ ভি আই পি দৰ্শনাৰ্থীৰ সুবিধা নাথাকে । একেদৰে হুলস্থূলীয়া পৰিৱেশ সৃষ্টি কৰি শোভাযাত্ৰা কৰাত নিষেধাজ্ঞা আৰোপ কৰিছে জিলা প্ৰশাসনে । জানিব পৰা মতে, আজি সন্ধিয়া পাণ্ডু প’ৰ্টত অম্বুবাচী মহাযোগ ২০২৫ মুকলি কৰিব ৰাজ্যৰ মুখ্যমন্ত্ৰী হিমন্ত বিশ্ব শৰ্মাই ।
লগতে পঢ়ক : Morning News: চাওঁ আহক পুৱাৰ কেইটামান গুৰুত্বপূৰ্ণ খবৰ…