জন্মদিনত প্ৰধানমন্ত্ৰী মোদীয়ে সুঁৱৰিলে সুধাকণ্ঠক, শদিয়াৰ পৰা ধুবুৰীলৈ লুইতৰ বুকুৰে বিস্তীৰ্ণ পাৰৰে শীৰ্ষক সংগীত যাত্ৰা

সুধাকণ্ঠলৈ শ্ৰদ্ধা প্ৰধানমন্ত্ৰীৰ

বিশ্ব বৰণ্য শিল্পী সুধাকণ্ঠ ভূপেন হাজৰিকাৰ আজি ৯৯ সংখ্যক জন্মদিন। তেওঁৰ জন্মদিনটো অতি উলহ-মালহেৰে উদযাপন কৰিছে অসমীয়াই। কেৱল অসমতেই নহয় বিশ্বৰ প্ৰান্তে প্ৰান্তে এইগৰাকী ক্ষণজন্মা ব্যক্তিক আজি সুঁৱৰিছে অজস্ৰ গুণমুগ্ধই। ভাৰতৰ প্ৰধানমন্ত্ৰী নৰেন্দ্ৰ মোদীয়েও সুধাকণ্ঠলৈ জনাইছে সশ্ৰদ্ধ প্ৰণাম।

সংগীত তথা সাংস্কৃতিক ক্ষেত্ৰখনলৈ সুধাকণ্ঠ ভূপেন হাজৰিকাৰ অৱদানক অবিস্মৰণীয় বুলি মন্তব্য কৰিছে প্ৰধানমন্ত্ৰীয়ে। সামাজিক মাধ্যম এক্সত এটা পোষ্ট মোদীয়ে লিখিছে- “অসমৰ সংস্কৃতিক বিশ্বব্যাপী স্বীকৃতি দিয়া ভাৰতৰত্ন ড° ভূপেন হাজৰিকাৰ জন্ম বাৰ্ষিকীত মোৰ প্ৰণাম। ভাৰতীয় সংস্কৃতি আৰু সংগীত জগতলৈ তেওঁৰ অৱদান অবিস্মৰণীয় হৈ থাকিব।”

ইফালে ভাৰতৰত্ন ড° ভূপেন হাজৰিকাৰ জন্ম শতবাৰ্ষিকী উপলক্ষে আজি ডিব্ৰুগড়ৰ গুইজানত বন্দৰ, জাহাজ আৰু জলপথ মন্ত্ৰালয়ৰ তত্বাৱধানত ভাৰতৰ আভ্যন্তৰীণ জলপথ প্ৰাধিকৰণে “বিস্তীৰ্ণ পৰৰে: শদিয়াৰ পৰা ধুবুৰীলৈ সংগীত যাত্ৰা” আৰম্ভ কৰিছে।

ড০ হাজৰিকাৰ অন্যতম জনপ্ৰিয় গীতটিৰ নামেৰে নামকৰণ কৰা এই অনন্য সাংস্কৃতিক যাত্ৰাই ব্ৰহ্মপুত্ৰ নদীৰ দৈৰ্ঘ্য সামৰি সংগীত আৰু উদযাপনৰ জৰিয়তে জনগোষ্ঠীসমূহক একত্ৰিত কৰিব।

এক প্ৰেছ বিজ্ঞপ্তিত কোৱা হৈছে যে ডিব্ৰুগড়ৰ বগীবিলত অনুষ্ঠিত হোৱা মুকলি সভাত ড০ হাজৰিকাৰ সৃষ্টিশীল উত্তৰাধিকাৰক সন্মান জনোৱাৰ লগতে যুৱ মনক অনুপ্ৰাণিত কৰাৰ বাবে ৰচনা কৰা বিস্তৃত কাৰ্যসূচীৰ আয়োজন কৰা হ’ব। ইয়াৰ ভিতৰত আছে কলা প্ৰতিযোগিতা, ড০ হাজৰিকাৰ জীৱন আৰু কৰ্মৰাজিৰ ওপৰত ভিত্তি কৰি কুইজ প্ৰতিযোগিতা, মৰাণ, মটক, চাহ জনজাতি, সোণোৱাল কছাৰী, দেউৰী, আৰু গোৰ্খা জনগোষ্ঠীৰ পৰম্পৰাগত নৃত্য প্ৰদৰ্শন। একেলগে এই অনুষ্ঠানসমূহে অসমৰ সাংস্কৃতিক বৈচিত্ৰ্যক প্ৰতিফলিত কৰিব যিটো ভূপেন দাই তেওঁৰ সংগীতত জীৱন্তভাৱে বন্দী কৰি ৰাখিছে বুলি বন্দৰ, জাহাজ আৰু জলপথ মন্ত্ৰণালয়ে কয়।

এই অনুষ্ঠানৰ তাৎপৰ্য বৃদ্ধি কৰি ভাৰতৰ সংগীতৰ একাংশ বিশিষ্ট কণ্ঠশিল্পীৰ ভিডিঅ’ শ্ৰদ্ধাঞ্জলি প্ৰদৰ্শন কৰা হ’ব। শ্ৰদ্ধাঞ্জলি জনোৱাসকলৰ ভিতৰত আছে ভায়লিনবাদক সুনীতা ভূঞা খাউণ্ড, সংগীত পৰিচালক ধ্ৰুবজ্যোতি ফুকন, অমৃত প্ৰীতম, লোহিত গগৈ, আৰু চৈয়দ চাদুল্লাৰ লগতে বিখ্যাত শিল্পী ৰমেন চৌধুৰী, সমৰ হাজৰিকা আৰু অনুপ জালোটা। তেওঁলোকৰ বাৰ্তাসমূহে ভাৰতীয় সংগীতৰ প্ৰতি ভূপেন দাৰ অতুলনীয় অৱদান আৰু তেওঁৰ শিল্পৰ সৈতে সীমাৰ পৰিধি অতিক্ৰম কৰাৰ ক্ষমতাক প্ৰতিফলিত কৰিব।

শদিয়াৰ পৰা ধুবুৰীলৈ বৈ যোৱা ব্ৰহ্মপুত্ৰই অসমৰ বৈচিত্ৰময় জাতি-সাংস্কৃতিক, ভাষিক জনগোষ্ঠীসমূহক একত্ৰিত কৰি দীৰ্ঘদিন ধৰি অসমৰ জীৱনৰেখা হৈ আহিছে। ড° হাজৰিকাই এই নদীখনক মানৱতাৰ বাবে এক উপমালৈ ৰূপান্তৰিত কৰিলে- ইয়াৰ সীমাহীনতাই তেওঁৰ সাৰ্বজনীন সমতা, বন্ধুত্ব আৰু ন্যায়ৰ বাৰ্তাক প্ৰতিফলিত কৰিছিল। তেওঁৰ সংগীতত এই নদীখন সাংস্কৃতিক সংহতি আৰু বিশ্বজনীন সমন্বয়ৰ প্ৰতীক হৈ পৰিছিল।

আই ডব্লিউ এ আইয়ে এই নদী যাত্ৰাক কেৱল শ্ৰদ্ধাঞ্জলি জনোৱাৰ বাবেই নহয়, ব্ৰহ্মপুত্ৰৰ সিপাৰে ড০ হাজৰিকাৰ পদপথ পুনৰ অনুসৰণ কৰি, সম্প্ৰদায়সমূহক সংযোগ কৰি তেওঁৰ বাৰ্তা কঢ়িয়াই নিয়াৰ এক অনুষ্ঠান হিচাপে আয়োজন কৰিছে। ঠিক যেনেকৈ নদীখনে নিজেই ঐতিহ্য কঢ়িয়াই লৈ ফুৰে। বিস্তীৰ্ণ পাৰৰে এক শ্ৰদ্ধাঞ্জলি আৰু স্মৃতিৰ জীৱন্ত যাত্ৰা হৈ পৰিছে।