দিল্লীত কেন্দ্ৰীয় মন্ত্ৰী নীতিন গাডকাৰীক সাক্ষাৎ মুখ্যমন্ত্ৰী হিমন্ত বিশ্ব শৰ্মাৰ

অসমৰ মুখ্যমন্ত্ৰী হিমন্ত বিশ্ব শৰ্মাই বুধবাৰে কেন্দ্ৰীয় পথ পৰিবহন আৰু ঘাইপথ মন্ত্ৰী নীতিন গাডকাৰীক সাক্ষাৎ কৰি ৰাজ্যৰ বিভিন্ন গুৰুত্বপূৰ্ণ আন্তঃগাঁথনি প্ৰকল্প সন্দৰ্ভত আলোচনা কৰে। বৈঠকৰ সময়ত শৰ্মাই চলি থকা আন্তঃগাঁথনি প্ৰকল্পসমূহ সময়মতে সম্পূৰ্ণ কৰাটো নিশ্চিত কৰাৰ বাবে পথ পৰিবহন আৰু ঘাইপথ মন্ত্ৰালয়ৰ পৰা সহায়-সহযোগিতা বিচাৰে।

কেন্দ্ৰীয় মন্ত্ৰীগৰাকীয়ে অসমত চলি থকা বৃহৎ ৰাষ্ট্ৰীয় ঘাইপথ প্ৰকল্পসমূহ সময়মতে ৰূপায়ণৰ বাবে পথ পৰিবহন আৰু ঘাইপথ মন্ত্ৰালয়ৰ সহায়ৰ আশ্বাস প্ৰদান কৰে। এই প্ৰকল্পসমূহে আঞ্চলিক সংযোগ যথেষ্ট বৃদ্ধি কৰিব, বাণিজ্যিক পথ উন্নত কৰিব আৰু উত্তৰ-পূৰ্বাঞ্চলৰ অৰ্থনৈতিক উন্নয়নৰ গতি ত্বৰান্বিত কৰিব বুলি আশা কৰা হৈছে।

“আজি নতুন দিল্লীত মাননীয় কেন্দ্ৰীয় মন্ত্ৰী শ্ৰী নীতিন গাডকাৰী জীৰ সৈতে মোৰ এক ফলপ্ৰসূ বৈঠক হৈছিল। আমি অসমৰ ফ্লেগশ্বিপ ইনফ্ৰা প্ৰজেক্টৰ অগ্ৰগতিৰ পৰ্যালোচনা কৰি তেওঁলোকৰ সময় নিৰ্ধাৰিত সম্পূৰ্ণতাত @MORTHIndia ৰ সহযোগিতা বিচাৰিছিলো। মাননীয় মন্ত্ৰী মহোদয়ে এই বিষয়ত মন্ত্ৰালয়ৰ অবিভক্ত মনোনিৱেশৰ আশ্বাস দিছে,” ডঃ শৰ্মাই এক্সত লিখিছে।

ইয়াৰ পূৰ্বে মুখ্যমন্ত্ৰীয়ে দিল্লীত আইচিআইচিআই ফাউণ্ডেশ্যন আৰু আইচিআইচিআই বেংকৰ এটা দলক সাক্ষাৎ কৰি অসমত চলি থকা চিএছআৰ পদক্ষেপৰ বিষয়ে আলোচনা কৰে। এই বৈঠকত অসম চৰকাৰৰ সহযোগত চি এছ আৰ প্ৰচেষ্টাসমূহ শক্তিশালী, সম্প্ৰসাৰণ আৰু বৈচিত্ৰ্যপূৰ্ণ কৰাৰ লগতে ক্ষুদ্ৰ ঋণগ্ৰহণকাৰীসকলৰ ঋণৰ সুবিধা সম্প্ৰসাৰণৰ ওপৰত গুৰুত্ব আৰোপ কৰা হয়।

লাইফকেয়াৰ লিমিটেডৰ অধ্যক্ষ জয়েশ ছাইনীয়েও মুখ্যমন্ত্রীক সাক্ষাৎ কৰি অসমৰ উত্থানশীল স্বাস্থ্য খণ্ডত কোম্পানীটোৰ অংশগ্ৰহণ আৰু প্রকল্পসমূহ শীঘ্রে সাফল্যমণ্ডিত কৰাৰ আগ্রহ সন্দর্ভত দীঘলীয়া আলোচনা কৰে ৷ কেনিয়াস্থিত কোম্পানী লাইফকেয়াৰে চলিত বৰ্ষৰ ফেব্ৰুৱাৰী মাহত গুৱাহাটীত অনুষ্ঠিত হোৱা এডভান্টেজ আছাম ২.০ বিনিয়োগ আৰু আন্তঃগাঁথনি সন্মিলনৰ সময়ত স্বাস্থ্য খণ্ডত বুজাবুজি চুক্তি স্বাক্ষৰ কৰিছিল।