Anti-Drug Operation in Assam : ৰাজ্যত পুনৰ ২ কোটি টকাৰ ড্ৰাগছসহ দুজনক আটক…

প্ৰতীকী ফটো

ৰাজ্যখনক ড্ৰাগছ মুক্ত কৰাৰ বাবে কঠোৰ পদক্ষেপ গ্ৰহণ কৰাৰ পোষকতা কৰি আহিছে ৰাজ্য চৰকাৰে । একে সময়তে ৰাজ্যত চলি থকা ড্ৰাগছ সৰবৰাহ বন্ধ কৰাৰ ক্ষেত্ৰত অসম আৰক্ষীয়েও পদক্ষেপ গ্ৰহণ কৰি আহিছে । যোৱা দিনবোৰত দেখা গৈছে যে, বিশেষকৈ বৰাক উপত্যকাকে ধৰি মধ্য অসমৰ জিলা কেইখনত ড্ৰাগছ সৰবৰাহৰ বিৰুদ্ধে অভিযান চলাই সফলতাও লাভ কৰিছে আৰক্ষীয়ে ।

ড্ৰাগছ বিৰোধী অভিযানৰ অংশ হিচাপে পুনৰ শ্ৰীভূমি জিলাত ২ কোটি টকাৰ ড্ৰাগছ জব্দ কৰিবলৈ সক্ষম হৈছে অসম আৰক্ষীয়ে । ৰাজ্যৰ মুখ্যমন্ত্ৰী হিমন্ত বিশ্ব শৰ্মাই এক্স হেণ্ডেলৰ এটা পোষ্টৰ জৰিয়তে জানিবলৈ দিছে যে, শ্ৰীভূমি জিলাত ২ কোটি টকাৰ ড্ৰাগছ জব্দ কৰাৰ লগে দুজন লোকক আটক কৰিছে আৰক্ষীয়ে ।

মুখ্যমন্ত্ৰীয়ে জানিবলৈ দিয়া অনুসৰি, আৰক্ষীয়ে এক অভিযান চলাই দুজন লোকক আটক কৰাৰ লগতে তেওঁলোকৰ পৰা ১০ হাজাৰ ইয়াবা টেবলেট জব্দ কৰে । ইয়াৰ লগতে এই সফলতাৰ বাবে আৰক্ষীক প্ৰশংসাও কৰে মুখ্যমন্ত্ৰীগৰাকীয়ে ।

ইফালে, যোৱা সপ্তাহত মুখ্যমন্ত্ৰীয়ে এক্সৰ জৰিয়তে জানিবলৈ দিছিল যে, কাছাৰ জিলাত চলোৱা এক অভিযানত ৪.৫ কোটি টকাৰ ড্ৰাগছসহ দুজন ব্যক্তিক আটক কৰিছিল আৰক্ষীয়ে । ইয়াৰ লগতে তেওঁলোকৰ পৰা ৮৪৭ গ্ৰাম হেৰ’ইন আৰু ৪.০৩৫ কেজি আফিং আৰক্ষীয়ে জব্দ কৰা বুলি মুখ্যমন্ত্ৰীয়ে জানিবলৈ দিছিল।