১০ ঘণ্টাত এজন চিকিৎসকে কৰিলে ২১ টা অস্ত্ৰোপচাৰ! কাৰণ দৰ্শোৱাৰ জাননী জাৰী জিলা প্ৰশাসনৰ

প্ৰতীকী ছবি

অস্ত্ৰোপচাৰ, সৰুৱেই হওক বা ডাঙৰেই হওক, ই এক জটিল প্ৰক্ৰিয়া। কিয়নো ইয়াৰ সৈতে ৰোগীৰ জীৱন-মৰণৰ কথা জড়িত হৈ থাকে। অসমৰে এখন চৰকাৰী চিকিৎসালয়ে অস্ত্ৰোপচাৰৰ ক্ষেত্ৰত বাতৰিৰ শিৰোনাম দখল কৰিছে। মাত্ৰ ১০ ঘণ্টাৰ ভিতৰত চিকিৎসালয়খনত সম্পন্ন হ’ল ২১ টা অস্ত্ৰোপচাৰ। তাকো সৰু-সুৰা অস্ত্ৰোপচাৰ নহয়, গৰ্ভৱতী মহিলাৰ অস্ত্ৰোপচাৰ।

মৰিগাঁও জিলা অসামৰিক চিকিৎসালয়ৰ অপাৰেচন থিয়েটাৰত মাত্ৰ ১০ ঘণ্টাৰ ভিতৰত ২১ টা ল’ৱাৰ ছেগমেণ্ট চিজাৰিয়ান (LSCS) কৰা বুলি প্ৰকাশ পোৱাৰ পিছতেই সকলো আচৰিত হৈ পৰিছে। এই ঘটনাই চৰকাৰী তদন্তৰ সূচনা কৰিছে।

মৰিগাঁৱৰ জিলা উপায়ুক্তৰ কাৰ্যালয়ে জাৰি কৰা কাৰণ দৰ্শোৱাৰ জাননী অনুসৰি ২০২৫ চনৰ ৫ ছেপ্টেম্বৰৰ বিয়লি ৩:৪০ বজাৰ পৰা ৬ ছেপ্টেম্বৰৰ দুপৰীয়া ১:৫০ বজাৰ ভিতৰত জ্যেষ্ঠ চিকিৎসা আৰু স্বাস্থ্য বিষয়া ডাঃ কণ্ঠেশ্বৰ বৰদলৈয়ে এই অস্ত্ৰোপচাৰসমূহ কৰে।

অতিৰিক্ত জিলা আয়ুক্ত (স্বাস্থ্য) নীতিশা বৰাই যোৱা ৬ ছেপ্টেম্বৰত প্ৰসূতি শাখা পৰিদৰ্শনৰ অন্তত ডাঃ বৰদলৈক বিস্তৃত ব্যাখ্যাৰ নিৰ্দেশেৰে জাননী প্ৰেৰণ কৰে। তদন্তত কৰ্মবোজা ব্যৱস্থাপনা, চিকিৎসা প্ৰট’কল আনুগত্য আৰু অস্ত্ৰোপচাৰৰ নথি-পত্ৰৰ সঠিকতাৰ ওপৰত স্পষ্টতা বিচাৰিছে প্ৰশাসনে।

জাননীখনত ডাঃ বৰদলৈক কি কি দাখিল কৰিবলৈ নিৰ্দেশ দিয়া হৈছে?

• ২১টা অপাৰেচনৰ সকলোবোৰৰ কেছৰ বিৱৰণ
• অস্ত্ৰোপচাৰৰ পূৰ্বে প্ৰতিজন ৰোগীৰ বাবে প্ৰস্তুতিৰ প্ৰট’কল অনুসৰণৰ বিৱৰণ
• অস্ত্ৰোপচাৰ যন্ত্ৰৰ বাবে এছ অ’ পিৰ অনুসৰণৰ পৰীক্ষণৰ সৈতে জড়িত বিজানুমুক্তকৰণ ব্যৱস্থাৰ বিৱৰণ
• জৰুৰী চি-চেকচনৰ প্ৰয়োজন হোৱা উচ্চ বিপদজনক বা গুৰুতৰভাৱে অসুস্থ ৰোগীৰ বাবে জৰুৰীকালীন ন্যায্যতা
• প্ৰক্ৰিয়াসমূহৰ সময়ত সকলো সহায়কাৰী কৰ্মচাৰীৰ ভূমিকা আৰু দায়িত্ব

পৰিদৰ্শনত অস্ত্ৰোপচাৰৰ পূৰ্বে আৰু অস্ত্ৰোপচাৰৰ পিছৰ ৰেকৰ্ড ৰখাৰ ক্ষেত্ৰতো ত্ৰুটি প্ৰকাশ পাইছে, যাৰ ফলত সংক্ৰমণ নিয়ন্ত্ৰণ আৰু ৰোগীৰ সুৰক্ষাৰ বিষয়ে উদ্বেগ প্ৰকাশ পাইছে। কৰ্তৃপক্ষই জোৰ দি কয় যে মাতৃ আৰু শিশুৰ ৰোগ প্ৰতিৰোধ কৰিবলৈ আৰু চিকিৎসাৰ মানদণ্ড মানি চলাটো নিশ্চিত কৰিবলৈ সঠিক নথি-পত্ৰ অতি প্ৰয়োজনীয়।

মূল প্ৰশ্নটো হ’ল যে সকলো প্ৰয়োজনীয় বিজানুমুক্তকৰণ আৰু পদ্ধতিগত প্ৰট’কল কঠোৰভাৱে পালন কৰা হৈছিল নে? যদি তেনে কৰা হৈছিল, তেন্তে এই কৃতিত্ব জৰুৰী পৰিস্থিতিত দায়বদ্ধতাৰ এক উল্লেখযোগ্য নিদৰ্শন হিচাপে থিয় দিব। কিন্তু যিকোনো বিচ্যুতিৰ ফলত ৰোগীৰ কল্যাণ আৰু চিকিৎসালয়ৰ জবাবদিহিতাৰ ওপৰত গুৰুতৰ প্ৰভাৱ পৰিব পাৰে।

ডাঃ বৰদলৈক তিনিদিনৰ ভিতৰত বিশদ প্ৰতিবেদন দাখিল কৰি কৰা অস্ত্ৰোপচাৰৰ অসাধাৰণ পৰিমাণৰ বিষয়ে ব্যাখ্যা কৰিবলৈ কোৱা হৈছে। এই তথ্যই নিৰ্ণয় কৰিব যে এই বিষয়টো জৰুৰী পৰিস্থিতিত কৰা চিকিৎসা সেৱা নে ৰোগীৰ সুৰক্ষাক লৈ খেলা হেতালি।