মাটি বিক্ৰী কৰি গৈছিল আমেৰিকালৈ, হাতত হেণ্ডকাফ লগাই উভতাই পঠালে ভাৰতীয়ক!

অবৈধ অনুপ্ৰৱেশকাৰীক ভাৰতলৈ বিতাড়ন আমেৰিকাৰ

হোয়াইট হাউছলৈ উভতি অহাৰ পিছৰে পৰা ৰাষ্ট্ৰপতি ড’নাল্ড ট্ৰাম্পে অবৈধ অনুপ্ৰৱেশকাৰীক দমন কৰি আহিছে। শেহতীয়াকৈ ট্ৰাম্প প্ৰশাসনে আন এটা গোটক ভাৰতলৈ বিতাড়িত কৰে। বিতাড়িত কৰা ৩৫ জন লোক হাৰিয়ানাৰ কৈথল, কৰনাল, আৰু কুৰুক্ষেত্ৰ জিলাৰ। তেওঁলোকক কঢ়িয়াই অনা বিমানখন শনিবাৰে মাজনিশা দিল্লী বিমানবন্দৰত উপস্থিত হয়। কাইথালৰ পৰা বিতাড়িত হোৱা লোকসকলৰ ভিতৰত অন্যতম নৰেশ কুমাৰে কয় যে, বিমানৰ সময়ত তেওঁলোকক হেণ্ডকাফ বান্ধি ৰখা হৈছিল।

ইয়াৰ পূৰ্বে ভাৰতীয় নাগৰিকক হেণ্ডকাফ লগাই বিতাড়িত কৰা হৈছিল। যাক লৈ যথেষ্ট হুলস্থূলৰ সৃষ্টি হৈছিল। কেইবাটাও সংগঠনে আমেৰিকা প্ৰশাসনৰ এই পদক্ষেপৰ প্ৰতিবাদ কৰি ভাৰত চৰকাৰক সন্মানজনকভাৱে ভাৰতীয় নাগৰিকসকলক ঘূৰাই পঠিয়াবলৈ আহ্বান জনায়।

বিতাড়িত লোকসকলৰ ভিতৰত কৰ্ণালৰ ১৬ জন, কাইথালৰ ১৪ জন আৰু কুৰুক্ষেত্ৰৰ ৫ জন। পিছত তেওঁলোকক নিজ নিজ জিলালৈ লৈ যোৱা হয় আৰু তাৰ পিছত পৰিয়ালৰ সৈতে পুনৰ মিলিত হয়। কৰ্ণালৰ আৰক্ষী অধীক্ষক গংগা ৰাম পুনিয়াই কয় যে, বিতাড়িত লোকসকল জিলাখনৰ বিভিন্ন গাঁৱৰ।

মাটি বিক্ৰী কৰি আমেৰিকালৈ গৈছিল

কাইথালৰ উপ-আৰক্ষী অধীক্ষক ললিত কুমাৰে জনোৱা মতে, দেওবাৰে দিল্লী বিমানবন্দৰৰ পৰা ১৪ জন লোকক কৈথল পুলিচ লাইনলৈ অনা হয়। এই লোকসকলে আমেৰিকাত প্ৰৱেশৰ বাবে বিপদজনক পথ গ্ৰহণ কৰিছিল। গোটটোত কলায়ত, পুণ্ড্ৰী, কৈথল, ঢাণ্ড আৰু গুহল ব্লকৰ লোক আছিল। বিতাড়িত লোকসকল বেছিভাগেই ২৫ৰ পৰা ৪০ বছৰৰ ভিতৰৰ, ঘূৰি অহাৰ বাবে তেওঁলোকে নিৰাশা ব্যক্ত কৰে।

তেওঁলোকে মাটি বিক্ৰী কৰি, ধন ধাৰে লৈ, সঞ্চয় কৰি যথেষ্ট পৰিমাণৰ ধন বিনিয়োগ কৰি উন্নত সুযোগৰ সন্ধানত আমেৰিকালৈ প্ৰব্ৰজন কৰিছিল। কিন্তু ট্ৰাম্প প্ৰশাসন ক্ষমতালৈ অহাৰ পিছৰে পৰা আমেৰিকালৈ অবৈধ অনুপ্ৰৱেশৰ এনে সকলো পথ বন্ধ হৈ পৰিছিল। চলিত বৰ্ষৰ আৰম্ভণিতে আমেৰিকা কৰ্তৃপক্ষই পঞ্জাৱ, হাৰিয়ানা, গুজৰাটৰ কেইবাজনো যুৱকক বিতাড়িত কৰিছিল।

ট্ৰাম্পৰ আমেৰিকা প্ৰথম নীতি

চলিত বৰ্ষৰ জানুৱাৰী মাহত ড’নাল্ড ট্ৰাম্প ৰাষ্ট্ৰপতি হোৱাৰ পাছৰে পৰা দেশখনৰ আইন প্ৰয়োগকাৰী সংস্থাই অবৈধ অনুপ্ৰৱেশকাৰীৰ বিৰুদ্ধে কঠোৰ অভিযান আৰম্ভ কৰিছে। নিৰ্বাচনী প্ৰচাৰৰ সময়ত ট্ৰাম্পে প্ৰথমে আমেৰিকাৰ নাগৰিকক আমেৰিকাৰ চাকৰি দিয়াৰ প্ৰতিশ্ৰুতি দিছিল। ট্ৰাম্প সমৰ্থকসকলৰ মতে অবৈধ অনুপ্ৰৱেশকাৰীয়ে আমেৰিকাৰ চাকৰি কাঢ়ি লৈছে।