কোন সেই ৭ জন মন্ত্ৰী, যাৰ সৈতে ভাৰতলৈ আহিব পুটিন…কিন্তু কিয়?

৪ ডিচেম্বৰৰ পৰা ৫ ডিচেম্বৰলৈ ভাৰত ভ্ৰমণ কৰিব ৰাছিয়াৰ ৰাষ্ট্ৰপতি ভ্লাদিমিৰ পুটিনে। ৪ ডিচেম্বৰত পুটিন আৰু প্ৰধানমন্ত্ৰী মোদীৰ অনানুষ্ঠানিক বৈঠক হ’ব। ৫ ডিচেম্বৰত দুয়োগৰাকী নেতাই আনুষ্ঠানিক বৈঠকত মিলিত হ’ব আৰু সকলো ডাঙৰ চুক্তিত স্বাক্ষৰ কৰিব। এই সময়ছোৱাত ১০খন চৰকাৰী আৰু ১৫খনতকৈও অধিক ব্যৱসায়িক চুক্তি স্বাক্ষৰিত হ’ব। অৰ্থাৎ মুঠ ২৫টা ডাঙৰ চুক্তি স্বাক্ষৰিত হোৱাৰ সম্ভাৱনা আছে। ২৩ সংখ্যক ভাৰত-ৰাছিয়াৰ বাৰ্ষিক সন্মিলনতো অংশগ্ৰহণ কৰিব পুটিনে।

পুটিনৰ সৈতে ভাৰতলৈ আহিব ৰাছিয়াৰ ৭জন জ্যেষ্ঠ মন্ত্ৰী

• প্ৰতিৰক্ষা মন্ত্ৰী আন্দ্ৰেই বেলুছভ
• কৃষি মন্ত্ৰী অক্সানা লুট
• স্বাস্থ্য মন্ত্ৰী মিখাইল মুৰাস্কো
• পৰিবহণ মন্ত্ৰী আন্দ্ৰেই নিকিটিন
• অৰ্থনৈতিক উন্নয়ন মন্ত্ৰী মেক্সিম ৰেশ্বেটনিকোভ
• বিত্তমন্ত্ৰী এণ্টন ছিলুৱানোভ
• স্বৰাজ মন্ত্ৰী ভ্লাদিমিৰ কলকোল্টচেভ

ৰাছিয়াৰ কেন্দ্ৰীয় বেংকৰ গৱৰ্ণৰ এলভিৰা নাবিউলিনা আৰু উপ-বিদেশ মন্ত্ৰী আন্দ্ৰেই ৰুডেনকোও ভাৰত ভ্ৰমণলৈ আহিব। ইয়াৰ উপৰিও ইগ’ৰ চেচিন (ৰাছিয়াৰ তেল কোম্পানী ৰ’ছনেফ্টৰ মুৰব্বী) আৰু বিখ্যাত সংবাদ মাধ্যমৰ সম্পাদিকা মাৰ্গাৰিটা ছিমনিয়ানকে ধৰি ৰাছিয়াৰ বিশিষ্ট ব্যৱসায়িক নেতাসকলেও ভ্ৰমণ কৰিছে। ভাৰতৰ নতুন টিভি চেনেল আৰ টি ইণ্ডিয়া মুকলি অনুষ্ঠানত অংশগ্ৰহণ কৰিব পুটিন আৰু ছিমনিয়ানে।

ৰাছিয়াৰ প্ৰতিনিধি দলটোত আৰু কোন আছে?

ৰাছিয়াৰ প্ৰতিনিধি দলটোত শুল্ক বিষয়া, ৰাছিয়াৰ বিত্তীয় নিৰীক্ষণ সংস্থা (ৰছফিনমনিটৰিং)ৰ প্ৰতিনিধি, সামৰিক-কাৰিকৰী সহযোগিতা বিভাগৰ মুৰব্বী দিমিত্ৰী শ্বুগায়েভ আৰু ৰস্কোচমছ, ৰোজাটম আৰু ভিইবি.আৰএফৰ দৰে ডাঙৰ চৰকাৰী কোম্পানীসমূহৰ মুৰব্বীও আছে।

ব্যৱসায়িক জগতৰ পৰা Sberbank, Basic Element Company, Rusal, VTB Bank, Fertiliser Producers Association, Roskhim, Transmashholding ৰ মুৰব্বী আৰু আন বহু বৃহৎ কোম্পানীৰ শীৰ্ষ বিষয়াসকলেও ভাৰত ভ্ৰমণ কৰিব।

কোনবোৰ ক্ষেত্ৰত চুক্তি হ’ব?

বৈদেশিক পৰিক্ৰমা মন্ত্ৰালয়ৰ মতে এই ভ্ৰমণৰ সময়ত বাণিজ্য, অৰ্থনীতি, স্বাস্থ্য, শিক্ষা, সংস্কৃতি, সংবাদ মাধ্যম, শ্ৰম, আৰু শ্ৰমিকৰ গতিশীলতা আদি ক্ষেত্ৰত চুক্তিবদ্ধ হোৱাৰ আশা কৰা হৈছে। ৰাছিয়াত শ্ৰমিকৰ প্ৰয়োজনীয়তা বাঢ়িছে। গতিকে ভাৰত আৰু ৰাছিয়াই ভাৰতীয় শ্ৰমিকসকলক ৰাছিয়াত নিৰাপদ আৰু উন্নত সুযোগ প্ৰদানৰ বাবে শ্ৰমিক গতিশীলতা চুক্তিত স্বাক্ষৰ কৰিব। ভাৰত আৰু ৰাছিয়াৰ মাজত ভাৰতৰ বাণিজ্যিক ঘাটি হ্ৰাস কৰাৰ ক্ষেত্ৰতো আলোচনা অনুষ্ঠিত হ’ব, বিশেষকৈ প্ৰতিৰক্ষা আৰু শক্তিৰ ওপৰত গুৰুত্ব আৰোপ কৰা হ’ব।

ৰাছিয়াৰ ৰাষ্ট্ৰপতি কাৰ্যালয়ৰ মুখপাত্ৰ দিমিত্ৰী পেস্কোভে কয় যে, S-400 ক্ষেপণাস্ত্ৰ ব্যৱস্থা আৰু Su-57 যুঁজাৰু বিমান আলোচনাৰ মূল বিষয় হ’ব। দুয়োখন দেশে একেলগে কাম কৰি তেল বাণিজ্য সৰল আৰু সুৰক্ষিত কৰিব বিচাৰে। তেওঁ উল্লেখ কৰে যে ভাৰত-ৰাছিয়াৰ বাণিজ্য ৬৩ বিলিয়ন ডলাৰ হৈছেগৈ, আৰু ২০৩০ চনৰ ভিতৰত ১০০ বিলিয়ন ডলাৰত উপনীত হোৱাৰ লক্ষ্য।

আমেৰিকাৰ হেঁচাত ৰাছিয়াৰ সঁহাৰি

পেস্কোভে কয় যে, ৰাছিয়াই আমেৰিকাৰ পৰা ভাৰতৰ ওপৰত হেঁচা পৰাৰ বিষয়ে অৱগত, কিন্তু ৰাছিয়াই বিশ্বাস কৰে যে ভাৰত এখন সম্পূৰ্ণ স্বাধীন আৰু সাৰ্বভৌম দেশ আৰু নিজেই সিদ্ধান্ত লয়। লগতে তেওঁ কয় যে ভাৰত আৰু ৰাছিয়াৰ জনসাধাৰণৰ মাজত দশক দশক ধৰি বন্ধুত্ব আছে আৰু ৰাছিয়াই সদায় ভাৰতৰ সৈতে থিয় দি গৌৰৱ অনুভৱ কৰিছে। এই ভ্ৰমণে দুয়োখন দেশৰ মাজত বাণিজ্য, প্ৰতিৰক্ষা, শক্তি, আৰু কৌশলগত সহযোগিতাক আৰু অধিক শক্তিশালী কৰিব।