হাছিনাৰ সমুখত নতুন বিপদ, ২৪ জুনৰ ভিতৰত আত্মসমৰ্পনৰ নিৰ্দেশ

শ্বেইখ হাছিনা

বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাৰ বিৰুদ্ধে ধাৰাবাহিকভাৱে কঠোৰ হৈ আছে আইনী মেৰ-পেচ। শেহতীয়া পৰিস্থিতিত বাংলাদেশ আন্তঃৰাষ্ট্ৰীয় অপৰাধ ন্যায়াধিকৰণে শ্বেখ হাছিনাক ২৪ জুনত আদালতত হাজিৰ হ’বলৈ নিৰ্দেশ দিছে। শ্বেখ হাছিনাৰ বিৰুদ্ধে মানৱতাৰ বিৰুদ্ধে অপৰাধ, হত্যা আৰু গণহত্যাৰ দৰে গুৰুতৰ অভিযোগ ন্যায়াধিকৰণত বিচাৰাধীন হৈ আছে।

২০২৪ চনৰ জুলাই মাহত বাংলাদেশত ছাত্ৰ বিদ্ৰোহৰ সময়ত সাধাৰণ লোকৰ ওপৰত গুলীচালনাৰ ষড়যন্ত্ৰ কৰাৰ অভিযোগ উত্থাপন হৈছে প্ৰাক্তন প্ৰধানমন্ত্ৰীগৰাকীৰ বিৰুদ্ধে। এই গোচৰত প্ৰাক্তন গৃহমন্ত্ৰী আছাদুজ্জামান খান আৰু তেতিয়াৰ আৰক্ষী মহাপৰিদৰ্শক চৌধুৰী আব্দুল্লা আল-মামুনকো অভিযুক্ত কৰা হৈছে। ইতিমধ্যে আব্দুল্লা আল-মামুনক গ্ৰেপ্তাৰ কৰি ন্যায়াধিকৰণত হাজিৰ কৰা হৈছে, আনহাতে হাছিনা আৰু আছাদুজ্জামান পলাতক বুলি জানিব পৰা গৈছে।

২৪ জুনৰ ভিতৰত দুয়োজন অভিযুক্তকে আত্মসমৰ্পণৰ অন্তিম সুযোগ দিছে আদালতে। নিৰ্দিষ্ট সময়সীমাৰ ভিতৰত হাজিৰ নহ’লে তেওঁলোকৰ অনুপস্থিতিত আদালতে শুনানিৰ কাম আগবঢ়াই নিব।

বাংলাদেশত হিংসাত্মক পৰিস্থিতিৰ পিছত হাছিনাৰ অভ্যুত্থান

বিচাৰ বিভাগে ন্যায়াধিকৰণক জনাইছে যে শ্বেখ হাছিনাই দেশ এৰি ভাৰতত আশ্ৰয় লৈছে। বাংলাদেশ আৰক্ষীয়ে ঢাকাত হাছিনাৰ বাসগৃহকে ধৰি কেইবাটাও সম্ভাৱ্য স্থানত তালাচী অভিযান চলাই যদিও ক’তো হাছিনাৰ সন্ধান পোৱা নগ’ল।

প্ৰাক্তন গৃহমন্ত্ৰী আছাদুজ্জামান খানেও অজ্ঞাত স্থানত আত্মগোপন কৰি থকা বুলি কোৱা হৈছে, যাৰ বাবে তেওঁক গ্ৰেপ্তাৰ কৰা সম্ভৱ হোৱা নাই। বিষয়টোৰ গুৰুত্ব বিবেচনা কৰি আদালতে এজন এমিকাছ কিউৰিয়া (আদালতৰ বন্ধু)কো নিযুক্তি দিছে, যিয়ে ন্যায়াধিকৰণৰ আইনী প্ৰক্ৰিয়াত নিৰপেক্ষ পথ প্ৰদৰ্শন কৰিব।

এই নিৰ্দেশ যোৱা সোমবাৰে ন্যায়াধিকৰণে ঘোষণা কৰিছিল, যিটো এতিয়া সংবাদ মাধ্যমৰ জাননীৰ জৰিয়তে নিশ্চিত কৰা হৈছে। ইফালে শ্বেখ হাছিনাৰ বিৰুদ্ধে আদালত অৱমাননাৰ আন এক গোচৰো ৰুজু হৈছে, য’ত শ্বেখ হাছিনাৰ বিৰুদ্ধে আদালতক অমান্য কৰি ন্যায়িক প্ৰক্ৰিয়াৰ পৰা আঁতৰি থকাৰ অভিযোগ উত্থাপন হৈছে।

আৱামি লীগৰ সমৰ্থকৰ বিৰুদ্ধে ব্যৱস্থা

বাংলাদেশৰ ক্ষমতা পৰিৱৰ্তনৰ পিছত নোবেল বিজয়ী মহম্মদ ইউনুছৰ নেতৃত্বত নতুন অন্তৱৰ্তীকালীন চৰকাৰ গঠন কৰা হয়। ক্ষমতালৈ অহাৰ কিছু দিনৰ পাছতে ইউনুছ চৰকাৰে প্ৰাক্তন প্ৰধানমন্ত্ৰী শ্বেখ হাছিনা আৰু তেওঁৰ দল আৱামি লীগৰ বিৰুদ্ধে ব্যাপক দমনমূলক কাৰ্যসূচী আৰম্ভ কৰে।

আৱামি লীগ আনুষ্ঠানিকভাৱে নিষিদ্ধ কৰাৰ লগতে শতাধিক সমৰ্থকৰ বিৰুদ্ধে গুৰুতৰ অপৰাধমূলক গোচৰ ৰুজু কৰা হৈছে। বহু দলীয় নেতা-কৰ্মী জেলত থকাৰ বিপৰীতে বৃহৎ সংখ্যক প্ৰাক্তন সাংসদ আৰু জ্যেষ্ঠ নেতাই দেশ এৰি যাবলৈ বাধ্য হৈছে। সংবাদ মাধ্যমৰ খবৰ অনুসৰি এই লোকসকলৰ বহুতেই ভাৰতৰ পশ্চিমবংগত আশ্ৰয় লৈছে।

শ্বেখ হাছিনাক প্ৰত্যাৰ্পণৰ বাবে ভাৰত চৰকাৰক অহৰহ হেঁচা প্ৰয়োগ কৰি আছে ইউনুছ চৰকাৰে। অৱশ্যে ভাৰত চৰকাৰে এতিয়ালৈকে কোনো আনুষ্ঠানিক সঁহাৰি দিয়া নাই।