টিকটকৰ ওপৰত থকা নিষেধাজ্ঞা উঠাই ল’ব নেকি ভাৰতে? ডাঙৰ বাৰ্তা দিলে কেন্দ্ৰীয় মন্ত্ৰী অশ্বিনী বৈষ্ণৱে

Tiktok

ভাৰতলৈ পুনৰ ঘূৰি আহিব নে টিকটক বা টিকটক এপৰ ওপৰত থকা নিষেধাজ্ঞা ভাৰতে উঠাই ল’ব নেকি? চৰ্চা হৈছিল যে, ভাৰতত পুনৰ টিকটক এপ ব্যৱহাৰকাৰীৰ বাবে মুকলি কৰা হ’ব। কিন্তু শেহতীয়াকৈ এই ক্ষেত্ৰত নিজৰ স্থিতি স্পষ্ট কৰিছে চৰকাৰে। কেন্দ্ৰীয় মন্ত্ৰী অশ্বিনী বৈষ্ণৱে টিকটক ভাৰতলৈ ঘূৰি অহাৰ সন্দৰ্ভত চলি থকা আলোচনা সন্দৰ্ভত চৰকাৰৰ স্থিতি স্পষ্ট কৰিছে।

তেওঁ কয় যে, চীনৰ এই চৰ্ট ভিডিঅ’ প্লেটফৰ্মৰ নিষেধাজ্ঞা উঠাই লোৱাৰ কোনো পৰিকল্পনা নাই। মানিকণ্ট্ৰলৰ সৈতে হোৱা এক সাক্ষাৎকাৰত অশ্বিনী বৈষ্ণৱে স্পষ্ট কৰি দিয়ে যে, এই বিষয়ত এতিয়ালৈকে কোনো আলোচনা হোৱা নাই। টিকটকৰ মূল কোম্পানী বাইটডান্স ভাৰতলৈ ঘূৰি আহিবলৈ সাজু হৈছে বুলি সৃষ্টি হোৱা জল্পনা-কল্পনাৰ উত্তৰত তেওঁ কয় যে, কোনো পক্ষৰ পৰা এনে কোনো প্ৰস্তাৱ অহা নাই।

যোৱা মাহত ভাৰতৰ এয়াৰটেল, ভোডাফোনকে ধৰি একাংশ ব্ৰডবেণ্ড আৰু মোবাইল নেটৱৰ্কত কিছুদিনৰ বাবে টিকটকৰ ৱেবছাইট উপলব্ধ হোৱাৰ পিছতে এই জল্পনা-কল্পনাই গতি লাভ কৰিছিল। ছ’চিয়েল মিডিয়াত আলোচনা আৰম্ভ হ’ল যে, এপটো পুনৰ আহিব পাৰে, কিন্তু এতিয়া চৰকাৰে স্পষ্ট কৰি দিছে যে, সেয়া নহয়।

২০২০ চনৰ জুন মাহত ভাৰতত টিকটক নিষিদ্ধ কৰা হৈছিল, যেতিয়া কেন্দ্ৰীয় চৰকাৰে ৰাষ্ট্ৰীয় নিৰাপত্তা আৰু ডাটা প্ৰাইভেচিক কেন্দ্ৰ কৰি উদ্বেগ প্ৰকাশ কৰি ৫৯টা চীনা এপ ব্লক কৰিছিল। ইয়াৰ কিছু দিনৰ পিছতে এপল আৰু গুগলেও এই এপসমূহ ষ্ট’ৰৰ পৰা আঁতৰাই পেলালে আৰু ২০২১ চনৰ জানুৱাৰী মাহত এই নিষেধাজ্ঞা স্থায়ী কৰি দিয়া হয়। সেই সময়ত ভাৰতত ২০ কোটিতকৈ অধিক লোকে এই প্লেটফৰ্ম ব্যৱহাৰ কৰিছিল।