RCB vs PBKS Live Score, IPL 2025: দুৰন্ত গতি অব্যাহত পঞ্জাৱৰঃ ডেভিদ-হেজেলউডৰ যুঁজৰ পিছতো গৃহভূমিত বিধ্বস্ত আৰচিবি

টপ অৰ্ডাৰৰ ব্যৰ্থতাৰ পিছতো সহজ লক্ষ্য অনুসৰণ কৰি ৫ উইকেটত বিজয় সাব্যস্ত কৰিছে পঞ্জাৱ কিংছে। দলৰ জয়ত অন্যতম প্ৰধান ভূমিকা পালন কৰি মাত্ৰ ১৯ বলত তিনিটাকৈ চাৰি আৰু ছয়েৰে ৩৩ ৰানত অপৰাজিত থাকে নেহাল ৱাধেৰা। আনহাতে ঘৰৰ মাটিৰ সুযোগো গ্ৰহণ কৰিব নোৱাৰি ছিজনত তৃতীয় পৰাজয়ৰ সন্মুখীন হৈছে ৰয়েল চেলেঞ্জাৰ্ছ বাংগালুৰু।

প্ৰায় জয়ৰ কাষ চাপিছে পঞ্জাৱ কিংছ। পিছে সেই সময়তে শশাংক সিঙক বিদায় দি দলটোৰ বেটিং লাইন আপত আঘাত হানিছে ভুৱনেশ্বৰ কুমাৰে।

যুঁজ দিছে আৰচিবিয়ে। একেটা অভাৰতে পঞ্জাৱ কিংছৰ অধিনায়ক শ্ৰেয়স আয়াৰ আৰু তাৰ পিছতে জ’ছ ইংলিছক বিদায় দিছে হেজেলউডে।

প্ৰভচিমৰণৰ পিছত আনগৰাকী অপেনাৰ প্ৰিয়াঞ্চ আৰ্যও উভতিল পেভিলিয়নলৈ। হেজেলউডৰ বলত ডেভিডৰ হাতত কেচ তুলি দি বিদায় লোৱা প্ৰিয়াঞ্চৰ বেটৰ পৰা আহে ১৬ ৰান।

আক্ৰমণাত্মক শৈলী অব্যাহত ৰখাৰ চেষ্টাত নিজৰ উইকেট হেৰুৱাইছে প্ৰভচিমৰণ সিঙে। ভুৱনেশ্বৰ কুমাৰৰ বলত একেলগে দুটাকৈ চাৰি কোবোৱাৰ পিছত তৃতীয়টো বলতো কোবোৱাৰ চেষ্টাত ১৩ ৰান কৰি আউট হয় প্ৰভচিমৰণ। টিম ডেভিডে এক দৰ্শনীয় কেচ আয়ত্ব কৰি দলক প্ৰথমটো সফলতা দিয়ে।

আশা কৰাৰ দৰেই ইম্পেক্ট চাবৰ ৰূপত পঞ্জাৱৰ হৈ অপেনিং কৰিবলৈ আহিছে প্ৰভচিমৰণ সিং। জয়ৰ লক্ষ্য অনুসৰণৰ ক্ষেত্ৰত প্ৰিয়াঞ্চ আৰ্যৰ সৈতে প্ৰভচিমৰণৰ অপেনিং যুটিৰ প্ৰদৰ্শন পঞ্জাৱৰ বাবে অতি গুৰুত্বপূৰ্ণ হ’ব।

টিম ডেভিডৰ বিস্ফোৰক অৰ্ধশতকেৰে ৯৫ ৰানৰ এক সন্মানজনক স্ক’ৰ থিয় কৰাইছে আৰচিবিয়ে। অন্তিম ৩টা বলত ৩টা ছয় কোবোৱাৰ পিছত ন’ বলৰ সুযোগ কাৰ্যকৰী কৰি ডেভিডে ২৬ বলত ৫০ ৰান সংগ্ৰহ কৰি অপৰাজিত থাকে। এতিয়া আৰচিবিৰ বলিং আক্ৰমণক নেওচি পঞ্জাৱে অতিক্ৰম কৰিব লাগিব ৯৬ ৰানৰ লক্ষ্য।

নিজৰ প্ৰথমটো অভাৰতে দুটা বলত একেলেথাৰিয়ে দুই উইকেট দখল কৰিছে হৰপ্ৰীত ব্ৰাৰে। প্ৰথমে ভুৱনেশ্বৰক আৰু তাৰ পিছতে য়শ দয়ালক হৰপ্ৰীতে পেভিলিয়নৰ পথ দেখুৱায়।

ইম্পেক্ট চাব ৰূপত ক্ৰীজলৈ অহা যুৱ বেটাৰ মনোজ ভাণ্ডাগেও বিশেষ প্ৰভাৱ পেলোৱাত ব্যৰ্থ হৈছে। মাত্ৰ ১ ৰান কৰিয়েই মাৰ্কো জেনচেনৰ বলত বিদায় লয় মনোজে। এইদৰে আৰচিবিয়ে হেৰুৱায় সপ্তমটো উইকেট।

আৰচিবিৰ অধিনায়ক ৰজত পাটিদাৰেও এইবাৰ লৈছে পেভিলিয়নৰ পথ। দললৈ এইপৰ্যন্ত সৰ্বাধিক ২৩ ৰানৰ অৱদান আগবঢ়াই পাটিদাৰে চাহালৰ বলত বাৰ্টলেটৰ হাতত কেচ দি বিদায় লয়।

মাত্ৰ ৩৩ ৰানতে ৫টা উইকেট হেৰুৱাইছে আৰচিবিয়ে। এইবাৰ মাৰ্কো জেনসেনৰ বলত ক্ৰীজ এৰিছে ক্ৰুণাল পাণ্ডিয়াই। ক্ৰুণালৰ বেটৰ পৰা আহে মাত্ৰ ১ ৰান।

নিজ স্পেলৰ প্ৰথমটো অভাৰতে সফলতা লাভ কৰিছে যুজবেন্দ্ৰ চাহালে। জীতেশ শৰ্মাক বিদায় দি চাহালে আৰচিবিক পুনৰ সংকটৰ দিশে ঠেলি দিয়ে।

গৃহভূমিত সংকটত পৰিছে আৰচিবি। মাত্ৰ ২৬ ৰানত দলটোৱে হেৰুৱাইছে চতুৰ্থটো উইকেট। এইবাৰ লিয়াম লিভিংষ্ট’নক বিদায় দিছে বাৰ্টলেটে। উল্লেখ্য যে আই পি এলত এয়া তেওঁৰ প্ৰথমটো উইকেট।

আৰচিবিৰ দুই অপেনাৰক বিদায় দিছে অৰ্শদীপ সিঙে। ছল্টৰ পিছত অৰ্শদীপে এইবাৰ কোহলীৰ উইকেটো দখল কৰিছে। কোহলীৰ বেটৰ পৰা আহে মাত্ৰ ১ ৰান।

অৰ্শদীপে কৰা মেচৰ প্ৰথমটো বলতে চাৰি কোবাই ছল্টে দেখুৱাইছিল মনোবল। পিছে চতুৰ্থটো বলতে উইকেটকীপাৰ ইংলিছৰ হাতত কেচ তুলি দি তেওঁ পেভিলিয়নলৈ উভতে।

আৰচিবিৰ মূল একাদশত আছে ফিল ছল্ট, বিৰাট কোহলী, ৰজত পাটিদাৰ (অধিনায়ক), লিয়াম লিভিংষ্ট’ন, জিতেশ শৰ্মা, টিম ডেভিড, ক্ৰুণাল পাণ্ডিয়া, ভুৱনেশ্বৰ কুমাৰ, জ’ছ হেজলউড, সুয়শ শৰ্মা, যশ দয়াল।

পঞ্জাৱ কিংছৰ মূল একাদশত স্থান পাইছে প্ৰিয়াঞ্চ আৰ্য, নেহাল ৱাধেৰা, শ্ৰেয়স আয়াৰ (অধিনায়ক), শশাংক সিং, জ’ছ ইংলিছ, মাৰ্কুছ ষ্টইনিছ, মাৰ্কো জেনচেন, হৰপ্ৰীত ব্ৰাৰ, জেভিয়াৰ বাৰ্টলেট, অৰ্শদীপ সিং, যুজবেন্দ্ৰ চাহালে। অৰ্থাৎ প্ৰভচিমৰণ সিঙক আজি ইম্পেক্ট চাবৰ ৰূপত দেখা যাব পাৰে।

চিন্নাস্বামীৰ সেমেকা খেলপথাৰত টছত জয়ী হৈ পঞ্জাৱ কিংছৰ অধিনায়ক শ্ৰেয়স আয়াৰে প্ৰথমে বলিং কৰাৰ সিদ্ধান্ত গ্ৰহণ কৰিছে। এতিয়া ১৪ অভাৰত আৰচিবিয়ে পঞ্জাৱক কিমান লক্ষ্য দিব পাৰে, সেয়া হ’ব লক্ষণীয়।

বৰষুণৰ পিছত মেচখন ১৪ অভাৰকৈ খেলোৱাৰ সিদ্ধান্ত গ্ৰহণ কৰা হৈছে। ইয়াৰে বেটিং পাৱাৰ প্লে’ ৪ অভাৰৰ হ’ব। তিনিজন বলাৰে সৰ্বাধিক ৪ অভাৰ বল কৰিব পাৰিব।

অৱশেষত বৰষুণ এৰিছে বাংগালুৰুত। ইতিমধ্যে গ্ৰাউণ্ড ষ্টাফে খেলপথাৰৰ পৰা কভাৰ আঁতৰাই নিয়াও দেখিবলৈ পোৱা গৈছে। অৰ্থাৎ মেচ উপভোগৰ বাবে দীৰ্ঘসময়ৰ বাবে অপেক্ষা কৰি থকা অনুৰাগীসকলে এই ধৈৰ্যৰ ফল লাভ কৰিব।

বৰষুণৰ বাবে মেচ আৰম্ভ কৰাৰ ক্ষেত্ৰত কোনো সিদ্ধান্ত এইপৰ্যন্ত ল’বপৰা হোৱা নাই। তথ্য অনুসৰি, মেচৰ অভাৰ হ্ৰাস কৰি ৫-৫ অভাৰকৈ খেলাৰ বাবে ১০:৫৬ বজালৈ অপেক্ষা কৰা হ’ব। যদিহে তেতিয়াও মেচ আৰম্ভ কৰিবপৰা নহয়, তেতিয়া দুয়োটা দলৰ মাজত পইণ্ট ভাগ কৰা হ’ব।

বৰষুণ বন্ধ হোৱালৈ চিন্নাস্বামীৰ গেলাৰীত বহি এতিয়াও অপেক্ষাৰত অনুৰাগী। পিছে বাংগালুৰুত বৰষুণ ক্ৰমাৎ তীব্ৰ হৈ পৰিছে, এনে পৰিস্থিতিত মেচখন অনুষ্ঠিত আৰম্ভ হোৱাৰ আশা ক্ষীণ হৈ পৰিছে।

আই পি এলত এইপৰ্যন্ত বাংগালুৰু আৰু পঞ্জাৱ ৩৩ বাৰ মুখামুখি হৈছে। এই মুখামুখিত বাংগালুৰু ১৬ বাৰ জয়ী হোৱাৰ বিপৰীতে ১৭ খনত জয়েৰে আগত আছে পঞ্জাৱ। অৱশ্যে দুয়োটা দলৰ শেহতীয়া ৩ বাৰৰ মুখামুখিত বাংগালুৰুৱে জয়লাভ কৰিবলৈ সক্ষম হৈছে।

বাংগালুৰুত বৰষুণৰ বাবে অনুৰাগীৰ আকাংক্ষাত কিছু বাধা আহি পৰিছে। বৰষুণৰ বাবে এতিয়াও মেচৰ টছ কৰিব পৰা হোৱা নাই। অৰ্থাৎ এই মেচখনৰ বাবে ক্ৰিকেটপ্ৰেমীৰ অপেক্ষা আৰু কিছু দীঘলীয়া হ’ব।