প্ৰশিক্ষক ক্ৰিকেটৰ, কিন্তু কাম-কাজ ফুটবল প্ৰশিক্ষকৰ দৰেই, ছুপাৰ এক্টিভ নেহৰাজী

আশিস নেহৰা

ক্ৰিকেট প্ৰশিক্ষকজন কেনেকুৱা হয়? ভাবিছে চাগৈ এইটো আকৌ কেনেধৰণৰ প্ৰশ্ন ? কৌশল তৈয়াৰৰ পৰা আৰম্ভ কৰি মেচৰ আগতে অনুশীলনলৈকে, সকলোতে দেখা যায় প্ৰশিক্ষকজনক । কিন্তু মেচৰ সময়ত? সাধাৰণতে ডাগআউটত থাকে । যদি কোনো বাৰ্তা দিব লাগে তেন্তে ড্ৰিংকছ ব্ৰেকৰ সময়ত খেলুৱৈৰ জৰিয়তে অধিনায়কলৈ প্ৰেৰণ কৰে । কেতিয়াবা ডাগআউটৰ পৰাও ইংগিত দিয়ে । বেছিভাগ প্ৰশিক্ষকৰ ক্ষেত্ৰত এনেকুৱাই হয় ।

ইণ্ডিয়ান প্ৰিমিয়াৰ লীগ বা ফ্ৰেঞ্চাইজি ক্ৰিকেটত কথাটো অলপ বেলেগ । ইয়াত ষ্ট্ৰেটেজিক টাইম আউট থাকে । সেই সময়ত খেলপথাৰলৈ আহি খেলুৱৈসকলৰ লগত কথা পাতে প্ৰশিক্ষকে । কিন্তু ফুটবলত কথাটো বেলেগ । খেলৰ সময়ত খেল পথাৰৰ কাষত থাকি খেলুৱৈসকলক সকলো সময়তে কিছুমান নিৰ্দেশনা দিয়ে প্ৰশিক্ষকে । খেলত নিমগ্ন হৈ থাকে । সকলো সময়তে সক্ৰিয় যেন লাগে । মাত্ৰ মুষ্টিমেয় ফুটবল প্ৰশিক্ষকহে ডাগআউটত বহি থাকে । ক্ৰিকেটতো ক্ৰমান্বয়ে এনে হ’ব পাৰেনে ? কব নোৱাৰি….

ইণ্ডিয়ান প্ৰিমিয়াৰ লীগত অভিষেকতে চেম্পিয়ন হোৱাৰ অভিলেখ আছে দুটা দলৰ । ২০০৮ চনৰ পৰা আৰম্ভ হোৱা আই পি এল ক্ৰমান্বয়ে বিশ্বৰ আটাইতকৈ জনপ্ৰিয় ফ্ৰেঞ্চাইজি প্ৰতিযোগিতাত পৰিণত হৈছে । উদ্বোধনী সংস্কৰণৰ চেম্পিয়ন হৈছিল ৰাজস্থান ৰয়েলছ । ২০২২ চনত আন এটা দলে এই তালিকাত যোগদান কৰে । যদিও এইটো উদ্বোধনী ছিজন নহয়, তথাপিও ই দলটোৰ অভিষেক ছিজন । ২০২২ চনৰ আই পি এলত দুটা নতুন ফ্ৰেঞ্চাইজি দল সংযোজন ঘটে । লক্ষ্ণৌ ছুপাৰ জায়েন্টছ আৰু গুজৰাট টাইটানছ ।

নতুন দল, তেনেকৈয়ে সংগঠিত হৈছিল গুজৰাট টাইটানছ । হাৰ্দিক পাণ্ডিয়াক অধিনায়ক হিচাপে নিযুক্তি দিয়া হয় । দলত এজাক তাৰকা । প্ৰাইম টাইম বলিংত মহম্মদ শ্বামী । শক্তিশালী দল । অভিষেক ছিজনতে আই পি এলৰ চেম্পিয়ন । টাইটানছৰ দলটো পিছৰ ছিজনত অৰ্থাৎ ২০২৩ চনতো ফাইনেলত প্ৰৱেশ কৰে । আই পি এলত যোগদান কৰিয়েই চেম্পিয়ন আৰু পিছৰবাৰ ৰানাৰ্ছ আপ হোৱাতো এটা দলৰ বাবে মুখৰ কথা নহয় ।

খেলুৱৈসকল সদায় চৰ্চাত থাকে । অৱশ্যে টাইটানছৰ মাষ্টাৰমাইণ্ডো আছে । আশীষ নেহৰা । নিলামৰ পৰা আৰম্ভ কৰি একচনলৈকে সকলোতে আছে । খেলুৱৈ নিৰ্বাচনত ভূমিকা পালন কৰে । কৌশল প্ৰস্তুত কৰাৰ পিছতো খেলৰ সময়ত তেওঁক আন এটা ভূমিকাত দেখা যায় । ঠিক যেনেকৈ ফুটবল প্ৰশিক্ষকৰ বিষয়ে কোৱা হৈছিল । পাৰ্থক্য মাথোঁ এইটোৱেই যে তেওঁক কোনো কাৰিকৰী ক্ষেত্ৰত আৱদ্ধ হৈ থাকিব নোৱাৰে ।

যদি অধিনায়কে লং অন ফিল্ডিং কৰি আছে তেন্তে প্ৰয়োজন হ’লে তালৈ গৈ কথা পাতিব পাৰে । যদিহে অধিনায়কে স্কোৱাৰ লেগ বাউণ্ডেৰীত ফিল্ড কৰে, তেন্তে ষ্ট্ৰেটেজিক টাইম আউটত কথা পাতে । খেলৰ সময়ত তেওঁক সকলো সময়তে সক্ৰিয় দেখা যায় । ধৰক ৰাণ খৰচ কৰি আত্মবিশ্বাসৰ অভাৱত ভুগিছে ​​এজন বলাৰে! যদি তেওঁ বাউণ্ডেৰী লাইনত থাকে, তেন্তে নেহৰাজী সেই ঠাইলৈ যায় । তেওঁৰ কান্ধত হাত থৈ কথা পাতে । বন্ধুৰ দৰে । যেন নেহৰাজীক ক্ৰিকেট খেলপথাৰত ফুটবল প্ৰশিক্ষকহে !