01 Aug 2025 20:38 PM
গুৱাহাটী মহানগৰীত সংঘটিত হোৱা হিট এণ্ড ৰান গোচৰত গ্ৰেপ্তাৰ হোৱা অভিনেত্ৰী নন্দিনী কাশ্যপক ১৪ দিনৰ ন্যায়িক জিম্মালৈ প্ৰেৰণ কৰা হৈছে। আজি মুখ্য ন্যায়িক দণ্ডাধীশৰ আদালতত হাজিৰ কৰোৱা হৈছিল নন্দিনী কাশ্যপক।
আৰক্ষীয়ে আদালতৰ সমুখত নন্দিনীক ৫ দিনৰ বাবে জিম্মাত বিচাৰি আবেদন জনাইছিল। অৱশ্যে আদালতে আৰক্ষীৰ এই আবেদন নাকচ কৰে আৰু আৰক্ষীৰ জিম্মাৰ পৰিৱৰ্তে নন্দিনীক ন্যায়িক জিম্মালৈ প্ৰেৰণ কৰে।
উল্লেখ্য যে যোৱা ২৫ জুলাইত গুৱাহাটী মহানগৰীত সংঘটিত হৈছিল এই ভয়ংকৰ হিট এণ্ড ৰাণ ঘটনা। অভিনেত্ৰী নন্দিনী কাশ্যপৰ দ্ৰুতবেগী গাড়ীয়ে মহতিয়াই নিছিল ছামিউল হক নামৰ এজন যুৱকক।
এই দুৰ্ঘটনা সংঘটিত কৰাৰ পিছতে নন্দিনী কাশ্যপে ছামিউলক সহায় কৰাৰ পৰিৱৰ্তে ঘটনাস্থলীৰ পৰাৰ পলায়ন কৰাৰ অভিযোগ উত্থাপন হৈছিল। ইফালে দুৰ্ঘটনাত গুৰুতৰভাৱে আহত ছামিউলে চিকিৎসাৰ সময়তে শেষ নিশ্বাস ত্যাগ কৰিছিল।
ইয়াৰ পিছতে আৰক্ষীয়ে নন্দিনী কাশ্যপক গ্ৰেপ্তাৰ কৰিছিল। তেওঁৰ বিৰুদ্ধে জামিনবিহীন ধাৰাত গোচৰ ৰুজু কৰে আৰক্ষীয়ে। এই ঘটনা সন্দৰ্ভত সম্প্ৰতি আৰক্ষীয়ে তদন্ত অব্যাহত ৰাখিছে।
