শীতকালত কলেষ্টেৰলৰ মাত্ৰা কিয় বৃদ্ধি পায় ? নিয়ন্ত্ৰণৰ বাবে এই খাদ্যবোৰ খাবলৈ আৰম্ভ কৰক

শীতকালত শৰীৰৰ অধিক যত্নৰ লোৱাৰ প্ৰয়োজন হয়। শীতকালত মানুহৰ স্বাস্থ্যৰ ৰুটিন প্ৰায়ে সলনি হয়, যাৰ ফলত বিভিন্ন স্বাস্থ্যজনিত সমস্যাৰ আশংকা বৃদ্ধি পায়। ইয়াৰে এটা হ’ল কলেষ্টেৰলৰ মাত্ৰা বৃদ্ধি, যিটো হৃদযন্ত্ৰৰ স্বাস্থ্যৰ বাবে চিন্তাৰ কাৰণ হ’ব পাৰে। ঠাণ্ডা বতৰে খাদ্যাভ্যাস, দৈনন্দিন কাম-কাজ, শৰীৰৰ কাৰ্যকলাপত পৰিৱৰ্তন আনে, যিয়ে স্বাস্থ্যৰ ওপৰত প্ৰভাৱ পেলায়। ফলস্বৰূপে শীতকালত কলেষ্টেৰল বৃদ্ধিৰ আশংকা বৃদ্ধি পায়। প্ৰথমে শীতকালত কলেষ্টেৰল বৃদ্ধিৰ লক্ষণসমূহ জানোঁ আহক।

শীতকালত কলেষ্টেৰলৰ মাত্ৰা বৃদ্ধি হ’লে শৰীৰে কেইবাটাও সংকেত দিয়ে। ইয়াৰ ভিতৰত ভাগৰুৱা, বুকুত গধুৰ অনুভৱ, উশাহ লোৱাত কষ্ট পোৱা আদি। বহুতে ব্যায়াম বা আনকি মধ্যমীয়া পৰিশ্ৰমৰ পিছত সোনকালে ভাগৰুৱা অনুভৱ কৰে। কিছুমান ক্ষেত্ৰত ভৰিৰ বিষ, ডিঙি বা কান্ধত জঠৰতা, মূৰটো গধুৰ গধুৰ অনুভৱ কৰিব পাৰে। এই লক্ষণসমূহে ইংগিত দিয়ে যে, শৰীৰত চৰ্বি আৰু কলেষ্টেৰলৰ মাত্ৰা বৃদ্ধি পাইছে আৰু ইয়াক তৎকালীনভাৱে নিয়ন্ত্ৰণ কৰাটো প্ৰয়োজন। শীতকালত কিয় এই বিপদ বৃদ্ধি পায়?

শীতকালত উচ্চ কলেষ্টেৰলৰ সম্ভাৱনা কিয় বৃদ্ধি পায়?

ৰাজীৱ গান্ধী চিকিৎসালয়ৰ হৃদৰোগ বিভাগৰ ডাঃ অজিত জৈনে বুজাই দিয়ে যে, শীতকালত উচ্চ কলেষ্টেৰলৰ আশংকা কেইবাটাও কাৰণত বৃদ্ধি পায়। শৰীৰে ঠাণ্ডাত শক্তি সংৰক্ষণ কৰিবলৈ চেষ্টা কৰে, যাৰ ফলত বিপাকীয় ক্ৰিয়া লেহেমীয়া হয় আৰু চৰ্বি জ্বলোৱা কম হয়। তদুপৰি ঠাণ্ডাৰ বাবে মানুহৰ কাম-কাজ আৰু শৰীৰ চৰ্চা কম হয়, যাৰ ফলত শৰীৰত চৰ্বি জমা হয়।

ভজা, মিঠা, গধুৰ খাদ্যৰ দৰে উচ্চ কেলৰিযুক্ত খাদ্য শীতকালত বেছিকৈ খোৱা হয়, যাৰ ফলত কলেষ্টেৰল বৃদ্ধি পায়। ইয়াৰ উপৰিও ঠাণ্ডা বতৰত হৰম’নৰ পৰিৱৰ্তন ঘটে যিয়ে যকৃতত কলেষ্টেৰল উৎপাদন ত্বৰান্বিত কৰিব পাৰে। ৰ’দৰ সংস্পৰ্শৰ অভাৱত ভিটামিন ডি হ্ৰাস পায়, যিয়ে কলেষ্টেৰলৰ ভাৰসাম্যত প্ৰভাৱ পেলায়।

কলেষ্টেৰল নিয়ন্ত্ৰণ কৰিবলৈ এই খাদ্যসমূহ খাদ্য তালিকাত অন্তৰ্ভুক্ত কৰক

ডাঃ অজিত জৈনে বুজাইছে যে, শীতকালত কলেষ্টেৰল নিয়ন্ত্ৰণ কৰিবলৈ লঘু, পুষ্টিকৰ আৰু আঁহযুক্ত খাদ্য খোৱাটো গুৰুত্বপূৰ্ণ। খাদ্যত ওটছ, দাইল, আৰু শাক-পাচলি অন্তৰ্ভুক্ত কৰক, কিয়নো এইবোৰে বেয়া কলেষ্টেৰল হ্ৰাস কৰাত সহায় কৰে। আলমণ্ড আৰু আখৰোটৰ দৰে বাদামত স্বাস্থ্যকৰ চৰ্বি থাকে আৰু ই হৃদযন্ত্ৰৰ স্বাস্থ্যৰ উন্নতি সাধন কৰে।

শণৰ গুটি, চিয়া গুটি আৰু ৰঙালাও গুটিত প্ৰচুৰ পৰিমাণে ওমেগা-৩ থাকে, যিবোৰ হৃদৰোগ স্বাস্থ্যৰ বাবে উপকাৰী। সেউজীয়া শাক-পাচলি আৰু ফল-মূলে শৰীৰক এন্টিঅক্সিডেন্ট প্ৰদান কৰে আৰু যকৃতৰ কাৰ্যক্ষমতা বৃদ্ধি কৰে। তেলৰ ক্ষেত্ৰত সৰিয়হৰ তেল খাব পাৰে।

এই কামবোৰ সদায় কৰক

দৈনিক কমেও ৩০ মিনিট লাহে লাহে খোজ কঢ়া বা ব্যায়াম কৰিব লাগে।

বিপাকীয় ক্ৰিয়া সক্ৰিয় কৰি ৰাখিবলৈ প্ৰচুৰ পৰিমাণে পানী খাব লাগে।

ভজা আৰু মিঠা খাদ্য কমকৈ খাব।

মানসিক চাপ নিয়ন্ত্ৰণৰ প্ৰতি মনোযোগ দিয়ক।

নিয়মিতভাৱে কলেষ্টেৰলৰ মাত্ৰা পৰীক্ষা কৰক।