ৰাজ্যপাল আৰু ৰাষ্ট্ৰপতিৰ সিদ্ধান্তৰ বিৰুদ্ধে উচ্চতম ন্যায়ালয়ৰ কাষ চাপিব নোৱাৰে ৰাজ্যইঃ কেন্দ্ৰ
ৰাষ্ট্ৰপতি বা ৰাজ্যপালৰ সিদ্ধান্তৰ বিৰুদ্ধে আবেদন দাখিল কৰাৰ অধিকাৰ ৰাজ্য চৰকাৰৰ নাই। এই কথা উচ্চতম ন্যায়ালয়ত জনাই কেন্দ্ৰ চৰকাৰে। বৃহস্পতিবাৰে ইয়াক লৈ শুনানি অনুষ্ঠিত হয়।
কেন্দ্ৰ চৰকাৰে উচ্চতম ন্যায়ালয়ত কয় যে, ৰাজ্যপাল আৰু ৰাষ্ট্ৰপতিৰ সিদ্ধান্তৰ বিৰুদ্ধে আদালতত আবেদন দাখিল কৰাৰ অধিকাৰ নাই ৰাজ্য চৰকাৰৰ। চৰকাৰে যুক্তি দিছে যে, ৰাজ্যৰাল আৰু ৰাষ্ট্ৰপতিৰ সিদ্ধান্তৰ বিৰোধিতা কৰাৰ মৌলিক অধিকাৰ ৰাজ্য চৰকাৰৰ নাই। ই কেৱল জনসাধাৰণক অধিকাৰ প্ৰদান কৰে। মুখ্য ন্যায়াধীশ বি আৰ গভাই, ন্যায়াধীশ সূৰ্য কান্ত, ন্যায়াধীশ বিক্ৰম নাথ, ন্যায়াধীশ পি এছ নৰসিংহ, ন্যায়াধীশ অতুল এছ চন্দুৰকাৰকে ধৰি ৫ জনীয়া বিচাৰপীঠত এই শুনানি অনুষ্ঠিত হয়। য’ত চৰকাৰৰ প্ৰতিনিধি হিচাপে উপস্থিত থাকে ছলিচিটৰ জেনেৰেল তুষাৰ মেহতা।
বৃহস্পতিবাৰে শুনানিৰ সময়ত কেন্দ্ৰ চৰকাৰে কয় যে, বিধানসভাই গৃহীত কৰা বিধেয়ক সন্দৰ্ভত ৰাষ্ট্ৰপতি বা ৰাজ্যপালে গ্ৰহণ কৰা সিদ্ধান্তৰ বিৰুদ্ধে ৰাজ্য চৰকাৰে উচ্চতম ন্যায়ালয়ত আবেদন দাখিল কৰিব নোৱাৰে। ইয়াৰ দ্বাৰা ৰাজ্য চৰকাৰে জনতাৰ মৌলিক অধিকাৰ খৰ্ব কৰে বুলি কয় তেওঁ।
তেওঁ আদালতত কয়, “ৰাষ্ট্ৰপতিয়ে জানিব বিচাৰে যে এখন ৰাজ্য চৰকাৰে ৩২ নং অনুচ্ছেদৰ ভিত্তিত উচ্চতম ন্যায়ালয়ত গোচৰ ৰুজু কৰিব পাৰে নেকি?” ইয়াৰ সমান্তৰালকৈ তেওঁ সংবিধানৰ ৩৬১ নং দফা শীৰ্ষ আদালতৰ সন্মুখত উত্থাপন কৰে। উল্লেখযোগ্য যে ইয়াৰ জৰিয়তে ৰাষ্ট্ৰপতি আৰু ৰাজ্যপালসকলে বিশেষ ক্ষমতা লাভ কৰে। ৰাজ্য চৰকাৰে নিজৰ কোনো সিদ্ধান্তৰ আধাৰত গোচৰ ৰুজু কৰিব নোৱাৰে।
তুষাৰ মেহতাই লগতে কয়, “৩২ নং অনুচ্ছেদে এজন ব্যক্তিক আদালতত গোচৰ ৰুজু কৰাৰ অধিকাৰৰ নিশ্চয়তা প্ৰদান কৰে। কিন্তু সংবিধানৰ অধীনত ৰাজ্য চৰকাৰৰ কোনো মৌলিক অধিকাৰ নাই।”
ইয়াৰ পূৰ্বেও কেন্দ্ৰই ৰাষ্ট্ৰপতি আৰু ৰাজ্যপালৰ ওপৰত কোনো সময়সীমা আৰোপ নকৰিবলৈ উচ্চতম ন্যায়ালয়ক অনুৰোধ জনাইছিল। এই ক্ষেত্ৰত বিধেয়কখনত অনুমোদন, প্ৰত্যাখ্যান বা কোনো ব্যৱস্থা গ্ৰহণৰ বিশেষ ক্ষমতাৰ কথা উল্লেখ কৰিছিল। তুষাৰ মেহতাই কয় যে সংবিধানৰ ২০০ নং অনুচ্ছেদে ৰাজ্যপালক বিধেয়ক গৃহীত কৰাৰ অধিকাৰ দিয়ে, লগতে ২০১ নং অনুচ্ছেদে ৰাজ্যপালক ৰাষ্ট্ৰপতিৰ বিবেচনাৰ বাবে বিধেয়ক স্থগিত কৰাৰ অধিকাৰ দিয়ে। ইয়াৰ পৰিৱৰ্তন কৰা সংবিধান পুনৰ লিখাৰ সমান।
এই সন্দৰ্ভত মুখ্য ন্যায়াধীশ গাভাই কয় যে, ৮ এপ্ৰিলত দুজন ন্যায়াধীশৰ সিদ্ধান্তৰ সন্দৰ্ভত তেওঁ কোনো মন্তব্য নকৰে। কিন্তু ৰাজ্যপালৰ বাবে ছমাহৰ বাবে বিধেয়ক বিচাৰাধীন ৰখাটো সঠিক নহয় বুলি তেওঁ কয়। ইয়াৰ উত্তৰত মেহতাই কয় যে, যদি কোনো সাংবিধানিক প্ৰতিষ্ঠানে নিজৰ কৰ্তব্য পালন নকৰে তেন্তে ইয়াৰ অৰ্থ এইটো নহয় যে আদালতে আন এখন সাংবিধানিক প্ৰতিষ্ঠানক নিৰ্দেশ দিব। উল্লেখ্য যে, এই সমগ্ৰ বিষয়টোত বৰ্তমান শুনানি অব্যাহত আছে।
অন্য খবৰ পঢ়কঃ National Sports Day 2025: ৩২০ কোটিৰ মালিক, ১২ কোটি দৰমহা! ভাৰতীয় ক্ৰিকেটৰ সবাতোকৈ ধনী প্ৰশিক্ষকগৰাকী কোন জানেনে?
