“স্বদেশী সামগ্ৰী অৱলম্বন কৰক, সকলো ভাষাক সন্মান কৰক”, দীপাৱলী উপলক্ষে দেশবাসীলৈ প্ৰধানমন্ত্ৰীৰ বিশেষ চিঠি

দেশবাসীলৈ প্ৰধানমন্ত্ৰীৰ দীপাৱলীৰ চিঠি

প্ৰধানমন্ত্ৰী নৰেন্দ্ৰ মোদীয়ে দীপাৱলী উপলক্ষে ভাৰতৰ নাগৰিকক আন্তৰিক শুভেচ্ছা জ্ঞাপন কৰি ইয়াক শক্তি আৰু উৎসাহেৰে ভৰা উৎসৱ বুলি অভিহিত কৰে। দেশবাসীলৈ উদ্দেশ্যি লিখা এখন পত্ৰত তেওঁ কয় যে অযোধ্যাত ৰাম মন্দিৰ নিৰ্মাণৰ পিছত এয়া দ্বিতীয়টো দীপাৱলী উদযাপন।

প্ৰধানমন্ত্ৰীগৰাকীয়ে ভগৱান ৰামৰ জীৱনৰ উদ্ধৃতি দি অপাৰেচন সেন্দূৰক প্ৰশংসা কৰে। তেওঁ কয় যে ই ধৰ্মৰ সমৰ্থন কৰে আৰু অন্যায়ৰ বিৰুদ্ধে প্ৰতিশোধ লয়।

তেওঁ লিখিছে, “ভগৱান শ্ৰীৰামে আমাক ধাৰ্মিকতা ৰক্ষা কৰিবলৈ শিকাই আৰু লগতে অন্যায়ৰ বিৰুদ্ধে যুঁজিবলৈও সাহস দিয়ে। আমি কেইমাহমান আগতে অপাৰেচন সেন্দূৰৰ সময়ত ইয়াৰ এক জীৱন্ত উদাহৰণ দেখিবলৈ পাইছো। অপাৰেচন সেন্দূৰৰ সময়ত ভাৰতে কেৱল ধাৰ্মিকতা ৰক্ষা কৰাই নহয়, অন্যায়ৰ প্ৰতিশোধো ল’লে।”

এই দীপাৱলীৰ তাৎপৰ্যৰ ওপৰত গুৰুত্ব আৰোপ কৰি প্ৰধানমন্ত্ৰীয়ে উল্লেখ কৰে যে নক্সালবাদ আৰু মাওবাদী সন্ত্ৰাসবাদ নিৰ্মূল হোৱা দুৰ্গম অঞ্চলকে ধৰি বহু জিলাক দীপাৱলীৰ চাকিয়ে আলোকিত কৰিছে।

তেওঁ হিংসা পৰিত্যাগ কৰি মূলসুঁতিত যোগদান কৰা, নক্সালবাদ পৰিত্যাগ কৰি সংবিধান আঁকোৱালি লোৱা ব্যক্তিসকলক প্ৰশংসা কৰে আৰু ভাৰতৰ বাবে ইয়াক এক “বৃহৎ কৃতিত্ব” বুলি অভিহিত কৰে।

“এই দীপাৱলী বিশেষভাৱে বিশেষ। কাৰণ, প্ৰথমবাৰৰ বাবে দেশৰ বহু জিলাত, দুৰ্গম অঞ্চলকে ধৰি বহু জিলাত চাকি জ্বলোৱা হৈছে। এইবোৰ জিলা য’ত নক্সালবাদ আৰু মাওবাদী সন্ত্ৰাসবাদৰ শিপা নিৰ্মূল কৰা হৈছে। শেহতীয়াকৈ বহু ব্যক্তিয়ে হিংসাৰ পথ পৰিত্যাগ কৰি উন্নয়নৰ মূলসুঁতিত যোগদান কৰা, আমাৰ দেশৰ সংবিধানৰ প্ৰতি বিশ্বাস প্ৰকাশ কৰা আমি দেখিবলৈ পাইছো। এইটো এটা ডাঙৰ কথা। দেশৰ বাবে কৃতিত্ব।’’ এইদৰে লিখিছে প্ৰধানমন্ত্ৰী মোদীয়ে।

প্ৰধানমন্ত্ৰী মোদীয়ে নৱৰাত্ৰিৰ প্ৰথম দিনটোত জি এছ টিৰ হাৰ কম কৰাকে ধৰি শেহতীয়া পৰৱৰ্তী প্ৰজন্মৰ সংস্কাৰৰ ওপৰতো গুৰুত্ব আৰোপ কৰে। পত্ৰখনত লিখা আছে, “এই ঐতিহাসিক সাফল্যৰ মাজতে দেশে যোৱা কিছুদিনত পৰৱৰ্তী প্ৰজন্মৰ সংস্কাৰৰ কামতো নামিছে। নৱৰাত্ৰিৰ প্ৰথম দিনটোত জি এছ টিৰ হাৰ কম কৰা প্ৰক্ৰিয়া কাৰ্যকৰী কৰা হ’ল। এই “জি এছ টি ৰেহায় উৎসৱ” (সঞ্চয় মহোৎসৱ)ৰ সময়ত নাগৰিকে হাজাৰ হাজাৰ কোটি টকা সঞ্চয় কৰিছে। একাধিক সংকটৰ মাজেৰে পাৰ হৈ যোৱা এখন পৃথিৱীত ভাৰতে স্থিৰতা আৰু সংবেদনশীলতা দুয়োটাৰে প্ৰতীক হিচাপে আত্মপ্ৰকাশ কৰিছে। আমি অদূৰ ভৱিষ্যতে বিশ্বৰ তৃতীয় বৃহত্তম অৰ্থনীতি হোৱাৰ পথত আগবাঢ়িছো।’’

প্ৰধানমন্ত্ৰীয়ে আৰু নাগৰিকসকলক “বিকশিত” (উন্নত) আৰু “আত্মনিৰ্ভৰ ভাৰত”ত অৰিহণা যোগাবলৈ আহ্বান জনায়। “স্বদেশী” সামগ্ৰী গ্ৰহণ কৰাত বিশেষ গুৰুত্ব আৰোপ কৰে মোদীয়ে।

এখন “বিকশিত” (উন্নত) আৰু “আত্মনিৰ্ভৰ ভাৰত”ৰ এই যাত্ৰাত নাগৰিক হিচাপে আমাৰ প্ৰাথমিক দায়িত্ব দেশৰ প্ৰতি আমাৰ কৰ্তব্য পালন কৰা। আহক আমি “স্বদেশী” সামগ্ৰী গ্ৰহণ কৰো আৰু গৌৰৱেৰে কওঁ: “এইটোৱেই স্বাধীনতা!” আহক আমি “এক ভাৰত, শ্ৰেষ্ঠ ভাৰত”ৰ মনোভাৱক প্ৰসাৰিত কৰোঁ। আহক আমি সকলো ভাষাকে সন্মান কৰো। আহক আমি পৰিষ্কাৰ-পৰিচ্ছন্নতা বজাই ৰাখোঁ। আহক আমি আমাৰ স্বাস্থ্যক অগ্ৰাধিকাৰ দিওঁ। আহক আমি আমাৰ খাদ্যত তেলৰ ব্যৱহাৰ ১০% হ্ৰাস কৰি যোগাভ্যাসক আকোৱালি লওঁ। এই সকলোবোৰ প্ৰচেষ্টাই আমাক দ্ৰুতগতিত “বিকশিত ভাৰত”ৰ দিশত আগুৱাই নিব,” তেওঁ পত্ৰখনত লগতে কয়।