অপাৰেচন সেন্দূৰত প্ৰথমবাৰৰ বাবে ৰেড টিমিং কৌশল ব্যৱহাৰ ভাৰতীয় সেনাৰ, পাকিস্তানৰ চিন্তাৰ বাহিৰত এই কৌশল

ভাৰতীয় সেনা

চলিত মাহৰ আৰম্ভণিতে পাকিস্তানত চলোৱা সামৰিক অভিযানত ভাৰতে প্ৰথমবাৰৰ বাবে ৰেড টিমিং কৌশল গ্ৰহণ কৰে । ৰেড টিমিং মানে শত্ৰুৰ দৰে চিন্তা কৰা আৰু পৰিকল্পনা পৰীক্ষা কৰাৰ বাবে এটা বিশেষ দল গঠন কৰা । শত্ৰুৰ দৰে কাম কৰিলে শত্ৰুৱে কেনে প্ৰতিক্ৰিয়া প্ৰকাশ কৰিব এই দলটোৱে সেয়া নীৰিক্ষণ কৰে । ইয়াৰ ফলত অপাৰেচনৰ প্ৰস্তুতি আৰু অধিক শক্তিশালী হয় ।

সেনা সূত্ৰৰ পৰা জানিব পৰা মতে, এইবাৰ অভিযানৰ পৰিকল্পনা কৰি থকাৰ সময়তে পাঁচজন জ্যেষ্ঠ বিষয়াৰ ৰেড টিম গঠন কৰা হয় । এই বিষয়াসকলক দেশৰ বিভিন্ন প্ৰান্তৰ পৰা লৈ যোৱা হৈছিল। ৰেড টিমিঙৰ এই কৌশল ইতিমধ্যে আমেৰিকা আৰু অন্যান্য সেনাই ব্যৱহাৰ কৰিছে । কিন্তু, এতিয়া ভাৰতত প্ৰথমবাৰৰ বাবে ইয়াক প্ৰকৃত কাৰ্যকলাপত চেষ্টা কৰা হৈছে ।

এই কৌশলৰ নাম বিদুৰ বক্তা
ভাৰতীয় সেনাই মহাভাৰতৰ বিদুৰৰ চৰিত্ৰৰ পৰা অনুপ্ৰাণিত হৈ এই কৌশলৰ নাম বিদুৰ বক্তা ৰাখিছে । বিদুৰৰ দৰে এজন জ্ঞানী উপদেষ্টাৰ দৰে এই দলটোৱেও অপাৰেচনৰ প্ৰতিটো কৌশলক প্ৰত্যাহ্বান জনায় আৰু সম্ভাৱ্য বিপদৰ কথা আঙুলিয়াই দিয়ে ।

বিগত বৰ্ষৰ অক্টোবৰ মাহত অনুষ্ঠিত হোৱা সেনা অধিনায়ক সন্মিলনৰ পিছত সেনাই এই দিশত পদক্ষেপ লৈছিল । এতিয়া ১৫ জন বিষয়াক ৰেড টিমিঙৰ বিশেষ প্ৰশিক্ষণ দিয়া হৈছে আৰু অহা দুবছৰত ইয়াক আৰু অধিক শক্তিশালী কৰাৰ পৰিকল্পনা কৰা হৈছে ।

ইয়াৰ উপৰিও সেনাই ইতিমধ্যে REDFOR নামৰ এটা ইউনিট চলাই আছে, যিয়ে অনুশীলনৰ সময়ত শত্ৰুৰ কৌশল অনুকৰণ কৰে, কিন্তু ৰেড টিমিং REDFORৰ পৰা পৃথক কাৰণ ই শত্ৰুৰ দৃষ্টিকোণৰ পৰা নিজৰ পৰিকল্পনা পৰীক্ষা কৰে । ইয়াৰ দ্বাৰা ভৱিষ্যতৰ অভিযান অধিক নিখুঁত আৰু ফলপ্ৰসূ হ’ব বুলি সেনাই বিশ্বাস কৰে ।

পৰিকল্পনা পৰীক্ষা
ইতিমধ্যে সেনাবাহিনীৰ ট্ৰেইনিং কমাণ্ড (ARTRAC)ৰ ভিতৰত এটা REDFOR (Red Army) ইউনিট আছে যাৰ মুখ্য কাৰ্যালয় শিমলাত আছে । যিয়ে যুদ্ধৰ পৰিকল্পনা আৰু চিমুলেচন পৰীক্ষা কৰাৰ দায়িত্ব লয়। সাধাৰণতে কাগজত বা বালিৰ মডেল ব্যৱহাৰ কৰি পৰীক্ষা চলোৱা হয় । ইয়াৰ দ্বাৰা এই অনুশীলনসমূহৰ পৰিকল্পনা আৰু নিষ্পাদন কৰা কাৰ্যসূচী নিৰ্ধাৰণ কৰা হয় ।

কিন্তু বিষয়াসকলে কয় যে REDFOR এ বিৰোধীৰ কৌশল অনুকৰণ কৰে আৰু ই প্ৰশিক্ষণৰ বাবে ব্যৱহৃত এক আহিলা । ৰেড টিমে নিজৰ পৰিকল্পনা আৰু শত্ৰুৰ ওপৰত ইয়াৰ প্ৰভাৱ তথা শত্ৰুৰ পৰা আশা কৰা ধৰণৰ সঁহাৰি প্ৰতিটো পদক্ষেপতে নিখুঁতভাৱে অধ্যয়ন কৰে ।