বিয়াৰ ৫ মাহৰ পিছত বিচাৰিছিল বিচ্ছেদ! চোতালত কাম কৰি অৱস্থাতে স্বামীৰ বৰ্বৰ কাণ্ড…

পত্নীক কুঠাৰেৰে কাটি হত্যা কৰিলে স্বামীয়ে

নৃশংসতাই অতিক্ৰম কৰিলে সকলো সীমা। পত্নীক কুঠাৰেৰে কাটি হত্যা কৰিলে স্বামীয়ে। জানিব পৰা মতে দম্পতীৰ বিবাহৰ মাত্ৰ পাঁচ মাহহে হৈছে। দুয়োৰে মাজত সকলো ভাল চলি থকা নাছিল। ফলস্বৰূপে বিয়াৰ মাত্ৰ কেইদিনমান পিছতে পত্নীয়ে স্বামীৰ ঘৰ এৰি পিতৃ-মাতৃৰ ঘৰলৈ উভতি যায়। হত্যাকাণ্ডৰ তিনিদিন পূৰ্বে থানাত স্বামীৰ বিৰুদ্ধে হাৰাশাস্তিৰ এজাহাৰ দাখিল কৰিছিল মহিলাগৰাকীয়ে।

কৰ্ণাটকৰ চিকমাগালুৰ চহৰৰ হাভৱল্লী গাঁৱৰ নেত্ৰাৱতীয়ে (৩৪) পাঁচ মাহ পূৰ্বে নবীন নামৰ এজন যুৱকৰ সৈতে বিবাহপাশত আবদ্ধ হৈছিল। বিয়াৰ পিছত হোৱা বিবাদৰ পিছত নেত্ৰৱতীয়ে স্বামীৰ ঘৰ এৰি পিতৃ-মাতৃৰ ঘৰলৈ উভতি আহে। নবীন আৰু নেত্ৰাৱতীৰ পৰিয়ালে দুয়োৰে মাজত মিলন ঘটাবলৈ চেষ্টা কৰিছিল যদিও কোনো ফল পোৱা নাছিল। পিছত নেত্ৰৱতীয়ে স্বামীৰ পৰা বিচ্ছেদ কৰাৰ সিদ্ধান্ত লৈছিল। তেওঁ বিবাহ বিচ্ছেদৰ বাবে আবেদন দাখিল কৰিবলৈ সাজু হৈছিল।

হত্যাকাণ্ডৰ তিনিদিন পূৰ্বে আলদুৰ থানাত স্বামী নবীনৰ বিৰুদ্ধে হাৰাশাস্তিৰ এজাহাৰ দাখিল কৰিছিল নেত্ৰাৱতীয়ে। অভিযোগৰ খবৰ পোৱাৰ লগে লগে নবীন আলদুৰৰ পৰা দুই কিলোমিটাৰ দূৰৈৰ হাৱল্লী গাঁৱৰ নেত্ৰৱতীৰ ঘৰলৈ যায়। য’ত তেওঁ পিছফালৰ চোতালত কাম কৰি আছিল। আৰক্ষীৰ অভিযোগ আৰু বিবাহ বিচ্ছেদৰ কথাত ক্ষুব্ধ হৈ স্বামীয়ে কুঠাৰেৰে আক্ৰমণ কৰি ডিঙি আৰু বুকুত আঘাত কৰে।

গুৰুতৰভাৱে আহত মহিলাগৰাকীক পৰিয়ালে চিকমাগালুৰ চহৰৰ মালেগৌডা চৰকাৰী চিকিৎসালয়লৈ লৈ যোৱা হয়। কিন্তু বাটতে তেওঁৰ মৃত্যু হয়। আলদুৰ আৰক্ষী থানাত অভিযুক্ত নবীনৰ বিৰুদ্ধে গোচৰ ৰুজু কৰি তেওঁৰ সন্ধান আৰম্ভ কৰিছে। তেওঁৰ সন্ধানত কেইবাটাও আৰক্ষীৰ দল মোতায়েন কৰা হৈছে।