ময়ো জে’ললৈ গৈছিলো, কিন্তু… সংসদত অমিত শ্বাহৰ প্ৰত্যুত্তৰ

সংসদত অমিত শ্বাহৰ প্ৰত্যুত্তৰ

বুধবাৰে লোকসভাত ১৩০ সংখ্যক সংবিধান সংশোধনী দাখিল কৰা হয়। ইয়াৰ মাজতে কেন্দ্ৰীয় গৃহমন্ত্ৰী অমিত শ্বাহ আৰু কংগ্ৰেছৰ সাধাৰণ সম্পাদক কে চি বেণুগোপালৰ মাজত তীব্ৰ বিতৰ্কৰ সৃষ্টি হয়। বেণুগোপালে কোৱা  বিশেষ কথাক লৈ কেন্দ্ৰীয় গৃহমন্ত্ৰীগৰাকীৰ খং উঠিল আৰু বেণুগোপালক সুধিলে যে আপুনি মোক নৈতিকতাৰ পাঠ শিকাব নেকি? বেণুগোপালে এনে কি কৈছিল?

কে চি বেণুগোপালে কি ক’লে?

১৩০ সংখ্যক সংশোধনী দাখিল কৰাৰ সময়ত অমিত শ্বাহক লৈ ব্যক্তিগত মন্তব্য কৰে কংগ্ৰেছৰ সাধাৰণ সম্পাদকে। ২০১০ চনৰ ছোহৰাবুদ্দিন শ্বেখৰ ভুৱা এনকাউণ্টাৰ গোচৰৰ কথা উল্লেখ কৰি তেওঁ কয় যে যেতিয়া এই ঘটনা সংঘটিত হৈছিল তেতিয়া শ্বাহ গুজৰাটৰ গৃহমন্ত্ৰী আছিল। তেতিয়া তেওঁক গ্ৰেপ্তাৰ কৰা হৈছিল। সেই সময়ত তেওঁ নৈতিকতা পালন কৰিছিল নে? কংগ্ৰেছৰ বেণুগোপালৰ এই বক্তব্যৰ পিছত সদনত বৃহৎ হুলস্থূলৰ সৃষ্টি হয়।

বেণুগোপালক শ্বাহৰ প্ৰত্যুত্তৰ

অমিত শ্বাহে কে চি বেণুগোপালক প্ৰত্যাক্ৰমণ কৰি কয়, “আপুনি মোক নৈতিকতাৰ পাঠ শিকাব নেকি?” কেন্দ্ৰীয় গৃহমন্ত্ৰীগৰাকীয়ে কয় “মোৰ বিৰুদ্ধেও গোচৰ ৰুজু হৈছিল আৰু ময়ো জে’ললৈ গৈছিলো। কিন্তু তাৰ আগতে মই পদত্যাগ কৰিছিলোঁ।” তেওঁ কয়, গোচৰ চলি থকা সময়লৈকে তেওঁ চৰকাৰৰ কোনো পদত অধিষ্ঠিত নাছিল।

সংবিধানৰ ১৩০ সংখ্যক সংশোধনীত কি আছে?

সংবিধানৰ ১৩০ সংখ্যক সংশোধনীৰ অধীনত মুখ্যমন্ত্ৰী, কেন্দ্ৰীয় মন্ত্ৰীৰ পৰা প্ৰধানমন্ত্ৰীলৈকে এই আইনৰ আওতালৈ আহিব। গ্ৰেপ্তাৰ বা আটক হ’লে মন্ত্ৰী আৰু মুখ্যমন্ত্ৰীক অপসাৰণ কৰিব পাৰি। ইয়াৰ উপৰিও ৩০ দিনৰ বাবে ন্যায়িক জিম্মাত থাকিলে মন্ত্ৰী পদ হেৰাই যাব। ৰাজনীতিত অপৰাধ ৰোধৰ দিশত চৰকাৰৰ এয়া এক ডাঙৰ পদক্ষেপ। ইয়াৰ বাহিৰেও যদি কোনো অপৰাধৰ বাবে গ্ৰেপ্তাৰ হোৱাৰ এমাহৰ ভিতৰত প্ৰধানমন্ত্ৰী, মুখ্যমন্ত্ৰী বা কেবিনেটৰ কোনো সদস্যই জামিন লাভ কৰাত ব্যৰ্থ হয়, তেন্তে তেওঁ পদত্যাগ কৰিব লাগিব।