Attack on Saif Ali Khan: আজিৰ তাৰিখত বলীউডৰ নবাব ছেইফৰ মুঠ সম্পত্তিৰ পৰিমাণ কিমান জানেনে ?

বলিউড অভিনেতা ছেইফ আলী খানৰ মুঠ সম্পত্তিৰ পৰিমাণ

বৃহস্পতিবাৰে পুৱা এটা খবৰে জোঁকাৰি গ’ল সমগ্ৰ দেশ । এই খবৰে প্ৰবল উদ্বেগ তথা চাঞ্চল্যৰ সৃষ্টি কৰিলে ভিন্ন মহলত । অবিশ্বাস্য এক খবৰ, কোনেও কাহানিও ভাবিব নোৱৰা এক ঘটনা । কেনেকৈ ঘটিবলৈ পালে এই ঘটনাটো, কোনেও একো বুজিবই নোৱাৰিলে ।

যোৱা নিশা নিজা বাসগৃহতে ছুৰীকাঘাতৰ বলি হয় বলীউদৰ নবাব খ্যাত ছেইফ আলী খান । কোনে কি কাৰণে ছুৰীৰে আক্ৰমণ চলালে অভিনেতাগৰাকীৰ ওপৰত, জানিলে আপুনিও হতবাক হৈ পৰিব ।

ছেইফৰ ঘৰত সোমাল চোৰ

জানিব পৰা মতে, যোৱা নিশা চোৰ সোমাল ছেইফৰ ঘৰত । কটকটীয়া নিৰাপত্তা বেষ্টনীৰ মাজত থকাৰ পাছতো অভিনেতাগৰাকীৰ ঘৰত চোৰ সোমোৱাটো অৱশ্যে ৰহস্যজনক । যি কি নহওক চোৰক বাধা দিবলৈ যাওঁতেই ছেইফক ছবাৰকৈ ছুৰীকাঘাত কৰে চোৰটোৱে । ইয়াৰে দুটা আঘাত গুৰুতৰ আছিল । কিন্তু তাৰ পাচত চোৰটোৱে কেনেকৈ লুকাবলৈ বা পলাবলৈ সক্ষম হল, তাকলৈও প্ৰশ্ন উঠিছে । সম্প্ৰতি চিকিৎসাধীন হৈ থকা ছেইফ বিপদমুক্ত বুলি জানিব পৰা গৈছে ।

ছেইফ হৈছে পাতাউদি পৰিয়ালৰ উত্তৰসূৰী। তেওঁৰ বিপুল পৰিমাণৰ সম্পত্তিৰ কথা সকলোৱেই জানে । বান্দ্ৰাৰ ফ্লেটত তেওঁৰ সৈতে থাকে পত্নী তথা অভিনেত্ৰী কৰীণা কাপুৰ খান আৰু দুই সন্তান । ঘৰটোত নিৰাপত্তাৰক্ষীও নিয়োজিত আছে । কিন্তু কেনেকৈ চোৰ সোমাবলৈ পালে আৰু ছেইফক আক্ৰমণ কৰি চোৰটো ক’ত অন্তৰ্ধান হ’ল তাৰ সেই বিষয়ে একো জানিব পৰা হোৱা নাই ।

ছেইফৰ সম্পত্তিৰ পৰিমাণ কিমান

CNBC TV-18 ৰ তথ্য অনুসৰি, ছেইফ আলী খানৰ মুঠ সম্পত্তিৰ পৰিমাণ আনুমানিক ১,৩০০ কোটি টকা । তেওঁৰ পত্নী তথা অভিনেত্ৰী কৰিণা কাপুৰ খানৰ মুঠ সম্পত্তিৰ পৰিমাণ প্ৰায় ৪৮৫ কোটি টকা । তেওঁলোক দুয়ো বলিউডৰ এক প্ৰভাৱশালী দম্পতী ।

ছেইফৰ আয়ৰ মূল উৎস হৈছে তেওঁৰ অভিনয় কেৰিয়াৰ, বিভিন্ন ব্ৰেণ্ডৰ বিজ্ঞাপন, ব্যক্তিগত বিনিয়োগ আৰু ব্যৱসায় । তেওঁ দুটাকৈ প্ৰডাকচন হাউচৰ স্বতাধিকাৰী । এই প্ৰডাকচন হাউচ দুটা ক্ৰমে ব্লেক নাইট ফিল্মছ আৰু ইলুমিনাটি ফিল্মছ । ২০২৩ চনৰ এক তথ্য অনুসৰি তেওঁ বছৰি প্ৰায় ৩০ কোটি টকা উপাৰ্জন কৰে আৰু সম্প্ৰতি নিজৰ পাৰিশ্ৰমিক প্ৰায় ৭০ শতাংশ বৃদ্ধি কৰিছে ।