Dharmendra: ৫১ টকাৰে আৰম্ভ হৈছিল ধৰ্মেন্দ্ৰৰ অভিনয় যাত্ৰা…জানক পঞ্জাৱৰ এখন গাঁৱৰ পৰা ছুপাৰষ্টাৰ হোৱাৰ কাহিনী

Legendary Actor Dharmendra Story

তাৰিখ ৪ নৱেম্বৰ, ১৯৬০। মুক্তি পাইছিল এখন বিশেষ ছবি। শিৰোনাম: দিল ভি তেৰা হম ভি তেৰে। অৰ্জুন হিংগোৰাণীৰ পৰিচালনাত নিৰ্মিত এই ছবিখনে বলীউডত এজন নতুন নায়কৰ প্ৰৱেশ ঘটিছিল। নায়কৰ নাম ধৰ্মেন্দ্ৰ সিং দেওল। যিয়ে নিমিষতে হৃদয় জয় কৰে আৰু তাৰ পিছত বলীউডৰ হি-মেনৰ খিতাপ অৰ্জন কৰে। সোমবাৰে তেওঁৰ স্বাস্থ্যৰ অধিক অৱনতি ঘটাৰ খবৰ পোহৰলৈ আহে। তেতিয়া তেওঁক ব্ৰিচ কেণ্ডি হাস্পতালত ভৰ্তি কৰা হয়। বৰ্তমান তেওঁ জীৱিত অৱস্থাত আছে বুলি সদৰি কৰিছে পৰিয়ালৰ লোকে।

ধৰ্মেন্দ্ৰৰ কাহিনী আৰম্ভ হৈছিল পঞ্জাৱৰ নছৰালী গাঁৱৰ পৰা। ১৯৩৫ চনৰ ৮ ডিচেম্বৰত এই গাঁৱতে জন্মগ্ৰহণ কৰা তেখেতে অতি কম বয়সৰ পৰাই ছবিৰ প্ৰতি আগ্ৰহী আছিল, আৰু এই কথা তেওঁ প্ৰায়ে মাতৃ সতৱন্ত কৌৰৰ সৈতে শ্বেয়াৰ কৰিছিল। অৱশ্যে ছবিৰ কেৰিয়াৰ গঢ়ি তোলাটো সহজ নাছিল।

২০০ টকাত গেৰেজত কাম কৰা

চিনেমাত কাম কৰাৰ হেঁপাহ লৈ মুম্বাইত উপস্থিত হোৱাৰ সময়ত তেওঁৰ হাতত জীৱন নিৰ্বাহৰ বাবে পইচা নাছিল, থাকিবলৈও ঠাই নাছিল। জীৱন নিৰ্বাহৰ বাবে তেওঁ গেৰেজত কাম কৰি ২০০ টকা উপাৰ্জন কৰিছিল। সেইখিনি টকাৰে তেওঁ জীৱন নিৰ্বাহ কৰিব পৰা নাছিল। গতিকে অভাৰটাইম কাম কৰি তাৰ পিছত ৰাতি একে ঠাইতে শুইছিল।

“দিল ভি তেৰা হম ভী তেৰে” ছবিখনৰ জৰিয়তে বলীউডত প্ৰৱেশৰ সময়ত তেওঁ কমেও ৫ হাজাৰ টকা উপাৰ্জন কৰাৰ আশা কৰিছিল। অৱশ্যে তেওঁ লাভ কৰিছিল মাত্ৰ ৫১ টকা। তেওঁক ৫১ টকা দিবলৈ তিনিজন লোকে ১৭ টকাকৈ বৰঙণি আগবঢ়ায়। এই মাচুল কম হ’লেও ধৰ্মেন্দ্ৰই সেই ৫১ টকাক যথেষ্ট ভাগ্যৰ কথা বুলি গণ্য কৰিছিল।

ধৰ্মেন্দ্ৰৰ প্ৰথম একচন ছবি

১৯৬৬ চনত “Phool Aur Patthar” নামৰ এখন চিনেমা মুক্তি পায়। এইখনেই আছিল তেওঁৰ প্ৰথম একচন ছবি। এই ছবিখনত ধৰ্মেন্দ্ৰৰ অভিনয়ক অতিশয় প্ৰশংসা কৰা হৈছিল। ইয়াৰ উপৰিও সেই বছৰৰ সৰ্বাধিক উপাৰ্জন কৰা ছবি হিচাপে পৰিগণিত হয়। ছবিখনৰ উপাৰ্জন তলত চাব পাৰিব। চলচ্চিত্ৰ – Phool Aur Patthar (১৯৬৬) বাজেট – ৭০ লাখ টকা ভাৰতত উপাৰ্জন – ২.৭০ কোটি (নেট) বিশ্বব্যাপী সংগ্ৰহ – ১৪.৪০ কোটি (স্থূল)

আমি সকলোৱে ধৰ্মেন্দ্ৰক নায়কৰ চৰিত্ৰত দেখিছো। অৱশ্যে এখন ছবি আছে য’ত তেওঁ খলনায়ক হিচাপে দৰ্শকৰ হৃদয় চুৰি কৰিছিল। সেই ছবিখন হৈছে “আয়ে মিলন কি বেলা,” ১৯৬৪ চনত মুক্তি পোৱা।এই ছবিখনৰ মুখ্য নায়ক আছিল ৰাজেন্দ্ৰ কুমাৰ, আৰু ধৰ্মেন্দ্ৰৰ ভূমিকা নেতিবাচক আছিল। অৱশ্যে ধৰ্মেন্দ্ৰৰ অভিনয়ে দৰ্শকৰ ওপৰত ইমানেই যাদুকৰী প্ৰভাৱ পেলাইছিল যে তেওঁ সকলোতে জনপ্ৰিয় হৈ পৰিছিল। ধৰ্মেন্দ্ৰই যেতিয়া বলীউডত কেৰিয়াৰ আৰম্ভ কৰিছিল, তেতিয়া তেওঁৰ নাম অভিনেত্ৰী মীনা কুমাৰীৰ সৈতে জড়িত আছিল। আনকি মীনা কুমাৰীয়ে ধৰ্মেন্দ্ৰক বলীউডৰ প্ৰধান অভিনেতা হিচাপে প্ৰতিষ্ঠা কৰাত সহায় কৰা বুলিও উৰাবাতৰিৰ সৃষ্টি হৈছিল। অৱশ্যে ধৰ্মেন্দ্ৰৰ ইতিমধ্যে বিয়া হৈছিল।

১৯ বছৰ বয়সত ধৰ্মেন্দ্ৰৰ প্ৰথম বিবাহ

বলীউডত প্ৰৱেশৰ পূৰ্বে ধৰ্মেন্দ্ৰৰ প্ৰথম বিবাহ হৈছিল। ১৯৫৪ চনত প্ৰকাশ কৌৰৰ সৈতে বিবাহপাশত আবদ্ধ হয়। বলীউডলৈ অহাৰ কেইবছৰমানৰ পাছত ধৰ্মেন্দ্ৰৰ নাম হেমা মালিনীৰ সৈতে জড়িত হৈ পৰিছিল। পিছলৈ ১৯৮০ চনত ধৰ্মেন্দ্ৰই দ্বিতীয়বাৰৰ বাবে হেমাক বিয়া কৰায়। ধৰ্মেন্দ্ৰই দ্বিতীয়বাৰৰ বিবাহৰ বাবে প্ৰথম পত্নীৰ সৈতে বিবাহ বিচ্ছেদ কৰা নাছিল। বৰঞ্চ ইছলাম ধৰ্ম গ্ৰহণ কৰি হেমা মালিনীক বিয়া কৰাইছিল।

হেমা মালিনীৰ সৈতে তেওঁৰ প্ৰেমৰ আৰম্ভণি

১৯৭৫ চনত ৰমেশ চিপ্পীৰ পৰিচালনাৰে “শ্বোলে” শীৰ্ষক এখন ছবি মুক্তি পায়। অমিতাভ বচ্চনৰ বিপৰীতে জয়া বচ্চন, ধৰ্মেন্দ্ৰৰ বিপৰীতে হেমা মালিনীক দেখা গৈছিল। হেমা আৰু ধৰ্মেন্দ্ৰৰ প্ৰেম কাহিনী আৰম্ভ হৈছিল এই ছবিখনৰ চেটত। ইয়াৰ উপৰিও কোৱা হয় যে যেতিয়া হেমা মালিনীৰ সৈতে তেওঁৰ দৃশ্যবোৰ শ্বুট কৰা হৈছিল তেতিয়া তেওঁ চেটত থকা লাইটমেনজনক উৎকোচ দিছিল যাতে তেওঁ লাইটবোৰক বিঘ্নিত কৰিব পাৰে, যাৰ ফলত তেওঁ হেমা মালিনীৰ সৈতে দৃশ্যটো পুনৰ শ্বুট কৰিব পাৰে।

ধৰ্মেন্দ্ৰৰ ১০ খন শ্ৰেষ্ঠ ছবি
অনুপমা (১৯৬৬)
Phool Aur Patthar (১৯৬৬)
সত্যকাম (১৯৬৯)
আয়া সাৱন ঝুম কে (১৯৬৯)
সীতা ঔৰ গীতা (১৯৭২)
ৰাজা জনী (১৯৭২)
য়াদন কি বাৰাত (১৯৭৩)
শ্বোলে (১৯৭৫)
চুপকে চুপকে (১৯৭৫)
ধৰম বীৰ (১৯৭৭)

ধৰ্মেন্দ্ৰৰ মাত্ৰ ১০খন ছবি বাছি উলিওৱাটো কঠিন, কিয়নো তেওঁৰ প্ৰতিখন ছবিতে এক অনন্য যাদু আছিল, প্ৰতিবাৰেই তেওঁ নিজৰ চৰিত্ৰবোৰক পৰ্দাত গুৰুত্বসহকাৰে চিত্ৰিত কৰিছিল। ৬৫ বছৰীয়া কেৰিয়াৰত তেওঁ ৩০০ৰো অধিক ছবিত অভিনয় কৰিছিল। তেওঁৰ কাম আৰু তেওঁ সদায় তেওঁৰ অনুৰাগীৰ হৃদয়ত জীয়াই থাকিব।