নিশা ৮ বজাৰ পিছত ঘৰত প্ৰৱেশ নিষেধ ! অমিতাভে কিয় এই নিয়ম প্ৰৱৰ্তন কৰিলে জানেনে?

অমিতাভ বচ্চনৰ কৰ্ম স্পৃহাৰ কথা সকলোৱে জানে। ৮০ বছৰ অতিক্ৰম কৰিও তেওঁ যিদৰে কঠোৰ পৰিশ্ৰম কৰে, সেয়া নৱপ্ৰজন্মৰ বাবে এক প্ৰেৰণা। অৱশ্যে ইয়াৰ আঁৰত লুকাই আছে তেওঁৰ কঠোৰ জীৱনশৈলী। নিশা ৮ বজাৰ পিছত অমিতাভ বচ্চনৰ ঘৰত কোনো অতিথি বা বাহিৰৰ মানুহ থাকিব নোৱাৰে। এই ক্ষেত্ৰত কঠোৰ নিষেধাজ্ঞা আছে অমিতাভৰ ঘৰত। কিয় এই অদ্ভুত নিয়ম? শেহতীয়াকৈ তেওঁৰ ঘনিষ্ঠ মহলৰ পৰা কিছু চাঞ্চল্যকৰ তথ্য পোহৰলৈ আহিছে।

অমিতাভ বচ্চনৰ মতে শৰীৰ সক্ৰিয় কৰি ৰাখিবলৈ উপযুক্ত সময়ত জিৰণি লোৱাৰ বিকল্প নাই। বহু বছৰ ধৰি তেওঁ এক নিৰ্দিষ্ট ৰুটিন মানি চলি আহিছে। মেগাষ্টাৰগৰাকীৰ ঘনিষ্ঠ লোকসকলৰ মতে, অমিতাভে নিশা ১০ বজাৰ ভিতৰত টোপনি অহাটো পছন্দ কৰে, যাতে তেওঁ পুৱা ৪ বজাত উঠি ব্যায়াম কৰিব পাৰে। ইয়াৰ পাছত তেওঁ কামৰ বাবে সাজু হয়। আৰু এই ৰুটিন বজাই ৰাখিবলৈ বাহিৰৰ কোনো মানুহে নিশা ৮ বজাৰ পিছত ঘৰত আড্ডা দিয়াটো তেওঁ ভাল নাপায়।

পেছাদাৰী জীৱনৰ বাহিৰে অমিতাভ এজন নিষ্ঠাবান পাৰিবাৰিক মানুহ। দিনটোৰ ব্যস্ততাৰ অন্তত ৰাতিৰ সময়খিনি কেৱল জয়া বচ্চন, অভিষেক, ঐশ্বৰ্য আৰু নাতিনীয়েক আৰাধ্যাৰ সৈতে কটাব বিচাৰে। বচ্চন পৰিয়ালৰ এটা অলিখিত নিয়ম হ’ল- সকলোৱে একেলগে ৰাতিৰ আহাৰ খায়। বাহিৰৰ কোনো লোক উপস্থিত থাকিলে পাৰিবাৰিক আলোচনা বিঘ্নিত হয়, যিটো অমিতাভে এৰাই চলিব বিচাৰে। সেয়েহে নিশা ৮ বজাতে অতিথিসকলক বিদায় দিয়া হয় আৰু এই নিয়ম মানি চলি অহা হৈছে।

অমিতাভৰ সহ অভিনেতা ৰাজা বুণ্ডেলাৰ পৰা আৰম্ভ কৰি বহুতে কৈছে যে, অমিতাভ বচ্চন সময়ক লৈ অতি কঠোৰ। শ্বুটিং চেটত যেনেকৈ এমিনিটৰ বাবেও দেৰি নহয়, ব্যক্তিগত জীৱনত সময় নষ্ট কৰাটোও তেওঁ নিবিচাৰে। নিশা ৮ বজাৰ পিছত ‘জলছা’ৰ দুৱাৰ বন্ধ হোৱাটো আচলতে তেওঁৰ অনুশাসনৰ অংশ।

বিগ বিৰ কঠোৰতাক লৈ বলীউডত এটা ধেমেলীয়া কথা আছিল – “সূৰ্যাস্তৰ পিছত অমিতাভ বচ্চন এতিয়া সাধাৰণ অভিনেতা নহয়, তেওঁ নিজৰ সাম্ৰাজ্যৰ কঠোৰ ৰক্ষক।” সূত্ৰই জনোৱা মতে, নিশা ৮ বজাৰ পিছত নিজৰ ঘৰৰ নিস্তব্ধতা অমিতাভে ভাল পায়। সেই সময়ত তেওঁ পিছদিনা শ্বুটিঙৰ বাবে সংলাপবোৰ মুখস্থ কৰে বা কিতাপ পঢ়ে। সেই সময়ত তেওঁ ফোনটোৰ পৰা আঁতৰি থাকে বুলিও কোৱা হয়।