আয়-ব্যয়ৰ হিচাপত আহিব ব্যাপক পৰিৱৰ্তন, এক ডাঙৰ সিদ্ধান্ত গ্ৰহণৰ দিশে কেন্দ্ৰ

প্ৰতীকী ছবি

অহা বছৰ ভাৰতৰ অৰ্থনৈতিক পৰিৱেশৰ ব্যাপক পৰিৱৰ্তন হ’ব। এই পৰিৱৰ্তনৰ বাবে চৰকাৰে প্ৰস্তুতি আৰম্ভ কৰিছে, যাৰ ফলত মানুহৰ আয়-ব্যয়ক নতুন ধৰণে হিচাপ কৰিব পৰা যাব। এই পৰিৱৰ্তনৰ অংশ হিচাপে বৰ্তমানৰ ছবিখন প্ৰতিফলিত কৰিবলৈ জিডিপি, মুদ্ৰাস্ফীতি আৰু ঔদ্যোগিক উৎপাদনৰ দৰে ডাঙৰ অৰ্থনৈতিক তথ্যসমূহ আপডেট কৰা হ’ব। তাৎপৰ্যপূৰ্ণভাৱে এটা নতুন সূচকাংকও প্ৰৱৰ্তন কৰা হ’ব যিয়ে দ্ৰুতগতিত বৃদ্ধি পোৱা সেৱা খণ্ডৰ অগ্ৰগতি অনুসৰণ কৰিব।

নতুন তথ্য, নতুন ভিত্তি বছৰ

বৰ্তমান প্ৰকাশ কৰা সকলো অৰ্থনৈতিক তথ্য ২০১১-১২ চনৰ ভিত্তি বছৰ অৰ্থাৎ সেই সময়ৰ মূল্যৰ ওপৰত ভিত্তি কৰি কৰা হৈছে। তেতিয়াৰ মানুহৰ খৰচৰ অভ্যাস আজিৰ তুলনাত বহুত বেলেগ আছিল। তেতিয়া খাদ্য আৰু পানীয়ৰ বাবে খৰচ বেছি আছিল যদিও এতিয়া স্মাৰ্টফোন, ইণ্টাৰনেট, ডিজিটেল সেৱা আমাৰ জীৱনৰ এটা ডাঙৰ অংশ হৈ পৰিছে। সেয়েহে চৰকাৰে ভিত্তি বছৰটো আপডেট কৰাৰ সিদ্ধান্ত লৈছে যাতে নতুন তথ্যই প্ৰকৃত পৰিস্থিতি সঠিকভাৱে প্ৰতিফলিত কৰে।

২০২২-২৩ চনৰ মূল্যৰ ভিত্তিত ২০২৬ চনৰ ২৭ ফেব্ৰুৱাৰীত প্ৰকাশ পাব নতুন জিডিপিৰ পৰিসংখ্যা। ইয়াৰ পূৰ্বে ৭ জানুৱাৰীত প্ৰকাশ পাবলগীয়া বাজেটৰ অনুমান এতিয়াও পুৰণি ভিত্তি বৰ্ষৰ ওপৰত ভিত্তি কৰি হ’ব। ২০২৩-২৪ বৰ্ষৰ মূল্যৰ প্ৰতি লক্ষ্য ৰাখি ফেব্ৰুৱাৰী মাহতো নতুন মুদ্ৰাস্ফীতিৰ পৰিসংখ্যা প্ৰকাশ কৰা হ’ব।

সেৱা খণ্ডৰ বাবে নতুন সূচী

ভাৰতৰ অৰ্থনীতিত সেৱা খণ্ডই উল্লেখযোগ্য ভূমিকা পালন কৰে যদিও এতিয়ালৈকে ইয়াক পৃথকে হিচাপ কৰাৰ কোনো নিৰ্দিষ্ট উপায় নাছিল। এই বছৰ প্ৰথমবাৰৰ বাবে ডিজিটেল, ল’জিষ্টিক আৰু অন্যান্য দ্ৰুতগতিত বৃদ্ধি পোৱা খণ্ডসমূহ অনুসৰণ কৰি নতুন সেৱা খণ্ডৰ সূচকাংক প্ৰৱৰ্তন কৰা হ’ব। এই পৰিৱর্তন প্রয়োজনীয়, কাৰণ এই খণ্ডসমূহে দেশৰ অর্থনৈতিক বিকাশত এক প্রধান অৰিহণা যোগায় ৷

মুদ্ৰাস্ফীতি আৰু ব্যয়ৰ তথ্য উন্নত কৰা

চৰকাৰ কেৱল জিডিপিতে সীমাবদ্ধ নহয়, বৰঞ্চ মুদ্ৰাস্ফীতিৰ জোখ-মাখ কৰা কনজিউমাৰ প্ৰাইচ ইনডেক্স (চিপিআই)ৰো উন্নতি সাধন কৰিছে। সামগ্রীৰ বৰ্তমানৰ মূল্য আৰু ওজন সংশোধন কৰা হ’ব। বিশেষকৈ ৰাজহুৱা বিতৰণ ব্যৱস্থাৰ জৰিয়তে লাভ কৰা খাদ্য শস্যৰ ব্যয় এতিয়া সঠিকভাৱে তথ্যত অন্তৰ্ভুক্ত কৰা হ’ব। অৰ্থাৎ মুদ্ৰাস্ফীতিৰ প্ৰকৃত প্ৰভাৱ এতিয়া ভালদৰে বুজিব পৰা হ’ব।

সাধাৰণ মানুহৰ উপকাৰ সাধন

এই পৰিৱৰ্তনে চৰকাৰক দেশৰ অৰ্থনৈতিক অৱস্থাৰ সঠিক আৰু শেহতীয়া তথ্য প্ৰদান কৰিব। ইয়াৰ দ্বাৰা এনে নীতি প্ৰণয়নত সহায়ক হ’ব যিয়ে জনসাধাৰণৰ দৈনন্দিন জীৱনৰ উন্নতি সাধন কৰিব। যেতিয়া মুদ্ৰাস্ফীতি আৰু জিডিপিৰ তথ্য সঠিক হ’ব তেতিয়া চৰকাৰে উন্নত সিদ্ধান্ত ল’ব পাৰিব, যিয়ে দেশৰ উন্নয়নত এক নতুন গতি প্ৰদান কৰিব।