ৰাইমনা ৰাষ্ট্ৰীয় উদ্যানত সন্দেহজনক চোৰাং চিকাৰী গ্ৰেপ্তাৰঃ উদ্ধাৰ হৰিণাৰ মাংস
ৰাইমনা ৰাষ্ট্ৰীয় উদ্যানত হৰিণাৰ মঙহসহ গ্ৰেপ্তাৰ হৈছে এজন সন্দেহযুক্ত চোৰাং চিকাৰী। চোৰাংচোৱাৰ পৰা লাভ কৰা তথ্যৰ ভিত্তিত বন বিভাগৰ এটা দলে অভিযান চলাই তেওঁক গ্ৰেপ্তাৰ কৰা বুলি জানিব পৰা গৈছে। সূত্ৰ অনুসৰি ধৃত লোকজনক আশ্বোৰ্চিং বসুমতাৰী বুলি চিনাক্ত কৰা গৈছে।
ৰাইমনা ৰাষ্ট্ৰীয় উদ্যানত সন্দেহজনক চোৰাং চিকাৰী গ্ৰেপ্তাৰ
বন বিভাগৰ চকুত ধূলি দি ৰাজ্যত অব্যাহত আছে চোৰাং চিকাৰীৰ দুষ্কৰ্ম। দুষ্কৃতিকাৰীৰ নৃশংসতাৰ চিকাৰ হৈছে নিৰীহ বন্য জন্তু। তাৰ মাজতে শুকুৰবাৰে ৰাইমনা ৰাষ্ট্ৰীয় উদ্যানত গ্ৰেপ্তাৰ হয় এজন সন্দেহযুক্ত চোৰাং চিকাৰী। প্ৰকাশিত খবৰ অনুসৰি, চোৰাংচোৱাৰ পৰা লাভ কৰা তথ্যৰ ভিত্তিত বন বিভাগৰ এটা দলে অভিযান চলাই গ্ৰেপ্তাৰ কৰে সন্দেহজনক লোকজনক। ধৃত লোকজনৰ নাম আশ্বোৰ্চিং বসুমতাৰী বুলি জানিব পৰা গৈছে।
সূত্ৰ অনুসৰি ধৃত আশ্বোৰ্চিং বসুমতাৰী কোকৰাঝাৰৰ গোসাঁইগাঁও অঞ্চলৰ নন্দিপুৰ গাঁৱৰ বাসিন্দা। অভিযানৰ সময়ত বন বিভাগৰ বিষয়াই বিপুল পৰিমাণৰ হৰিণৰ মাংসসহ গ্ৰেপ্তাৰ কৰে আশ্বোৰ্চিং বসুমতাৰীক। তেওঁৰ পৰা উদ্ধাৰ কৰা হৈছে প্ৰায় ১০ কিলোগ্ৰাম হৰিণাৰ মঙহ।
বন বিভাগৰ এগৰাকী বিষয়াই জানিবলৈ দিয়া মতে অভিযানৰ সময়ত আশ্বোৰ্চিং বসুমতাৰীৰ পৰা উদ্ধাৰ কৰা মঙহখিনিৰ পৰিমাণ পিছত পৰীক্ষা কৰা হয় আৰু এই পৰিমাণ প্ৰায় ১০ কিলোগ্ৰাম বুলি জানিব পৰা যায়। অভিযুক্ত বসুমতাৰীৰ হাতৰ পৰা এটা হৰিণৰ মূৰ উদ্ধাৰ হোৱা বুলিও জানিবলৈ দিয়ে বিষয়াগৰাকীয়ে।
ধৃত আশ্বোৰ্চিং বসুমতাৰী হাতী, হৰিণ আৰু অন্যান্য বন্যপ্ৰাণীৰ চোৰাং চিকাৰত জড়িত থকাৰ সন্দেহ প্ৰকাশ কৰিছে বন বিভাগে। ইতিমধ্যে তেওঁৰ বিৰুদ্ধে সংশ্লিষ্ট ধাৰাত গোচৰ ৰুজু কৰা হৈছে বুলি বন বিভাগে জানিবলৈ দিয়ে। লগতে অধিক তথ্য উদ্ধাৰৰ বাবে তদন্ত অব্যাহত ৰখা হৈছে বুলি বন বিভাগে সদৰী কৰে।
উল্লেখ্য যে ২০২১ চনৰ ৫ জুনত গুৱাহাটীৰ গান্ধী মণ্ডপত বিশ্ব পৰিৱেশ দিৱস উপলক্ষে মুখ্যমন্ত্ৰী হিমন্ত বিশ্ব শৰ্মাই ৰাইমনাক ৰাষ্ট্ৰীয় উদ্যান হিচাপে ঘোষণা কৰিছিল। ইয়াৰ পিছত একেটা বৰ্ষৰে ৯ জুনত অসম গেজেট অধিসূচনাৰ জৰিয়তে ৰাষ্ট্ৰীয় উদ্যান হিচাপে পৰিগণিত হৈছিল ৰাইমনা।
অসমৰ উত্তৰ-পশ্চিম অংশ আৰু পশ্চিম বংগ সীমান্তত অৱস্থিত ৰাইমনা ৰাষ্ট্ৰীয় উদ্যান কোকৰাঝাৰ জিলাৰ ইণ্ডো-ভূটান সীমান্তৰ সৈতে সংলগ্ন হৈ আছে। আনহাতে ভূটানৰ বিখ্যাত জিগমে চিংগে ৱাংচুক ৰাষ্ট্ৰীয় উদ্যান আৰু ফিবচু বন্যপ্ৰাণী অভয়াৰণ্যৰ সৈতে সংলগ্ন বনাঞ্চলৰ সীমান্তৱৰ্তী স্থানসমূহৰ সৈতে সংলগ্ন হৈ আছে ৰাইমনা ৰাষ্ট্ৰীয় উদ্যান।
ৰাইমনা ৰাষ্ট্ৰীয় উদ্যানৰ অন্যতম প্ৰধান আকৰ্ষণ হৈছে সোণালী বান্দৰ। ইয়াৰ উপৰিও হাতী, ঢেঁকীয়াপতীয়া বাঘ, নাহৰফুটুকী বাঘ, ফুটুকী হৰিণা, পানী ম’হ, ধনেশ পক্ষী, প্ৰায় ১৫০ৰো অধিক প্ৰজাতিৰ পখিলা, ১৭০ ৰো অধিক প্ৰজাতিৰ চৰাই তথা ৩৮০ বিধ বিভিন্ন প্ৰজাতিৰ উদ্ভিদ তথা অৰ্কিড পোৱা যায় ৪২২ কিলোমিটাৰজুৰি বিস্তৃত হৈ থকা এই ৰাষ্ট্ৰীয় উদ্যানখনত।