মন্দিৰৰ চৌহদলৈ কোনো হিন্দুৱে গো-মাংস দলিওৱা বুলি কেৱল ৰাহুল গান্ধীয়েহে বিশ্বাস কৰিব পাৰে: হিমন্ত বিশ্ব শৰ্মা

হিমন্ত বিশ্ব শৰ্মা

শেহতীয়াকৈ ৰাজ্যত ব্যাপক ৰূপত চৰ্চা লাভ কৰিছে অসমৰ ধুবুৰী জিলাত সংঘটিত এক ঘটনাই। এই ঘটনাৰ পৰিপ্ৰেক্ষিতত মুখ্যমন্ত্ৰীয়ে শ্বুট এট চাইটৰ নিৰ্দেশ দিবলৈ বাধ্য হৈছিল। ঘটনাটো আছিল ঈদ-উল-আজহাৰ পিছৰ। ধুবুৰী চহৰৰ এটা হনুমান মন্দিৰৰ সমীপত উদ্ধাৰ হয় গো-মাংস। গৰুৰ এটা কটা মূৰ উদ্ধাৰৰ পাচতেই অঞ্চলটোত ব্যাপক প্ৰতিক্ৰিয়াৰ সৃষ্টি হয়।

আইন-শৃংখলা নিয়ন্ত্ৰণৰ বাবে আৰক্ষীয়ে সতৰ্কতামূলক ব্যৱস্থা গ্ৰহণ কৰিবলগীয়া হয়। মুখ্যমন্ত্ৰীৰ নিৰ্দেশৰ পাচতে ধুবুৰী চহৰত আৰক্ষীৰ টহল আৰম্ভ হয় আৰু এনিশাৰ ভিতৰতে ৩৮ জন লোকক গ্ৰেপ্তাৰ কৰা হয়।

মঙলবাৰে ডিব্ৰুগড়ত সংবাদ মাধ্যমৰ সৈতে হোৱা এক বাৰ্তালাপত মুখ্যমন্ত্ৰী হিমন্ত বিশ্ব শৰ্মাই মন্দিৰৰ সমুখত গো-মাংস ৰাখি সামাজিক সম্প্ৰীতিত ব্যাঘাত জন্মাব বিচৰা ঘটনা সন্দৰ্ভত মন্তব্য কৰে। যিকোনো হিন্দুৱে এনে কাৰ্য সংঘটিত কৰিব পাৰে বুলি বিশ্বাস কৰাৰ আঁৰৰ যুক্তিক লৈ প্ৰশ্ন কৰাৰ লগতে কংগ্ৰেছে মূল দুষ্ট চক্ৰক ৰক্ষণাবেক্ষণ দিব খোজা বুলি অভিযোগ তোলে।

সংবাদ মাধ্যমৰ সৈতে হোৱা কথা-বতৰাত শৰ্মাই কয়, “হিন্দুৱে গৰু বধ কৰি মন্দিৰৰ সন্মুখত মূৰ ৰাখিব পাৰে বুলি যিসকলে বিশ্বাস কৰে, তেওঁলোক কোনো প্ৰতিক্ৰিয়াৰ যোগ্য নহয়। এইটোৱে সম্পূৰ্ণ বিকৃত মানসিকতাৰ প্ৰতিফলন ঘটায়।”

এই কাৰ্যৰ আঁৰত বিজেপি-আৰএছএছ বা হিন্দু গোট থকাৰ সম্ভাৱনাক উলাই কৰি তেওঁ কয়, ‘‘বিজেপি-আৰএছএছৰ সদস্য বা হিন্দুৱে তেওঁলোকৰ বিশ্বাসৰ ইমান পৰস্পৰ বিৰোধী কাম কেনেকৈ কৰিব পাৰে? বাকী গৰুৰ অৱশিষ্টৰ কথা কি ক’ব? আমি ঈদৰ পিছতে জন্তুটোৰ সকলো অংশ উদ্ধাৰ কৰিলোঁ। আনকি স্থানীয় বাসিন্দাসকলেও স্বীকাৰ কৰে যে এয়া অঞ্চলটোক বিপথে পৰিচালিত কৰা একাংশ যুৱকৰ কাণ্ড।”

সামাজিক সম্প্ৰীতি বিঘ্নিত কৰাসকলৰ পক্ষ লোৱাৰ অভিযোগ উত্থাপন কৰি মুখ্যমন্ত্ৰীয়ে কংগ্ৰেছ নেতা ৰাহুল গান্ধীকো চোকা সমালোচনা কৰে। শৰ্মাই মন্তব্য কৰে, “কংগ্ৰেছে সদায় এনে উপাদানসমূহক সুৰক্ষা দিবলৈ চেষ্টা কৰি আহিছে। এয়া ৰাহুল গান্ধীৰ মানক প্ৰথাত পৰিণত হৈছে—তেওঁ প্ৰায়ে বিভাজনমূলক উদ্দেশ্যেৰে মানুহক ৰক্ষা কৰে, আৰু তেনে কৰাৰ ফলত সাম্প্ৰদায়িক ঐক্যৰ তন্ত্ৰ দুৰ্বল হৈ পৰে।”