মিঞাক ১ টকা কমাই দিলে অসমীয়া মানুহ ধনী নহয়! মুখ্যমন্ত্ৰীক কটাক্ষ কংগ্ৰেছ নেতা পৱন খেৰাৰ

মুখ্যমন্ত্ৰীক কটাক্ষ পৱন খেৰাৰ

মুখ্য়মন্ত্ৰী হিমন্ত বিশ্ব শৰ্মাৰ বক্তব্যক লৈ ৰাজ্যজুৰি ব্যাপক প্ৰতিক্ৰিয়া। প্ৰায়েই মিঞা সম্প্ৰদায় সন্দৰ্ভত বিভিন্ন মন্তব্য কৰা দেখা যায় বিজেপি দলৰ আন নেতা-কৰ্মীৰ লগতে মুখ্যমন্ত্ৰী হিমন্ত বিশ্ব শৰ্মাক। নিৰ্বাচন চমু চাপি অহাৰ লগে লগে মিঞা বিৰুদ্ধে মন্তব্য অধিক তীক্ষ্ণ হৈ পৰিছে মুখ্যমন্ত্ৰীৰ।

বুধবাৰে ডিমৌত এক জনসভাত পুনৰ মিঞাৰ বিৰুদ্ধে এক মন্তব্য কৰা দেখা গ’ল হিমন্ত বিশ্ব শৰ্মাক। মিঞা ৰিক্সাৱালাক ৫ টকা ভাড়া হ’লে ৪ টকা দিবলৈ ৰাইজক আহ্বান জনোৱা দেখা গ’ল মুখ্যমন্ত্ৰীয়ে। এই বক্তব্য প্ৰকাশৰ পাছতেই বিভিন্নজনে প্ৰতিক্ৰিয়া প্ৰকাশ কৰা পৰিলক্ষিত হৈছে। সংবাদ মাধ্যমৰ পৰা সামাজিক মাধ্যমলৈকে মুখ্যমন্ত্ৰীৰ মন্তব্যৰ সপক্ষে আৰু বিপক্ষে বিভিন্ন আলোচনা দেখা গৈছে।

ইফালে মুখ্যমন্ত্ৰীৰ বক্তব্যক লৈ প্ৰতিক্ৰিয়া প্ৰকাশ কৰিছে কংগ্ৰেছ দলেও। এই বিতৰ্কত অংশ লৈছে কংগ্ৰেছৰ ৰাষ্ট্ৰীয় পৰ্যায়ৰ নেতাই। জ্যেষ্ঠ কংগ্ৰেছ নেতা পৱন খেৰাই এই বক্তব্যৰ বাবে তীক্ষ্ণ সমালোচনা কৰিছে মুখ্যমন্ত্ৰী হিমন্ত বিশ্ব শৰ্মাক। তেওঁৰ বক্তব্যক “তুচ্ছ আৰু বিভাজনমূলক” বুলি অভিহিত কৰি মুখ্যমন্ত্ৰীৰ বিৰুদ্ধে গুৰুতৰ অৰ্থনৈতিক আৰু ভূমি সম্পৰ্কীয় চিন্তাৰ পৰা মনোযোগ আঁতৰাই ৰাজ্যবাসীক বিপথে পৰিচালিত কৰাৰ অভিযোগ উত্থাপন কৰিছে পৱন খেৰাই।

ছ’চিয়েল মিডিয়া প্লেটফৰ্ম এক্সত দিয়া এটা পোষ্টত খেৰাই “মিঞা”সকলক মজুৰি কমকৈ দিয়া সন্দৰ্ভত ডঃ শৰ্মাৰ মন্তব্যক সমালোচনা কৰি যুক্তি দি কয় যে এনে বক্তব্যই অসমৰ প্ৰকৃত সমস্যাৰ সমাধান নকৰে, জনসাধাৰণৰ অৰ্থনৈতিক অৱস্থাও উন্নত নকৰে। “মিঞাক ৫ টকাৰ সলনি ৪ টকা দিলে অসমৰ জনসাধাৰণ ধনী নহয়” বুলি উল্লেখ কৰি খেৰাই শাসন ব্যৱস্থাৰ সমস্যাৰ সন্মুখত এই বিতৰ্কক অপ্ৰয়োজনীয় বুলি দাবী কৰে।

ষষ্ঠ অনুসূচীৰ অধীনত সংৰক্ষিত ১.৫ লাখ বিঘাৰো অধিক মাটি কৰ্পৰেটলৈ হস্তান্তৰ কৰা বুলি অভিযোগ উত্থাপন কৰি এনে ইংগিত আৰু উচটনিমূলক বাক্যবাণে অসমৰ অৰ্থনীতি শক্তিশালী কৰিব নোৱাৰে বুলি কয় কংগ্ৰেছ নেতাগৰাকীয়ে। তেওঁ লগতে দাবী কৰে যে অসমীয়াৰ অস্তিত্বৰ সংকট বুলি অভিহিত কৰা এনে কাৰ্যই ৰাজ্যখনৰ অৰ্থনৈতিক আৰু সাংস্কৃতিক ভেটি দুৰ্বল কৰি তুলিছে।

মুখ্যমন্ত্ৰীক প্ৰত্যক্ষভাৱে লক্ষ্য কৰি খেৰাই বিজেপি চৰকাৰৰ বিৰুদ্ধে ব্যাপক আৰ্থিক অপব্যৱহাৰৰ অভিযোগ উত্থাপন কৰে। ৰাজহুৱা সম্পদৰ অপব্যৱহাৰৰ অভিযোগ উত্থাপন কৰি তেওঁ কয় যে, “১ টকাত মানুহক আবদ্ধ কৰি নাৰাখিব। অসমৰ জনসাধাৰণৰ পৰা নিজৰ পকেটলৈ যি হাজাৰ কোটি টকা সৰকাইছে সেই কথা কওক।”

শেহতীয়াভাৱে শৰ্মাই মিঞা সম্প্ৰদায় (অসমত থকা পূৰ্ব বংগীয় মূলৰ মুছলমানসকল) ৰ ওপৰত হেঁচা প্ৰয়োগ কৰিবলৈ আহ্বান জনোৱা আৰু তেওঁলোকক কম মজুৰি দিবলৈ পৰামৰ্শ দিয়া বক্তব্যক লৈ সৃষ্টি হোৱা বিতৰ্কৰ মাজতে এই মন্তব্য কৰিছে পৱন খেৰাই। নিৰ্বাচনী তালিকাৰ পুনৰীক্ষণকে ধৰি তেওঁৰ এই কাৰ্যৰ উদ্দেশ্য “অসমীয়া আধিপত্য দৃঢ় কৰা” বুলিও উল্লেখ কৰিছিল মুখ্যমন্ত্ৰীয়ে। এই মন্তব্যই ব্যাপক ৰাজনৈতিক প্ৰতিক্ৰিয়াৰ সূচনা কৰিছে।

ইফালে, অসমৰ নিৰ্বাচনী তালিকাৰ বিশেষ সংশোধন (এছ আৰ)ক লৈ বিৰোধী দল আৰু নাগৰিক সমাজৰ গোটৰ সমালোচনাৰ সন্মুখীন হৈছে বিজেপি চৰকাৰ। এই প্ৰক্ৰিয়াত গুৰুতৰ অনিয়মৰ অভিযোগ উত্থাপন কৰিছে বিৰোধীয়ে। দাবী উত্থাপন হৈছে যে এই অনুশীলনত বিসংগতিৰ সৃষ্টি হৈছে, ভোটাৰ তালিকাৰ পৰা প্ৰকৃত নাগৰিকৰ নাম বাদ পৰাৰ অভিযোগ উত্থাপন হৈছে, যাৰ ফলত বাসিন্দাসকলৰ মাজত হাৰাশাস্তি আৰু অনিশ্চয়তাৰ সৃষ্টি হৈছে।

ক্ৰমবৰ্ধমান বাক্যযুদ্ধই অসমৰ ৰাজনৈতিক মেৰুকৰণ গভীৰ হৈ পৰাৰ ওপৰত আলোকপাত কৰিছে, বিৰোধীয়ে ৰাজ্য চৰকাৰক সামাজিক আৰু পৰিচয়ভিত্তিক উত্তেজনা জগাই শাসনৰ জৰুৰী প্ৰত্যাহ্বানৰ পৰা বিচ্যুত হোৱাৰ অভিযোগ উত্থাপন কৰিছে।