বানৰ লগতে গুৱাহাটীত ভয়ংকৰ ভূমিস্খলন, ৫ গৰাকীয়ে হেৰুৱালে প্ৰাণ

গুৱাহাটীত কৃত্ৰিম বান

ধাৰাসাৰ বৰষুণৰ ফলত জলমগ্ন হৈ পৰিছে গুৱাহাটী মহানগৰ । শুকুৰবাৰৰ দিনটোত গুৱাহাটীৰ বিভিন্ন অঞ্চলৰ ৰাজপথত সাগৰ সদৃশ পৰিস্থিতিৰ উদ্ভৱ হয় । ৰাজপথতেই আবদ্ধ হ’ব লগীয়া হয় অফিচ-কাছাৰী, স্কুল-কলেজলৈ যোৱা লোকসকল । তাৰ মাজতেই গুৱাহাটীৰ একাধিক স্থানত সংঘটিত হয় ভূমিস্খলনৰ ঘটনাও । প্ৰাপ্ত তথ্য মতে গুৱাহাটী মহানগৰীত ভূমিস্খলনৰ ফলত ৫ গৰাকীকৈ লোকে প্ৰাণ হেৰুৱাইছে । ইতিমধ্যে গুৱাহাটী মহানগৰীৰ লগতে সমগ্ৰ ৰাজ্যতে জাৰী কৰা হৈছে ৰেড এলাৰ্ট ।

গুৱাহাটীত কৃত্ৰিম বান

প্ৰাপ্ত তথ্য অনুসৰি গুৱাহাটীৰ খাৰঘূলি, চপাইদাং, কামাখ্যা আদিত ভূমিস্খলন সংঘটিত হৈছে । খাৰঘূলিৰ চপাইদাঙত পাহাৰৰ পৰা খহি অহা মাটি আৰু শিল-বালিয়ে হেঁচা মাৰি ধৰাত পুনম গোস্বামী আৰু নীলাক্ষী গোস্বামী নামৰ মাতৃ-কন্যাই প্ৰাণ হেৰুৱাইছে । সেই অঞ্চলতে ভূমিস্খলনৰ ফলত ৰঞ্জিতা বড়ো নামৰ এগৰাকী ৫ বছৰীয়া কণমানিয়েও মৃত্যুক সাৱটি লয় ।

দাতালপাৰা অঞ্চলতো আন এজন লোকৰ মৃত্যুৰ খবৰ পোৱা গৈছে । দীপজ্যোতি বড়ো নামৰ লোকজনৰ ঘৰখন ভূমিস্খলনৰ ফলত ধ্বংস হোৱাৰ লগতে তেওঁ মৃত্যুক সাৱটি লয় । ইফালে, মালিগাঁৱতো ভূমিস্খলনৰ ফলত এজন লোকৰ মৃত্যু হয় । স্বাগত হাস্পতালৰ সমীপত পাহাৰৰ মাটি খহি হেঁচা মাৰি ধৰাত আহত হয় ৰবিন দাস নামৰ লোকজন । তেওঁক ততাতৈয়াকৈ হাস্পতালত ভৰ্তি কৰোৱা হয় যদিও তেওঁৰ মৃত্যু ঘটে ।

গুৱাহাটীৰ ৰাজপথত সাগৰ সদৃশ পৰিস্থিতি

বানৰ ফলত কামাখ্যা, খাৰঘুলি, গড়চুক, চন্দ্ৰপুৰ, বোণ্ডা, নুনমাটিকে ধৰি চহৰখনৰ কেইবাটাও অঞ্চলত ব্যাপক ধ্বংসলীলা হৈছে । ভূমিস্খলনৰ ফলত বহুতৰে ঘৰ-দুৱাৰৰ ব্যাপক ক্ষতি সাধন হৈছে ।

উদ্ধাৰ আৰু সাহায্য অভিযানৰ বাবে জৰুৰীকালীন দল আৰু দুৰ্যোগ সঁহাৰি কৰ্মী নিয়োগ কৰা হৈছে । প্ৰভাৱিত অঞ্চলত বাস কৰা বাসিন্দাসকলক তৎকালীনভাৱে ঘৰৰ পৰা ওলাই আহিবলৈ আহ্বান জনাইছে কৰ্তৃপক্ষই । বিদ্যালয়সমূহ বন্ধ ঘোষণা কৰা হৈছে, আৰু ক্ষতিগ্ৰস্ত স্থানীয় অঞ্চলসমূহৰ যাতায়ত ব্যৱস্থা ব্যাহত হৈ পৰিছে ।

ৰাইজক অপ্ৰয়োজনীয়ভৱে ঘৰৰ পৰা ওলাই নাহিবলৈ নিৰ্দেশ

প্ৰবল বৰষুণ অব্যাহত থকাৰ আগজাননী প্ৰদান কৰা হৈছে । বিভাগীয় বিষয়াসকলে পাহাৰৰ ঢাল আৰু নগৰীয়া নিষ্কাশন ব্যৱস্থাসমূহ তীক্ষ্ণভাৱে নিৰীক্ষণ কৰি আছে যাতে অধিক ক্ষতি ৰোধ কৰিব পৰা যায় ।

অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই অঞ্চলটোৰ বাবে ৰেড এলাৰ্ট জাৰি কৰি অনাগত দিনত আৰু অধিক ভূমিস্খলন আৰু ক্ষন্তেকীয়া বাঢ়নী পানীৰ সতৰ্কবাণী প্ৰকাশ কৰিছে ।