আয়তকৈ কেইবা গুণ বেছি সম্পত্তি, দুৰ্নীতিৰ মাষ্টৰ ! ২০১৯ চনৰ পৰা ৰাজ্যত কিমান চৰকাৰী কৰ্মচাৰী গ্ৰেপ্তাৰ হ’ল ? জানেনে

আয় যিমান, তাতকৈ কেইবা গুণ বেছি তেওঁলোকৰ সম্পত্তি। ইয়াৰ অধিকাংশই দুৰ্নীতিৰ মাষ্টৰ ! তেওঁলোক চৰকাৰী কৰ্মচাৰী। ২০১৯ চনৰ পৰা অসমত কিমানজন চৰকাৰী কৰ্মচাৰী দুৰ্নীতি অভিযোগ গ্ৰেপ্তাৰ হৈছে জানেনে ? চৰকাৰী নথিত পোহৰলৈ আহিছে আচৰিত ধৰণৰ তথ্য। যিটো জানিলে আপোনাৰ চকু কপালত উঠিব।

চৰকাৰী তথ্য ২০১৯ চনৰ পৰা দুৰ্নীতিৰ অভিযোগত ৰাজ্যত ৪৩০ জন চৰকাৰী কৰ্মচাৰীক গ্ৰেপ্তাৰ কৰাৰ বিপৰীতে আন ২৫ জন কৰ্মচাৰীক অসমতাপূৰ্ণ সম্পত্তি গঢ়াৰ অপৰাধত গ্ৰেপ্তাৰ কৰা হৈছে। চৰকাৰী তথ্য উল্লেখ কৰা হৈছে যে, অধিকাংশ গোচৰ বিচাৰধীন হৈ আছে আৰু এতিয়ালৈকে কোনো এজন লোক দোষী সাব্যস্ত হোৱা নাই।

দুৰ্নীতি প্ৰতিৰোধ আইনৰ অধীনত ৰখা ৪৩০ জন বিষয়া-কৰ্মচাৰীৰ ভিতৰত ৰাজ্যৰ আৰক্ষীৰ ভিজিলেন্স আৰু দুৰ্নীতি নিবাৰক শাখাই ৩০২ জন লোকক গ্ৰেপ্তাৰ কৰিছে, মুখ্যমন্ত্ৰীৰ স্পেচিয়েল ভিজিলেন্স চেলে ৮৮ জন লোকক গ্ৰেপ্তাৰ কৰিছে আৰু ৰাজ্যৰ বিভিন্ন থানাত ৪০ জন লোকক গ্ৰেপ্তাৰ কৰা হৈছে। এই ধৃত কৰ্মচাৰীসকলৰ ভিতৰত ২৩ জনক চাকৰিৰ পৰা বৰ্খাস্ত কৰা হৈছে।

চৰকাৰী নথিত কোৱা হৈছে যে, গ্ৰেপ্তাৰ কৰা কৰ্মচাৰীসকলৰ বিৰুদ্ধে ন্যায়িক কাৰ্য্যবিধি চলি আছে যদিও এতিয়ালৈকে কোনো এজন দোষী সাব্যস্ত কৰা হোৱা নাই।

ইয়াত লগতে কোৱা হৈছে যে, গ্ৰেপ্তাৰ হোৱা এই কৰ্মচাৰীসকলৰ ভিতৰত ২৯১ জনৰ বিৰুদ্ধে অভিযোগনামা দাখিল কৰা হৈছে। ২০১৯ চনৰ পৰা ২৫ জন কৰ্মচাৰীক নিজৰ আয়ত কৈ অধিক টকাৰ পাহাৰ গঢ়াৰ অপৰাধত গ্ৰেপ্তাৰ কৰা হৈছে আৰু তেওঁলোকৰ বিৰুদ্ধে অভিযোগনামা দাখিল কৰা হৈছে। কোৱা হৈছে যে, নিয়ম অনুসৰি তেওঁলোকৰ বিৰুদ্ধে বিভাগীয় ব্যৱস্থা অব্যাহত আছে।