অসম চুক্তি ৰূপায়ণ সন্দৰ্ভত কেবিনেট উপ-সমিতিৰে আছুৰ বৈঠক, ৮ আগষ্টৰ পূৰ্বে দাখিল হ’ব চূড়ান্ত প্ৰতিবেদন

অসম চুক্তি ৰূপায়ণ সন্দৰ্ভত কেবিনেট উপ-সমিতিৰে আছুৰ বৈঠক

অসম চুক্তি ৰূপায়ণ সন্দৰ্ভত সম্পন্ন হৈছে কেবিনেট উপ-সমিতিৰে আছুৰ বৈঠক। মন্ত্ৰী অতুল বৰাৰ অধ্যক্ষতাত সম্পন্ন হ’ল এই বৈঠক। উক্ত বৈঠকতে ছাত্ৰ সন্থাই অসম চুক্তিৰ প্ৰতিটো দফা সন্দৰ্ভত পুংখানুপুংখকৈ লিখিত প্ৰস্তাৱ দাখিল কৰে। লগতে  অসম চুক্তিৰ ৬নং দফাৰ দৰেই ৭নং দফা ৰূপায়ণৰ বাবেও এক উচ্চস্তৰীয় সমিতি গঠনৰ বাবে দাবী জনাই ছাত্ৰ সন্থাই। ৮ আগষ্টৰ পূৰ্বে দাখিল হ’ব কেবিনেট উপ-সমিতিৰ চূড়ান্ত প্ৰতিবেদন।

বুধবাৰে অসম চৰকাৰৰ মন্ত্ৰী অতুল বৰাই মুখ্যমন্ত্ৰী ড০ হিমন্ত বিশ্ব শৰ্মাৰ দূৰদৰ্শী নেতৃত্বত ঐতিহাসিক অসম চুক্তিৰ মূল বিধান বিশেষকৈ ৬ নং দফা কাৰ্যকৰী কৰাৰ ক্ষেত্ৰত ৰাজ্য চৰকাৰৰ অদম্য দায়বদ্ধতাৰ কথা পুনৰবাৰ উল্লেখ কৰে। জনতা ভৱনত অনুষ্ঠিত অসম চুক্তি ৰূপায়ণৰ উপ-সমিতিৰ ষষ্ঠ বৈঠকৰ পাছত সংবাদ মাধ্যমক সম্বোধন কৰি বৰাই কয়  “চুক্তিখনত কল্পনা কৰা ধৰণে অসমীয়া জনসাধাৰণৰ সাংস্কৃতিক, ভাষিক, আৰু সামাজিক সুৰক্ষাক চৰকাৰে অগ্ৰাধিকাৰ দিছে।”

সামাজিক মাধ্যমত এক পোষ্ট শ্বেয়াৰ কৰি মন্ত্ৰীগৰাকীয়ে কয়,  “মাননীয় মুখ্যমন্ত্ৰী ড° হিমন্ত বিশ্ব শৰ্মা ডাঙৰীয়াৰ দূৰদৰ্শী নেতৃত্বত অসম চৰকাৰে ৰাজ্যখনৰ খিলঞ্জীয়া লোকসকলৰ অধিকাৰ সুৰক্ষিত আৰু সামগ্ৰিক বিকাশ সুনিশ্চিত কৰাৰ বাবে নিৰন্তৰ প্ৰচেষ্টা অব্যাহত ৰাখিছে। এই দিশত এক গুৰুত্বপূৰ্ণ পদক্ষেপ হৈছে ঐতিহাসিক অসম চুক্তিৰ বিভিন্ন দফাসমূহৰ ফলপ্ৰসূ আৰু ক্ষিপ্ৰ ৰূপায়ণ।” তেওঁ কয়,  আজি গুৱাহাটীৰ জনতা ভৱনত অসম চুক্তি ৰূপায়ণৰ উপ-সমিতিৰ ষষ্ঠ বৈঠকখনি অনুষ্ঠিত হয়। সদৌ অসম ছাত্ৰ সন্থা (আছু)ৰ শীৰ্ষ নেতৃবৰ্গ আৰু অসম চুক্তি ৰূপায়ণ বিভাগৰ জ্যেষ্ঠ বিষয়াসকলৰ উপস্থিতিত বৈঠকখনিত আমি অংশগ্ৰহণ কৰোঁ।”