ডিব্ৰুগড়ত বুঢ়া লুইতৰ খহনীয়া প্ৰতিৰোধৰ দাবীত আছুৰ ১২ ঘণ্টীয়া অনশন

আছুৰ অনশন

ডিব্ৰুগড়ত ভাবুকিৰ সৃষ্টি কৰা ব্ৰহ্মপুত্ৰৰ গৰাখহনীয়াক লৈ উদ্বেগ বৃদ্ধি পোৱাৰ সময়তে সদৌ অসম ছাত্ৰ সন্থাৰ ডিব্ৰুগড় সমিতিয়ে ১৯ জানুৱাৰী সোমবাৰে পুলবাগানত ১২ ঘণ্টীয়া অনশন কাৰ্যসূচী ৰূপায়ণ কৰে। জলসম্পদ বিভাগে খহনীয়া প্ৰতিৰোধী ব্যৱস্থাৰ ক্ষেত্ৰত “দুৰ্নীতি আৰু উদাসীন পন্থা” গ্ৰহণ কৰা বুলি অভিযোগ তুলি প্ৰতিবাদ সাব্যস্ত কৰে সংগঠনটোৰ নেতা-কৰ্মীয়ে।

ছাত্ৰ সংগঠনটোৱে অভিযোগ কৰে যে মাইজানৰ পৰা বগীবিললৈকে পথৰ কাষৰ গুৰুত্বপূৰ্ণ খহনীয়া প্ৰতিৰোধী কামসমূহ বিগত এসপ্তাহ ধৰি কোনো আনুষ্ঠানিক জাননী অবিহনে স্থবিৰ হৈ আছে। আছুৰ নেতাসকলৰ মতে, এই পলমে পুনৰবাৰ হাজাৰ হাজাৰ বাসিন্দাক ভূমিহীন হোৱাৰ ভাবুকিৰ সন্মুখীন কৰাইছে, যিটো সংকটে বছৰৰ পিছত বছৰ ধৰি অঞ্চলটোক জুৰুলা কৰি আহিছে।

প্ৰতিবাদৰ সময়ত আছুৰ এগৰাকী সদস্যই কয়, ‘‘প্ৰতি বছৰে ইয়াৰ মানুহে খহনীয়াৰ ফলত নিজৰ মাটি হেৰুৱায়। বাৰম্বাৰ আশ্বাস দিয়াৰ পিছতো খহনীয়া প্ৰতিৰোধী কামৰ গতি অত্যন্ত লেহেমীয়া হৈ আহিছে। যোৱা এসপ্তাহ ধৰি কাম সম্পূৰ্ণৰূপে বন্ধ হৈ গৈছে, আৰু বিভাগটোৱে কোনো তথ্য দিয়া নাই।’’

পৰিস্থিতিৰ ভয়াৱহতাক আলোকপাত কৰি আছুৱে দৃঢ়তাৰে কয় যে ডিব্ৰুগড়ৰ বাবে খহনীয়া অন্যতম ডাঙৰ ভাবুকি হিচাপে পৰিগণিত হৈছে, ব্ৰহ্মপুত্ৰই বসতিপ্ৰধান অঞ্চললৈ ভাবুকি মাতিছে। সংগঠনটোৱে কয় যে নদীৰ পাৰৰ সুৰক্ষা দীৰ্ঘদিনীয়া দাবী আৰু তেওঁলোকে একাধিক মঞ্চত এই বিষয়টো ধাৰাবাহিকভাৱে উত্থাপন কৰি আহিছে।

ছাত্ৰ নেতাগৰাকীয়ে লগতে কয়, “খহনীয়া ঋতুভিত্তিক সমস্যা নহয়, বৰঞ্চ ডিব্ৰুগড়বাসীৰ বাবে এক স্থায়ী সংকট। ব্ৰহ্মপুত্ৰই প্ৰতি বছৰে মাটি খাই গৈ আছে, তথাপিও সুনিৰ্দিষ্ট, দীৰ্ঘম্যাদী সমাধান গ্ৰহণ কৰা হোৱা নাই।”

স্থানীয় বিধায়ক প্ৰশান্ত ফুকনক লক্ষ্য কৰি আছুৱে সক্ৰিয় হস্তক্ষেপৰ অভাৱৰ অভিযোগ উত্থাপন কৰে। সংগঠনটোৱে দাবী কৰে যে, ‘‘ডিব্ৰুগড়ৰ বিধায়কগৰাকীয়ে সংকটৰ সমাধানৰ বাবে কোনো অৰ্থপূৰ্ণ প্ৰচেষ্টা গ্ৰহণ কৰা আমি প্ৰত্যক্ষ কৰা নাই। বাৰিষাৰ সময়ত তেওঁ ভ্ৰমণ কৰে, অঞ্চলটো নিৰাপদ বুলি ঘোষণা কৰে, আৰু গুচি যায়। অৱশ্যে বাস্তৱতাই একেবাৰে বেলেগ কাহিনী কয়, কিয়নো খহনীয়া অবিৰতভাৱে অব্যাহত আছে।’’

তৎকালীনভাৱে খহনীয়া প্ৰতিৰোধী কাম আৰম্ভ কৰি স্থায়ী সুৰক্ষা ব্যৱস্থা নিশ্চিত কৰিবলৈ কৰ্তৃপক্ষক সকীয়াই দি অনাগত দিনত আন্দোলন তীব্ৰতৰ কৰিবলৈ বাধ্য হ’ব বুলি হুংকাৰ দিয়ে সংগঠনটোৱে।