অসমত অবৈধ বসতি কোনো কাৰণতে গ্ৰাহ্য নহয়: ১৯ জন অবৈধ অনুপ্ৰৱেশকাৰীক বাংলাদেশলৈ বিতাড়ন

অবৈধ অনুপ্ৰৱেকাৰীক বিতাড়ন

অসমৰ নিৰাপত্তা বাহিনীয়ে ৰাজ্যৰ বিভিন্ন প্ৰান্তৰ পৰা ১৯ জন অবৈধ অনুপ্ৰৱেশকাৰীক আটক কৰি বাংলাদেশলৈ ঘূৰাই পঠিয়াইছে বুলি ২১ ডিচেম্বৰ দেওবাৰে ঘোষণা কৰে মুখ্যমন্ত্ৰী হিমন্ত বিশ্ব শৰ্মাই। মুখ্যমন্ত্ৰীৰ মতে, নগাঁও আৰু কাৰ্বি আংলং জিলাত চলোৱা যৌথ অভিযানৰ সময়ত ব্যক্তিকেইজনক আটক কৰি ৰখা হৈছিল। এই অভিযানত অসম আৰক্ষী আৰু সীমান্ত সুৰক্ষা বাহিনী চমুকৈ বি এছ এফৰ যৌথ প্ৰচেষ্টা জড়িত হৈ আছে।

এক্সত এই তথ্য প্ৰকাশ কৰি শৰ্মাই কয় যে, সমন্বিত কাৰ্যৰ ফলত অনুপ্ৰৱেশকাৰীসকলক ভাৰতীয় ভূখণ্ডৰ পৰা সফলভাৱে আঁতৰাই পেলোৱা হয়। তেওঁ অবৈধ অনুপ্ৰৱেশৰ বিৰুদ্ধে ৰাজ্য চৰকাৰৰ স্থিতি দৃঢ় বুলি দৃঢ়তাৰে কয় আৰু অসমত অবৈধভাৱে থকাটো সহ্য কৰা নহ’ব বুলি সকীয়াই দিয়ে।

এই অভিযানৰ অংশ হিচাপে প্ৰতি সপ্তাহত গড়ে ৩৫ৰ পৰা ৪০ জন অবৈধ অনুপ্ৰৱেশকাৰীক উভতাই পঠিওৱা বুলি দাবী কৰি শৰ্মাই বাৰে বাৰে অসম চৰকাৰ অনুপ্ৰৱেশমুক্ত ৰাজ্য নিশ্চিত কৰাৰ বাবে প্ৰতিশ্ৰুতিবদ্ধ বুলি উল্লেখ কৰে।

অক্টোবৰ মাহত অসম কেবিনেটে অবৈধ অনুপ্ৰৱেশকাৰীক ক্ষিপ্ৰতাৰে বহিষ্কাৰ কৰাৰ লগতে চুবুৰীয়া দেশৰ পৰা অব্যাহত থকা অনুপ্ৰৱেশ ৰোধ কৰিবলৈ জিলা উপায়ুক্ত আৰু জ্যেষ্ঠ আৰক্ষী অধীক্ষকসকলক ক্ষমতা প্ৰদান কৰাৰ লক্ষ্যৰে অনুপ্ৰৱেশকাৰী (অসমৰ পৰা বহিষ্কাৰ) আইন, ১৯৫০ৰ অধীনত ষ্টেণ্ডাৰ্ড অপাৰেটিং প্ৰচিডিউৰ (এছ অ’ পি) প্ৰণয়নত অনুমোদন জনায়।

ইফালে, বিশেষকৈ বিগত এবছৰৰ পৰা চুবুৰীয়া দেশখনত সৃষ্টি হোৱা অশান্তিৰ পৰিপ্ৰেক্ষিতত উত্তৰ-পূবৰ ১৮৮৫ কিলোমিটাৰ দৈৰ্ঘ্যৰ ভাৰত–বাংলাদেশ সীমান্তত বি এছ এফে চোৰাংচোৱাগিৰি তীব্ৰতৰ কৰি তুলিছে। অসম আৰক্ষীৰ বিষয়াসকলে নিশ্চিত কৰিছে যে অবৈধ প্ৰৱেশ ৰোধৰ বাবে সীমান্ত অঞ্চলত অধিক সতৰ্কতা বজাই ৰখা হৈছে। কৰ্তৃপক্ষই পুনৰ কয় যে বৈধ নাগৰিকত্বৰ নথি-পত্ৰ নথকা ব্যক্তিক তৎক্ষণাত আটক কৰি আইন অনুসৰি নিজ দেশলৈ উভতাই পঠোৱা হ’ব।