টোপনিতো কঁপি উঠে পাকিস্তানৰ সেনাপ্ৰধান, বুলেটপ্ৰুফ জেকেট পিন্ধিহে মাৰে টোপনি!

পাকিস্তানৰ একনায়কত্ববাদীৰ পৰা সেনাধ্যক্ষলৈ পৰিণত হোৱা অসীম মুনিৰে অহৰহ ভয়ত জীয়াই আছে। ইমানেই ভয় যে ঘৰত সদায় এটা পিষ্টল ৰাখে। তদুপৰি যিকোনো অপ্ৰীতিকৰ ঘটনাৰ পৰা নিজকে ৰক্ষা কৰিবলৈ মুনিৰে বুলেটপ্ৰুফ জেকেট ব্যৱহাৰ কৰে। শুই থকাৰ সময়তো পিন্ধে বুলি চৰ্চা চলিছে।

ইয়াৰ উপৰিও মুনিৰে শোৱাৰ সময়ত তেওঁৰ গেটত নিৰাপত্তাৰক্ষীৰ ব্যৱস্থা কৰে, যাতে কোনোৱে লুকাই চুৰকৈ সোমাই আক্ৰমণ নকৰে। পাকিস্তানত ক্ষমতা লাভ কৰাৰ পিছৰে পৰা মুনিৰে জিয়া-উল-হকৰ দৰে ভাগ্যৰ আশংকা কৰিছে। ১৯৮৮ চনত পাকিস্তানৰ তেতিয়াৰ সামৰিক একনায়কত্ববাদী জিয়া উল হকৰ বিমান দুৰ্ঘটনাত মৃত্যু হয়। পাকিস্তানৰ কাৰিকৰী দোষৰ বাবেই এই দুৰ্ঘটনা বুলি কোৱা হৈছিল যদিও এতিয়া ইচ্ছাকৃতভাৱে সংঘটিত হোৱা বুলি বহুলভাৱে অনুমান কৰা হৈছে।

প্ৰশিক্ষণ বিষয়াৰ ওপৰত কোনো আস্থা নাই

মুনিৰে নিজৰ নিৰাপত্তাৰ পৰা আঁতৰাই পেলাইছে প্ৰশিক্ষণ বিষয়াক। মুনিৰে তেওঁলোকক বিশ্বাস নকৰে। ইমৰাণ খানৰ প্ৰাক্তন উপদেষ্টা শ্বাহজাদ আকবৰৰ মতে, অসীম মুনিৰক সুৰক্ষা দিবলৈ কেৱল প্ৰবীণ আৰু নিষ্ঠাবান জোৱানহে নিয়োগ কৰা হৈছে। তেওঁ কটুভাৱে মন্তব্য কৰিছিল যে আটাইতকৈ ভয় খোৱা ব্যক্তিজন হ’ল যিজনে নিজৰ বাবে চিৰস্থায়ী আইনী ৰক্ষাকৱচ লাভ কৰিছে।

পিটিআই নেতাৰ মতে মুনিৰে বহিঃৰাজ্যৰ পাকিস্তানীৰ কণ্ঠকহে বেছি ভয় কৰে। মুনিৰে পাকিস্তানৰ কৰ ধন ব্যৱহাৰ কৰি বহিঃৰাজ্যত নিজৰ বাবে লবী কৰে। পাকিস্তানী সাংবাদিক মইদ পিৰজাদাইও শ্বাহজাদ আনোৱাৰৰ এই দাবীক সমৰ্থন কৰে। পিৰজাদাই কয় যে মুনিৰে সদায় গুলী ভৰ্তি পিষ্টল লৈ ফুৰে।

অসীম মুনিৰৰ নিৰাপত্তা কেনেকুৱা?

সেনা প্ৰধান হিচাপে অসীম মুনিৰে পাকিস্তানত ভিআইপি নিৰাপত্তা লাভ কৰে। মুনিৰৰ নিৰাপত্তা ব্যৱস্থা চাৰি স্তৰৰ। প্ৰথম স্তৰত বিশেষ নিৰাপত্তা বিভাগৰ কৰ্মী থাকে। পাকিস্তানৰ এই ইউনিটত ১৫ হাজাৰ জোৱান আছে। কিন্তু মুনিৰৰ সুৰক্ষাৰ বাবে কিমানজন জোৱান নিয়োগ কৰা হৈছে তাৰ তথ্য ৰাজহুৱাভাৱে উপলব্ধ নহয়।

পাকিস্তানৰ সংসদে অসীম মুনিৰক ফিল্ড মাৰ্শ্বাল উপাধি প্ৰদান কৰিছে। তদুপৰি মুনিৰক তিনিওটা সশস্ত্ৰ বাহিনীৰ মুৰব্বী হিচাপে নিযুক্তি দিয়া হৈছে। পাৰমাণৱিক অস্ত্ৰ সম্পৰ্কীয় সিদ্ধান্ত লোৱাৰ কৰ্তৃত্বও মুনীৰক দিয়া হৈছে।