ট্ৰাম্পৰ ডাঙৰ ঘোষণা, তামৰ ওপৰত ৫০% শুল্ক, ঔষধৰ ওপৰতো ২০০% শুল্ক আৰোপ কৰাৰ প্ৰস্তুতি

ট্ৰাম্পৰ ডাঙৰ ঘোষণা

Trump Tariff: ৰাষ্ট্ৰপতি ড’নাল্ড ট্ৰাম্পে পুনৰবাৰ শুল্কৰ বোমাৰে সমগ্ৰ বিশ্বক কঁপাই তুলিছে। ৮ জুলাইত কেবিনেট বৈঠকত তেওঁ ঘোষণা কৰিছিল যে তাম আমদানিৰ ওপৰত ৫০% শুল্ক আৰোপ কৰা হ’ব। ইয়াৰ ফলত আমেৰিকাত এই ঔদ্যোগিক ধাতুটো ব্যয়বহুল হৈ পৰিব। কেৱল এয়াই নহয়, ফাৰ্মা খণ্ডও ট্ৰাম্পৰ শুল্কৰে আগুৰি ধৰিব। ঔষধৰ ওপৰত ২০০% শুল্ক আৰোপ কৰাৰ কথাও কৈছে ট্ৰাম্পে।

ট্ৰাম্পে কয় যে অতি সোনকালে, হয়তো এবছৰৰ পিছত ঔষধৰ ওপৰত ২০০% শুল্ক আৰোপ কৰা হ’ব। আমেৰিকাৰ বাণিজ্য নীতি আৰু অধিক উন্নত কৰাৰ লগতে আমেৰিকাৰ স্বাৰ্থ শক্তিশালী কৰাৰ বাবে এই পদক্ষেপ গ্ৰহণ কৰা হৈছে। ইয়াৰ পূৰ্বে ট্ৰাম্পে প্ৰায় সকলো বাণিজ্যিক অংশীদাৰৰ আমদানিৰ ওপৰত ১০% শুল্ক আৰোপ কৰাৰ কথা ঘোষণা কৰিছিল, যিটো ১ আগষ্টৰ পৰা কাৰ্যকৰী হ’ব।

কোনবোৰ দেশৰ ওপৰত কিমান শুল্ক?

ট্ৰাম্পে নিজৰ ছ’চিয়েল মিডিয়াত এটা পোষ্টত স্পষ্টভাৱে উল্লেখ কৰিছিল যে, তেওঁৰ সিদ্ধান্তত কোনো পৰিৱৰ্তন নহ’ব। শুল্কৰ ক্ষেত্ৰতো কাকো কোনো ধৰণৰ ৰেহাই দিয়া নহ’ব। এই সপ্তাহত জাপান, দক্ষিণ কোৰিয়া, ইণ্ডোনেছিয়া, বাংলাদেশ, থাইলেণ্ড, দক্ষিণ আফ্ৰিকা আৰু মালয়েছিয়া আদি দেশলৈ শুল্কৰ অধিসূচনা প্ৰেৰণ কৰা হৈছে। জাপান আৰু দক্ষিণ কোৰিয়াৰ ওপৰত ২৫% শুল্ক আৰোপ কৰা হ’ব, আনহাতে বাকী দেশসমূহৰ ওপৰত ২৫%ৰ পৰা ৪০% শুল্ক নিৰ্ধাৰণ কৰা হৈছে।

ট্ৰাম্পৰ সকীয়নি

ট্ৰাম্পে সকীয়াই দিছে যে, যদি কোনো দেশে ট্ৰেন্সশ্বিপিং কৰিবলৈ চেষ্টা কৰে (তৃতীয় দেশৰ মাজেৰে সামগ্ৰী প্ৰেৰণ কৰি শুল্কৰ পৰা ৰেহাই) তেন্তে তেওঁলোকে অধিক গধুৰ শুল্ক বহন কৰিব লাগিব। যদি কোনো দেশে প্ৰতিশোধমূলক শুল্ক আৰোপ কৰে, তেন্তে আমেৰিকাই ইয়াৰ বিৰুদ্ধে অধিক কঠোৰ ব্যৱস্থা গ্ৰহণ কৰিব।

ইয়াৰোপৰি তেওঁ কয় যে, যদি দেশসমূহে নিজৰ বাণিজ্য নীতি সলনি কৰে তেন্তে আমেৰিকাইও নিজৰ স্থিতি পুনৰ বিবেচনা কৰিব। এই শুল্ক ধুমুহাৰ মাজতে ট্ৰাম্প প্ৰশাসনে কিছুমান দেশৰ সৈতে সীমিত বাণিজ্যিক চুক্তি কৰিছে। ইয়াৰ ভিতৰত ব্ৰিটেইন আৰু ভিয়েটনাম অন্যতম। তেওঁলোকৰ সৈতে সম্পূৰ্ণ চুক্তি কৰা হৈছে, আনহাতে চীনৰ সৈতে আংশিক চুক্তি কৰা হৈছে।