তাৰিকৰ আগমণে নতুন শক্তি প্ৰদান কৰিছে বিএনপিক, ইউনুছৰ আশাত পৰিব নেকি চেঁচাপানী?

বাংলাদেশত নতুন ৰাজনৈতিক সমীকৰণ

বাংলাদেশত শ্বেখ হাছিনাৰ চৰকাৰৰ পতনৰ পিছতে ১২ ফেব্ৰুৱাৰীত দেশখনৰ নিৰ্বাচনৰ পূৰ্বে হিংসাত্মক পৰিস্থিতিৰ উদ্ভৱ হৈছে। সংখ্যালঘু আৰু হিন্দুৰ ওপৰত চলা অত্যাচাৰৰ ঘটনা অব্যাহত থকাৰ ফলত ইউনুছ চৰকাৰক লৈ প্ৰশ্ন উত্থাপন হৈছে। এই সকলোবোৰৰ মাজতে বাংলাদেশ নেশ্য়নেলিষ্ট পাৰ্টিৰ ভাৰপ্ৰাপ্ত অধ্যক্ষ তথা প্ৰাক্তন প্ৰধানমন্ত্ৰী খালেদা জিয়াৰ পুত্ৰ তাৰিক ৰহমানে ১৭ বছৰৰ মূৰত পত্নী আৰু কন্যাৰ সৈতে ঘৰলৈ উভতি আহিছে। বাংলাদেশত তাৰিক ৰহমানক সমৰ্থকে উষ্ম আদৰণি জনায়।

তাৰিক ৰহমানে যেতিয়া নিজৰ অসুস্থ মাতৃ খালেদা জিয়াক লগ কৰিবলৈ গৈছিল তেতিয়া সমৰ্থকৰ ভিৰ ইমানেই বেছি আছিল যে তাৰিকক মাতৃৰ ওচৰলৈ যাবলৈ বহু সময় লাগিছিল। প্ৰথম ভাষণত তাৰিক ৰহমানে নিৰাপদ বাংলাদেশ গঢ়াৰ কথা কয় আৰু স্বাধীনতা সংগ্ৰামী আৰু হাদীৰ কথা উল্লেখ কৰে।

মহম্মদ ইউনুছ আৰু জামাত-ই-ইছলামীৰ নীতিৰ সৈতে বৈসাদৃশ্য দেখুৱাই তাৰিক ৰহমানে বাংলাদেশৰ ইতিহাস স্মৰণ কৰে। তেওঁ মাৰ্টিন লুথাৰৰ কথা কৈছিল আৰু লগতে উগ্ৰ যুৱক-যুৱতীসকলৰ কথাও উল্লেখ কৰিছিল। তেওঁ ক’লে, “মোৰ এটা পৰিকল্পনা আছে।” বাংলাদেশৰ মাটিত ভৰি দিয়াৰ লগে লগে তাৰিক ৰহমান আৱেগিক হৈ পৰিল। খালী ভৰিৰে তেওঁ মাটিত থিয় হৈ থাকিল। আনকি দেশৰ মাটিও হাতত তুলি লৈছিল। পিছত মঞ্চত উঠি তেওঁ “প্ৰিয় বাংলাদেশ” বুলি ভাষণ আৰম্ভ কৰিছিল আৰু তাৰ পিছত তেওঁৰ পৰিকল্পনাৰ কথা ক’লে।

তাৰিক ৰহমানে বাংলাদেশৰ ধৰ্মীয় সম্প্ৰীতি আৰু দেশৰ জনসাধাৰণৰ সুৰক্ষাৰ বিষয়ে কয়, আৰু এতিয়া তেওঁ এই বিষয়টোকে লৈ নিৰ্বাচনত প্ৰতিদ্বন্দ্বিতা কৰিব। ৰাজনৈতিক বিশ্লেষক পাৰ্থ মুখোপাধ্যায়ে তেওঁৰ নেতৃত্বত সংখ্যাগৰিষ্ঠ চৰকাৰ গঠন হ’ব বুলি ভৱিষ্যদ্বাণী কৰিছে। ধাৰাবাহিক প্ৰতিবাদ আৰু হিংসাৰ ফলত কলংকিত হোৱা বাংলাদেশৰ ভাবমূৰ্তি উন্নত কৰিব বিচাৰিছে তাৰিক ৰহমানে।

চুবুৰীয়া ৰাষ্ট্ৰ ভাৰতৰ সৈতে থকা তিক্ত হৈ পৰা সম্পৰ্কও শুধৰোৱাৰ চেষ্টা কৰিব। ইউনুছে নতুন বাংলাদেশৰ সপোন দেখিছিল, তাৰিক ৰহমানেও নতুন বাংলাদেশৰ সপোন দেখিছিল, য’ত মানুহৰ কথা কোৱাৰ অধিকাৰ থাকিব।

তেওঁ কয় যে ইউনুছৰ নেতৃত্বত বাংলাদেশৰ সংস্কৃতি, ইতিহাস, স্বাধীনতা সংগ্ৰামৰ স্মৃতিবোৰ মচি পেলোৱা হৈছে। বংগবন্ধু শ্বেখ মুজিবুৰ ৰহমানৰ স্মৃতি মচি পেলোৱা হৈছে আৰু তেওঁ ভাৰত বিৰোধী আৱেগক ইন্ধন যোগাইছে, কিন্তু তাৰিক ৰহমানে নতুন বাংলাদেশ সৃষ্টিৰ কথা কৈছে। বাংলাদেশত নিৰ্বাচিত চৰকাৰ গঠন কৰাটোৱেই তেওঁৰ প্ৰধান লক্ষ্য।

দেশৰ আইন-শৃংখলাৰ উন্নতিৰ বাবে শক্তিশালী হাত অতি প্ৰয়োজনীয়। তাৰিক ৰহমান সেই হাত হ’ব বিচাৰে, আৰু শ্বেখ হাছিনা তথা আৱামি লীগৰ বিদায়ৰ লগে লগে সেই পথটো বহুত সহজ হৈ পৰিছে।

৩০০ আসনৰ বাবে নিৰ্বাচন, বিএনপিৰ দাবী শক্তিশালী

বাংলাদেশৰ জাতীয় সংসদৰ নিৰ্বাচন অহা ১২ ফেব্ৰুৱাৰীত অনুষ্ঠিত হ’ব। ৩৫০খন আসনৰ ভিতৰত ৩০০খন আসনৰ বাবে নিৰ্বাচন অনুষ্ঠিত হ’ব। ৩০০খন আসনৰ বাবে ভোটদান মুকলি, আনহাতে ৫০খন মহিলাৰ বাবে সংৰক্ষিত, যিসকলক সমানুপাতিকভাৱে মনোনীত কৰা হয়। চৰকাৰ গঠন কৰিবলৈ এটা দল বা মিত্ৰজোঁটক প্ৰয়োজন ১৫১খন আসনৰ। চৰকাৰ গঠন কৰাৰ পিছত ইউনুছে আৱামী লীগ নিষিদ্ধ কৰিছিল। বিএনপি, এনচিপি, জামাত-ই-ইছলামী, জাতীয় পাৰ্টিৰ লগতে আন কেইবাটাও সৰু সৰু দল আৰু নিৰ্দলীয় প্ৰাৰ্থীয়ে এতিয়া প্ৰতিদ্বন্দ্বিতা আগবঢ়াব।

নিৰ্বাচনত প্ৰতিদ্বন্দ্বিতা কৰা অন্যতম প্ৰধান দল বিএনপিক প্ৰধান প্ৰতিদ্বন্দ্বী হিচাপে গণ্য কৰা হয়। তাৰিক ৰহমানৰ প্ৰত্যাৱৰ্তনে বিএনপিক যথেষ্ট শক্তিশালী কৰি তুলিছে। শ্বেখ হাছিনাৰ চৰকাৰৰ বিৰুদ্ধে ছাত্ৰ-ছাত্ৰীৰ প্ৰতিবাদৰ পিছত যোৱা বছৰ গঠন হোৱা নেশ্যনেল চিটিজেনছ পাৰ্টিয়ে নিৰ্বাচনত প্ৰতিদ্বন্দ্বিতা আগবঢ়াব আৰু ই মূল খেলুৱৈ হ’ব পাৰে। ইয়াৰ সমান্তৰালকৈ বাংলাদেশ জামাত-ই-ইছলামী আৰু জাতীয় পাৰ্টি (এৰছাদ) দলো নিৰ্বাচনী যুঁজত নামি পৰিছে।

জামাত-নেচনেল চিটিজেন পাৰ্টিৰ মাজত আসন ভাগ-বাটোৱাৰাৰ বাবে আলোচনা

নিৰ্বাচনৰ বাবে নেশ্যনেল চিটিজেন পাৰ্টি আৰু জামাত-ই-ইছলামীৰ মাজত আলোচনা চলি আছে। এই বিষয়ত দলৰ ভিতৰৰ বহুতেই একমত হ’লেও এটা শিতানৰ মতামত বেলেগ বেলেগ। ইয়াৰ পূৰ্বে এনচিপিয়ে বিএনপিৰ সৈতে আসন ভাগ-বতৰা চুক্তি সন্দৰ্ভত আলোচনাত মিলিত হৈছিল। কিন্তু শেষত দুয়োপক্ষৰ মাজত কোনো চুক্তিত উপনীত নহ’ল।

অৱশ্যে বিএনপিৰ ভাৰপ্ৰাপ্ত অধ্যক্ষ তাৰিক ৰহমান ঘূৰি অহাৰ পিছত এনচিপিৰ জ্যেষ্ঠ নেতাসকলে তেওঁৰ সৈতে আসন ভাগ-বতৰা চুক্তিৰ পুনৰ আলোচনাৰ সম্ভাৱনাৰ সন্ধান কৰিছে। তেওঁলোকে তাৰিক ৰহমানৰ সৈতে সাক্ষাৎ কৰি এই বিষয়ত আলোচনা কৰিব বিচাৰিছে।

জামাতক এতিয়া সমৰ্থনৰ প্ৰয়োজন

ইয়াৰ পূৰ্বে এনচিপিয়ে বিএনপিৰ সৈতে আসন ভাগ-বাটোৱাৰা চুক্তি সন্দৰ্ভত আলোচনাত মিলিত হৈছিল। কিন্তু শেষত দুয়োপক্ষৰ মাজত কোনো চুক্তিত উপনীত নহ’ল। এনচিপিৰ সৈতে আপোচৰ পক্ষত নহয় বিএনপি। ফলস্বৰূপে এন চি পি আৰু জামাতৰ মাজত আপোচ সন্দৰ্ভত আলোচনা চলি আছে। এনচিপিয়ে কমেও ৫০খন আসনৰ দাবী জনাইছে যদিও জামাতে ইমানবোৰ আসন স্বীকাৰ কৰিবলৈ অনিচ্ছুক। অৱশ্যে তাৰিক ৰহমান বাংলাদেশলৈ ঘূৰি অহাৰ পাছত বিএনপি সমৰ্থকসকলৰ মাজত দেখা পোৱা উদ্যমে এনচিপি আৰু জামাতক আশ্বস্ত কৰিছে।

এন চি পিৰ নেতাসকলৰ মতে যদি তেওঁলোকে জয়ী হ’ব বিচাৰে তেন্তে তেওঁলোকৰ হাতত বিএনপি বা জামাতৰ সৈতে মিত্ৰতা কৰাৰ বাহিৰে আন কোনো বিকল্প নাই। গতিকে জামাতৰ সৈতে যিদৰে আলোচনা অব্যাহত ৰাখিছে, ঠিক তেনেদৰে বিএনপিৰ সৈতে আলোচনাৰ দুৱাৰ মুকলি কৰি ৰাখিছে। মুঠতে তাৰিক ৰহমান ঘূৰি অহাৰ পিছত বাংলাদেশত মিত্ৰজোঁটৰ ৰাজনীতি আৰু সমীকৰণৰ গণিত পুনৰ সংৰচনা কৰা হৈছে।